(ភ្នំពេញ)៖ ក្រុមបឹងកេត និងម្ចាស់ផ្ទះអាស៊ីអឺរ៉ុប យូណាយធីត នឹងបន្ដការប្រកួតសប្ដាហ៍ទី១២ របស់ខ្លួន នាវេលាម៉ោង ៣៖៣០នាទីរសៀលថ្ងៃចន្ទនេះ នៅកីឡដ្ឋាន AEU Sport Park បន្ទាប់ពីផ្អាកការប្រកួតត្រឹមពាក់កណ្ដាលវគ្គទី១ កាលពីម្សិលមិញ។

ជំនួបរវាងក្រុមទាំងពីរ ត្រូវបានផ្អាកពាក់កណ្ដាលផ្លូវ ក្រោយដំណើរការប្រកួតបានជិត ២០នាទី បន្ទាប់ពីមានភ្លៀងធ្លាក់ខ្លាំង និងត្រូវបានគណៈកម្មការសម្រេចផ្អាកការប្រកួត ៣០នាទី ២ដង។ តែដោយកីឡដ្ឋានរបស់អាស៊ីអឺរ៉ុប មិនទាន់មានភ្លើងអាចបន្ដការប្រកួតបាន គណៈកម្មការក៏សម្រេចលើកការប្រកួតមកធ្វើនៅថ្ងៃនេះវិញ។

ចំពោះការប្រកួតនេះដែរ បឹងកេតត្រូវការឈ្នះដាច់ខាត ដើម្បីពង្រឹងឱកាសប្រជែងជើងឯកជាមួយក្រុមព្រះខ័នរាជស្វាយរៀង ដែលកំពុងឈរកំពូលតារាង និងមាន ៣១ពិន្ទុ ខណៈបើបឹងកេតឈ្នះអាស៊ីអឺរ៉ុប ពួកគេចាញ់ប្រៀបក្រុមជើងឯកឆ្នាំចាស់នេះត្រឹម ២ពិន្ទុប៉ុណ្ណោះ តែបើស្មើវិញ នឹងចាញ់ប្រៀបដល់ទៅ ៤ពិន្ទុឯណោះ៕