(បរទេស)៖ រដ្ឋអាជ្ញាឥណ្ឌាបាននិយាយកាលពីថ្ងៃពុធ សប្តាហ៍នេះថា ទីភ្នាក់ងារស៊ើបអង្កេត នឹងបើកការស្រាវជ្រាវរកមូលហេតុពិតប្រាកដ ជុំវិញការស្លាប់របស់កំពូលតារាសម្តែងល្បីឈ្មោះរបស់បូលីវូដ លោក Sushant Singh Rajput ដែលប្រជាពលរដ្ឋខ្មែរភាគច្រើន ស្គាល់តាមរយៈសម្តែងជាតួឯកប្រុសក្នុងរឿង «ជីវិតស្រ្តីមេផ្ទះ»។ នេះបើតាមការចេញផ្សាយរបស់សារព័ត៌មាន Reuters នៅថ្ងៃទី០៦ ខែសីហា ឆ្នាំ២០២០។

លោក Sushant Signh Rajput ដែលមានវ័យ៣៤ឆ្នាំ ត្រូវបានប្រទះឃើញស្លាប់ក្នុងផ្ទះរបស់លោក នៅទីក្រុងប៊ុមបៃ កាលពីថ្ងៃទី១៤ ខែមិថុនា ឆ្នាំ២០២០។ មូលហេតុនៃការស្លាប់របស់លោក ត្រូវបានប៉ូលិសសន្និដ្ឋានថា ស្លាប់​ដោយចៃដន្យ ខណៈប្រព័ន្ធផ្សព្វផ្សាយក្នុងស្រុកផ្សេងទៀត បានរាយការណ៍ថា លោក Rajput ស្លាល់ដោយការ​ធ្វើអត្តឃាត ដែលមើលទៅហាក់បីដូចជា មិនមានភាពច្បាស់លាស់ទាល់តែសោះ ជុំវិញមូលហេតុនៃការស្លាប់របស់តារាល្បីរូបនេះ ទើបក្រុមគ្រួសារលោក Rajput សំណូមពរឲ្យមានការស៊ើបអង្កេត ដើម្បីដឹងពីមូលហេតុពិតប្រាដក។

ជាការកត់សម្គាល់ នៅថ្ងៃពុធ ទី០៥ ខែសីហា ឆ្នាំ២០២០ លោក Tushar Mehta ដែលជាមន្រ្តីជាន់ខ្ពស់ផ្នែកយុត្តិធម៌របស់ឥណ្ឌា បានប្រាប់តុលាការកំពូលថា រដ្ឋាភិបាលសហព័ន្ធរបស់ឥណ្ឌាបានអនុញ្ញាត សេចក្តីស្នើសុំរបស់រដ្ឋបាលរដ្ឋ Bihar ជាកន្លែងតារាប្រុស Raiput ស្នាក់នៅ ហើយ​ពាក់ព័ន្ធការប្រគល់ការងារស្រាវជ្រាវ ករណីស្លាប់របស់កំពូលតារាសម្តែង Sushant Singh Rajput ឲ្យទៅទីភ្នាក់ងារស៊ើបអង្កេត CBI របស់រដ្ឋាភិបាលសហព័ន្ធឥណ្ឌា ជាអ្នកចាត់ចែងវិញ។

តែយ៉ាងណា​រដ្ឋបាលរដ្ឋ Maharashtra ​ជារដ្ឋមួយផ្សេងទៀត និងមានទីក្រុងប៊ុមបៃជារដ្ឋធានី បានបដិសេធមិនព្រមផ្ទេរសំណុំរឿងនេះ ពីប៉ូលិសក្នុងតំបន់ទៅទីភ្នាក់ងារ CBI ឡើយ ដោយលើកឡើងថា គ្មានដីកា​ពីតុលាការសហព័ន្ធ។

គួរបញ្ជាក់ថា នៅរដ្ឋ Bihar គណបក្សរបស់នាយករដ្ឋមន្រ្តីឥណ្ឌាលោក ណារិនដ្រា ម៉ូឌី ចែករំលែកអំណាចជាសម្ព័ន្ធមិត្ត ហើយរដ្ឋ Bihar គ្រោងនឹងរៀបចំ​ការឆ្នោតអំឡុងចុងឆ្នាំនេះ។ រីឯ Maharashtra ជារដ្ឋមានស្តុកស្តម្ភជាងគេប្រចាំប្រទេសឥណ្ឌា ស្ថិតក្រោមអំណាចគ្រប់គ្រងរបស់រដ្ឋបាលចម្រុះ នៃគណបក្សប្រឆាំងចំនួនបី៕