(ភ្នំពេញ)៖ ក្រោយពីពន្លកចេញពីថ្នាល «នាថការិនិរបាំ» ក្នុងសាលារបាំវិចិត្រសិល្បៈបានក្លាយតារាសម្តែងជួរមុខក្នុងប្រទេសកម្ពុជា កញ្ញា នី មុនីនាថ ត្រូវបានអ្នកគាំទ្រចាត់ទុកជា «តារាទឹកភ្នែក» មួយដួងដែលពិបាករកអ្នកមានទេពកោសល្យ ដូចបានឡើយ។ ក្រោយពីទទួលបានភាពល្បីល្បាញហើយ កញ្ញា នី មុនីនាថ ក៏បានជួបស្នេហាដោយបានឈានដល់ ការស្តីដណ្តឹងដឹងឭពីចាស់ទុំទាំងសងខាង រួមទាំងអ្នកគាំទ្រគ្រប់គ្នាបានសាទរ។ តែមិនបានប៉ុន្មានផងក៏ស្នេហាដែលដឹងឮ ដោយការស្តីដណ្តឹង នេះមាននិស្ស័យត្រឹមតែថតរូបឯម្ចាស់ខ្លួនទាំងសងខាងបានក្លាយជាអ្នកប្តឹងផ្តល់គ្នាទៅវិញ។ ក្រោយពីប្តឹងគ្នាចុះឡើងរឿងទាំងនេះបានចប់សព្វគ្រប់។ ហើយកញ្ញា នី មុនីនាថ ក៏នៅទំនេរនិងមានសម្រស់កាន់តែ ស្អាតជាងមុន និងទេពកោសល្យនៅរក្សាតំណែងជា «តារាទឹកភ្នែក» ដដែលទោះជាមានឈ្មោះជាមេម៉ាយខាន់ស្លាក៏ដោយ។ ហើយក៏ធ្វើអោយអ្នកគាំទ្រជាពិសេសបុរសៗចង់ដឹងដែលថាជិវីត កញ្ញា នី មុនីនាថ វិវត្តន៍ដល់ណាហើយ ទាំងទម្លាប់រស់នៅនិងទ្រព្យសម្បត្តិព្រមការងារ ។
* អំពីប្រវត្តិសង្ខេប ជីវិតគ្រួសារ និងការសិក្សា
កញ្ញា នី មុនីនាថ កើតនៅថ្ងៃទី០១ ខែមករា ឆ្នាំ១៩៩១ ស្រុកកំណើតនៅភ្នំពេញ ជាតារាសម្តែងដ៏មានប្រជាប្រិយក្នុងដួងចិត្តអ្នកគាំទ្រជាមួយនឹងទេពកោសល្យសម្តែងរហូតទទួលបានរហ័សនាមថា«តារាទឹកភ្នែក»។ មានបងប្អូន៤នាក់ស្រី២ប្រុស២ នាងជាកូនទី១។ មានប្អូនប្រុសម្នាក់ មាននិស័្សយជាអ្នកសិល្បៈផ្នែកថតរូប។ កញ្ញា នី មុនីនា មានកំពស់១,៥៨ម៉ែត្រ ទំហំទាំងបី (ទ្រូង,ចង្កេះ, ត្រគាក ៣២-២៦-៣៤ )។
នី មុនីនាថ ជាអតីតសិស្សសាលាភូមិវិចិត្រសិល្បៈផ្នែករបាំ។ នី មុនីនាថ បានបញ្ចប់ការសិក្សាត្រឹមថ្នាក់ទី១២ នៃសាលារបាំមួយនេះដែលខ្លួនទើបអាយុបាន១៦ឆ្នាំ ដោយសារជួបវិបត្តិលោកឪពុកមានជម្ងឺប្រចាំកាយ ហើយនាងជាកូនបង ក្នុងគ្រួសារទទួលរែកទូលបន្ទុកដ៏ធំនេះ។
* អំពីស្នាដៃក្នុងវិស័យសិល្បៈ
