(ភ្នំពេញ)៖ យុវសិស្ស ធុច សាលិ ដែលទទួលបានអាហារូបករណ៍ ទៅសិក្សា​នៅប្រទេសចិន រហូតដល់ចប់ថ្នាក់សាកលវិទ្យាល័យ ត្រូវបានក្រុមហ៊ុន FUN Entertainment ជ្រើសរើសឲ្យក្លាយជាយុវជនសុឆន្ទៈនៅកម្ពុជា ក្នុងគោលបំណង រួមចំណែកចែករំលែកវប្បធម៌រវាងប្រទេសទាំងពីរ គឺចិននិងកម្ពុជា តាមរយៈសកម្មភាពនានា អំឡុងពេល​សិក្សានៅក្នុងប្រទេសចិន។

កញ្ញា សំណាង ពុទ្ធានី ​តំណាងក្រុមហ៊ុន FUN Entertainment បានថ្លែងប្រាប់ឲ្យដឹងថា នៅថ្ងៃនេះ ក្រុមហ៊ុនបានរៀបចំកម្មវិធីសីទសារព័ត៌មាន ​បង្ហាញជាផ្លូវការរបស់​យុវសិស្ស ធុច សាលិ ដែលបានក្លាយទៅជា​យុវជនសុឆន្ទៈកម្ពុជា ក្នុងការរួមចំណែកចែករំលែកវប្បធម៌កម្ពុជា-ចិន តាមរយៈក្រុមហ៊ុន FUN​ ដើម្បីឲ្យសាធារណជនបានដឹង និងជ្រាបជាព័ត៌មានពីគោលបំណង ​ធ្វើឲ្យក្រុមហ៊ុនជ្រើសរើសយកយុវសិស្ស ធុច សាលិ ធ្វើជាទូតសុឆន្ទៈនៅថ្ងៃនេះ។

តំណាងដដែលបានបន្តថា ការប្រកាសឲ្យដឹងពីទូតសុឆន្ទៈនេះ គឺក្នុងគោលបំណងសំខាន់ៗ៤ រួមមាន​​៖
ទី១, លើកទឹកចិត្តដល់ យុវសិស្ស ធុច សាលិ ដែលទទួលបានអាហារូបករណ៍ទៅសិក្សារនៅប្រទេសចិន រហូតដល់ចប់ថ្នាក់សាកលវិទ្យាល័យ ក្នុងគោលបំណងលើកកម្ពស់ និងគាំទ្រគ្រប់សកម្មភាព ដែលទាក់ទងនឹងវិស័យអប់រំ។
ទី២, ចែករំលែក និងលើកស្ទួយសិល្បៈ វប្បធម៌ អរិយធម៌ របស់កម្ពុជាតាមរយៈសកម្មភាពផ្សេងៗរបស់យុវសិស្ស ធុច សាលិ ក្នុងអំឡុងពេលសិក្សានៅប្រទេសចិន។
ទី៣, រួមចំណែកផ្សព្វផ្សាយ វិស័យទេសចរណ៍ជាតិកម្ពុជាទៅកាន់ប្រទេសចិន និងអន្តរជាតិ ឲ្យកាន់តែមានភាពទូលំទូលាយ តាមរយៈវីដេអូខ្លីៗ ដោយមានការចូលរួមផលិតពី ក្រុមហ៊ុន FUN និងការសហការ​ពីយុវសិស្ស ធុច សាលិ។
ទី៤, ជាចំណែកមួយ ក្នុងការចូលរួមសកម្មភាពសប្បុរសធម៌ផ្សេងៗនៅកម្ពុជា ដែលគាំទ្រដោយក្រុមហ៊ុនហ្វាន់។

សូមបញ្ជាក់ថា ក្រុមហ៊ុន FUN Entertainment ត្រូវបានបង្កើតឡើងនាដើមឆ្នាំ ២០២០នេះ ក្នុងគោលបំណងបណ្តុះបណ្តាលយុវជន យុវនារីគ្រប់រូប ដែលមានទេពកោសល្យ និងក្តីស្រមៃក្លាយខ្លួនជាអ្នកសិល្បៈ និងជាបុគ្គលដែលមានជំនាញ និងទេពកោសល្យច្បាស់លាស់ ដើម្បីទទួលបាននូវឱកាសបញ្ចេញសមត្ថភាពរបស់ខ្លួន និងរួមចំណែកក្នុងការផ្សព្វផ្សាយ អរិយធម៌ វប្បធម៌ រួមទាំងវិស័យទេសចរណ៍ជាតិ ឲ្យកាន់តែរីកសុះសាយ ទាំងថ្នាក់ជាតិ និងអន្តរជាតិ៕