(អាមេរិក)៖ លោក Simon Cowell ដែលត្រូវបានគេស្គាល់ថា ជាគណៈកម្មការក្នុងកម្មវិធីលំដាប់ពិភពលោក «America’s Got Talent» ត្រូវបានបញ្ចូនទៅកាន់មន្ទីរពេទ្យ និងទទួលការវះកាត់ជាបន្ទាន់ បន្ទាប់ពីជួបគ្រោះថ្នាក់ បង្ក​មកពីការធ្លាក់ពីលើកង់អេឡិចត្រូនិច។ នេះបើតាមការចេញផ្សាយរបស់សារព័ត៌មាន Fox News នៅថ្ងៃទី១០ ខែសីហា ឆ្នាំ២០២០។

បើតាមក្រុមគ្រួសាររបស់លោក Simon បានិយាយថា លោកបាក់ឆ្អឹងជាច្រើនកន្លែង បន្ទាប់ពីធ្លាក់ពីលើកង់អេឡិចត្រូនិច ដែលទើបនឹងទិញ អំឡុងពេលដែលលោកបានសាកល្បងជិះនៅផ្ទះ ស្ថិតនៅទីក្រុង Malibu រដ្ឋអាលីហ្វ័រញ៉ា កាលពីថ្ងៃសៅរ៍ ទី០៨ ខែសីហា។

ក្រោយទទួលការព្យាបាល លោក Simon មិនមានគ្រោះថ្នាក់អ្វីធ្ងន់ធ្ងរនោះទេ។ ទន្ទឹមគ្នានេះ លោក Simon ផ្ទាល់បានសំណូមពរដល់មហាជនទាំងអស់ថា ប្រសិនបើទិញកង់អាឡិចត្រូនិច សូមអានការណែនាំមុននឹងជិះជាលើកដំបូង​ ខណៈគ្រោះថ្នាក់នេះនឹងធ្វើឲ្យលោក Simon ប្រឈមការអវត្តមានធ្វើជាគណៈកម្មការ សម្រាប់រដូវកាលថ្មី នៃកម្មវិធី ​«America’s Got Telent» ដែលនឹងធ្វើការផ្សាយផ្ទាល់ នៅថ្ងៃអង្គារ៍ និងថ្ងៃពុធសប្តាហ៍នេះ។

គួរជម្រាបថា លោក Simon Cowell ក្រៅពីធ្វើជាគណៈកម្មការក្នុងកម្មវិធី «America’s Got Telent» លោកក៏ធ្វើជាគ្រូបង្វឹកក្នុងកម្មវិធីលំដាប់ពិភពលោកជាច្រើនដូចជា​ កម្មវិធី «Britain's Got Talent», កម្មវិធី «The X Factor» និងកម្មវិធី​ «American Idol» ជាដើម៕