ដោយការតស៊ូដើម្បីជំនះរាល់ឧបសគ្គដែលរែកទូលខាងលើនិងមានទេពកោសល្យពីការរៀនសូត្រកន្លងមក នី មុនីនាថ បានចូលសម្តែងដំបូងនាឆ្នាំ២០០៧។ នាពេលនោះ នី មុនីនាថ មិនទាន់បានគ្រោងតំណែងជាតួឯកនោះទេគឺបានត្រឹមជា អ្នកសម្តែងជាមួយអ្នកសម្តែងផ្សេងៗប៉ុណ្ណោះ។ ដោយការខំប្រឹងប្រែងនិងការតស៊ូពីមួយថ្ងៃទៅមួយថ្ងៃ ក៏ត្រូវបានអ្នកដឹកនាំផលិតកម្មនានាអញ្ជើញអោយ នី មុនីនាថ គ្រងតំណែងជាតួឯកដំបូងក្នុងរឿង «រាជនីដួងចិត្ត» ក្នុងស្ថានីទូរទស្សន៍ CTN
បន្ទាប់មករឿង «សន្យាស្នេហ៍» និងរឿង «នាងនាថបាត់ដំបង» នៅប៉ុស្តិ៍លេខ៥។ល។ សុទ្ធសឹងជារឿងដែលត្រូវសម្តែងជាតួកំសត់និងទឹកភ្នែក ដោយឡែកចំពោះថតជា MV ក៏ភាគច្រើនត្រូវអ្នកដឹកនាំជ្រើសរើសជាតួកំសត់បែកបាក់ស្នេហ ដែលជាហេតុនាំអោយជាប់រហស្សនាមថា«តារាទឹកភ្នែក»។
មកដល់បច្ចុប្បន្ននេះក្រោយបាត់មុខមួយរយៈ កញ្ញា នី មុនីនាថ បានបង្ហាញខ្ឡួនឡើងវិញក្នុងរឿងភាគ «កាំបិតមុខពីរ» បញ្ជាំងលើទូរទស្សន៍បាយ័នកន្លងទៅ ហើយតាមការសង្គេតឃើញថាកញ្ញា នី មុនីនាថ កំពុងថតរឿងថ្មីៗ(ក្នុងឆ្នាំ២០២០) ជាច្រើនរឿងទៀតកំពុងត្រៀមដាក់បញ្ចាំង ក្នុងពេលឆាប់ៗនេះនៅស្ថានីយ៍ទូរទស្សន៍នានាក្នុងប្រទេសកម្ពុជា។
* អំពីជីវិតស្នេហា
ក្រោយពីបែកបាក់ស្នេហាដំបូង ដែលបានត្រឹមតែស្តីដណ្តឹងដឹងឮពីចាស់ទុំទាំងសងខាង ហើយបានក្លាយជាមេម៉ាយខាន់ស្លាមកជាយូរខែដែលហើយនោះ កញ្ញា នី មុនីនាថ ក៏បានបង្ហើបថា «ខ្ញុំកំពុងផ្តើមមានស្នេហ៍ថ្មីហើយ» តែនាងមិនព្រមបញ្ជាក់បង្ហាញឈ្មោះបុរសម្នាក់នោះជានរណាអោយដឹងឡើយ ដោយគ្រាន់តែបញ្ជាក់ថាលោកជាពាណិជ្ជករចុះឡើងក្នុងនិងក្រៅប្រទេស។ តែទោះយ៉ាងណាក៏តារាទឹកភ្នែកមេម៉ាយខាន់ស្លារូបនេះបានសង្កត់ធ្ងន់ថា នាងរៀងចាលហើយរឿងស្នេហា ដែលមិនបានមើលចិត្តគ្នាអោយច្បាស់ជាមុននឹងសម្រេចចិត្តនោះ។ នាងបញ្ជាក់ថាស្នេហាថ្មីមួយនេះ នាងត្រូវតែស្វែងយល់គ្នាអោយច្បាស់លាស់និងយល់ចិត្តគ្នាអោយបានស៊ីជម្រៅសិន កុំអោយមានកំហុសជាលើកទី២ទៀត។ ការបង្ហាញអាថ៌កំបាំងខាងលើនេះ កញ្ញា នី មុនីនាថ ក៏បានសង្កត់ធ្ងន់ផងដែរថា «គាត់ជាអ្នកផ្តល់កម្លាំងចិត្តពេលខ្ញុំមានបញ្ហាបាក់ទឹកចិត្តធ្ងន់ធ្ងរប្រឈមនឹងរឿងក្តីក្តាំកន្លងមក»។
ទោះជាយ៉ាងណា Fresh News Plus និងលោកអ្នកជាអ្នកគាំទ្រតារាទឹកភ្នែករូបនេះ រង់ចាំត្រេកអរនិងជូនពរអោយកញ្ញា នី មុនីនាថ ជួបតែសុភម្គលក្នុងជីវិតអាពាហ៍ពិពាហ៍របស់នាងនាពេលខាងមុខ។
* អំពីជំនួញក្រៅពីសិល្បៈ
