(កូរ៉េ)៖ បើតាមលោក Woori ជាភ្នាក់ងាររបស់តារាចម្រៀងស្រី Mina សមាជិកក្រុម AOA បានប្រកាសនៅថ្ងៃអង្គារ៍ ទី១២ ខែសីហាថា គណនី Instagram ផ្លូវការរបស់ Mina ត្រូវបាននាងសម្រេចលុបចោលដោយខ្លួនឯង បន្ទាប់ពីនាងបានបង្ហោះសារជាលើកចុងក្រោយ សុំអភ័យទោសទៅកាន់អ្នកគាំទ្រ ចំពោះទង្វើររបស់ខ្លួន។ នេះបើតាមការចេញផ្សាយរបស់សារព័ត៌មាន Kpop Starz នៅថ្ងៃទី១៣ ខែសីហា ឆ្នាំ២០២០។

បើតាមភ្នាក់ងាររបស់ Mina បានឲ្យដឹងថា តារាស្រីរូបនេះបានលុបគណនី Instagram របស់នាងដោយផ្ទាល់ដៃ ក្នុងគោលបំណងយកចិត្តទុកដាក់លើការព្យាបាលជំងឺផ្លូវចិត្ត ដែលនាងកំពុងប្រឈមនាពេលបច្ចុប្បន្ន។ គេមិនទាន់ដឹងថា Mina នឹងបើកគណនី Instagram របស់នាងឡើយវិញឬអត់នោះទេ បន្ទាប់ពីការសម្រេចចិត្តរបស់នាង ក្នុងការឈប់លេងបណ្តាញសង្គមមួយនេះ។

ជាការកត់សម្គាល់ Mina ធ្លាប់ប្រើប្រាស់គណនី Instagram របស់នាងនិយាយរឿងអាស្រូវមួយចំនួន​ ដែលនាងបានជួបប្រទះ​ក្នុងក្រុម AOA ជាពិសេសតែងតែប្រាប់ពីស្ថានភាពជំងឺផ្លូវចិត្ត​ ដែលនាងមាននឹងពេលបច្ចុប្បន្ន។

គួរជម្រាបថា កាលពីសប្តាហ៍មុន តារាកូរ៉េស្រី Mina ត្រូវបានបញ្ចូនទៅកាន់មន្ទីរពេទ្យភ្លាមៗ បន្ទាប់ពីបានធ្វើអត្តឃាតខ្លួនឯងមិនបានសម្រេច ហើយបានចាកចេញពីមន្ទីរពេទ្យកាលពីថ្ងៃទី០៩ ខែសីហា ឆ្នាំ២០២០ ខណៈបច្ចុប្បន្ននាងកំពុងទទួលការព្យាបាលជំងឺផ្លូវចិត្ត ដោយមានការយកចិត្តទុកដាក់មើលថែពីម្តាយរបស់នាងផ្ទាល់។ មានការបញ្ជាក់ថា ទោះបីជាស្ថានភាពជំងឺផ្លូវចិត្តនាងជាធូរស្បើយ ក៏នាងមិនត្រឡប់មកវិស័យសិល្បៈវិញដែរ៕