ក្រៅពីការមមាញឹកនឹងការថតសម្តែងកញ្ញា នី មុនីនាថ ក៏ជាម្ចាស់ក្រុមហ៊ុន «នាថការ» នាំចូលនូវផលិតផលសំអាងនិងកែសម្ផស្សពីប្រទេសកូរ៉េ និងវេចខ្ចប់នៅប្រទេសថៃ។ ហើយទទួលបានការគាំទ្រជាច្រើនពីអ្នកប្រើប្រាស់។
ក្រៅពីជំនួញផ្ទាល់ខ្លួន និងការសម្តែងដ៏មមាញឹកកញ្ញា នី មុនីនាថ ក៏ត្រូវបានក្រុមហ៊ុនផលិតផលនានាចាប់អារម្មណ៍អញ្ជើញជាទូតសុឆន្ទៈនៃផលិតផលរបស់គេផងដែរ។
* អំពីរឿងល្បីក្នុងសារព័ត៌មានកន្លងមក
ក្នុងជីវិតជាតារាគឺគេចមិនផុតពីការចាប់អារម្មណ៍ពីអ្នកគាំទ្រ និងអ្នកសារព័ត៌មានតាមប្រម៉ាញ់ដំណឹងនោះឡើយ។ ចំណែកកញ្ញា នី មុនីនាថ ក៏ឆ្លងមិនផុតពីការប្រម៉ាញ់របស់អ្នកលសារព័ត៌មាននោះផងដែល។ ទាំងរឿងទេពកោសល្យដ៏ប៉ិនប្រសព្វធ្វើអោយមានការចាប់អារម្មណ៍ពីអ្នកគាំទ្រសរសើរថាពូកែសម្តែង។ល។
ទាំងរឿងរាវទំនាស់ជាមួយអតីតគូស្នេហ៍ដំបូង ហើយប្រែក្លាយជារឿងក្តីក្តាំដល់តុលាការព្រោះរឿងទំនុកចិត្ត ត្រូវបានសារព័ត៌មានចុះផ្សាយព្រោងព្រាតរាល់ថ្ងៃ តាមប្រធានបទរៀងៗខ្លួនរបស់អ្នកសារព័ត៌មាននាពេលនោះ។
ក្រោយមកក៏ស្ងប់ស្ងាត់វិញដោយយើងអាចចាត់ទុកថាចប់សព្វគ្រប់តាមផ្លូវច្បាប់។
* អំពីទ្រព្យសម្បត្តិ
តាមការស្វែងរកបញ្ជាក់ថា កញ្ញា នី មុនីនាថ ពីមុនមានផ្ទះពីរ មួយបានលក់ហើយដោយសារតម្រូវការចាំបាច់ និងផ្ទះសព្វថ្ងៃនៅ «បុរីជីបម៉ុងឡែន» ដែលបច្ចុប្បន្នមានតម្លៃជាង១០ម៉ឹនដុល្លារ និងមានអចលនៈទ្រព្យផ្សេងទៀតដែល
Fresh News Plus មិនទាន់អាចរកទិន្នន័យច្បាស់ជូនបាន។ ចំពោះមធ្យោបាយធ្វើដំណើររថយន្ត Lexus 330 ។
* អំពីទម្លាប់និងចំណង់ចំណូលចិត្ត
ជាទម្លាប់កញ្ញា នី មុនីនាថ ហាត់ប្រាណពេលព្រឹកនៅផ្ទះ។ រាល់ព្រឹកទម្លាប់ញ៉ាំទឹកឃ្មុំនិងទឹកតែ ហើយនិងម្សៅល្មៀតសូននឹងទឹកឃ្មុំដើម្បីជួយសម្រស់ស្បែកមុនពេលញាំអាហារព្រឹក។ ជាទូទៅមួយថ្ងៃទម្លាប់ញាំទឹកពីរលីត្រ។ ចំពោះស្រា និងស្រាបៀរក្នុងកម្មវិធី កញ្ញា នី មុនីនាថ ញ៉ាំក្នុងចំនួនតិចតួច។ ចូលចិត្ត ម្ហូបខ្មែរ ពិសេសភ្លាក្តាមសេះ ចូលចិត្តញ៉ាំហិរតិចៗ និងគ្រឿសមុទ្រ។ សម្លៀកបំពាក់និយមទិញនៅហាងតិចតួច តែនិយមទិញតាមអនឡាយ។ ចំពោះសម្លៀកបំពាក់ប្រពៃណី និយមរើសក្រណាត់និងចេញម៉ូដដោយខ្លួនឯងផ្ទាល់និងមានជាងប្រចាំខ្លួន៕
