(ភ្នំពេញ)៖ លោក ឆន សុវណ្ណរាជ ជាតារាចម្រៀងលំដាប់ជួរមុខល្បីមួយរូប នៅក្នុងប្រទេសកម្ពុជា។ លោកជាតារាមានរូបសង្ហា និងមានចរិតស្លូតបូតដែលមានអ្នកនិយមគាំទ្រស្រឡាញ់គ្រប់ៗគ្នា។ តែអ្វីដែលគួរឲ្យកត់សម្គាល់នោះ គឺលោកមិនដែលលេចឮរឿងមានស្នេហាជាមួយនរណាឡើយ ដែលធ្វើឲ្យអ្នកគាំទ្រយល់ថា ប្រហែលជាលោកមានលក្ខខណ្ឌតឹងតែងខ្លាំង ចំពោះអនាគតភរិយារបស់លោក ឬក៏យ៉ាងណានោះទេ។ អ្វីដែលសំខាន់ពេលនេះ Fresh News Plus ស្វែងរកនូវព័ត៌មានដែលទាក់ទងនិងប្រវត្តិ ជីវិតគ្រួសារ ស្នេហា និងទម្លាប់រស់នៅរបស់លោកមកចែកជូនលោកអ្នក ជាអ្នកគាំទ្រលោកឲ្យមានដឹងកាន់តែច្បាស់។
* អំពីប្រវត្តិសង្ខេប គ្រួសារ និងការសិក្សា៖
លោក ឆន សុវណ្ណរាជ ( Chhorn SovannaReach) កើតនៅថ្ងៃទី១៩ ខែតុលា ឆ្នាំ១៩៨៥ នៅខេត្តកំពង់ស្ពឺ។ លោកជាកូនទី៣ក្នុងចំណោមបងប្អូន៨នាក់ ប្រុស២នាក់ និងស្រី៦នាក់ ក្នុងគ្រួសារដែលមានកំរិតជីវភាពមធ្យម។ ឆន សុវណ្ណារាជ បានបញ្ចប់ការសិក្សាថ្នាក់បរិញ្ញាប័ត្រផ្នែកគណនេយ្យ នៅសាកលវិទ្យាល័យបៀលប្រាយ (BBU) ។ លោក ឆន សុវណ្ណរាជ បច្ចុប្បន្នមានអាយុ៣៥ឆ្នាំ (ឆ្នាំ២០២០) និងមានកំពស់ ១៧៥ សង់ទីម៉ែត្រ។
* អំពីស្នាដៃក្នុងវិស័យសិល្បៈ៖
លោក ឆន សុវណ្ណរាជ ចូលចិត្តចម្រៀងតាំងតែពីកុមារភាពមកម្ល៉េះ លោកតែងតែស្រមៃថា ថ្ងៃណាមួយលោកនឹងក្លាយជាតារាចម្រៀងមួយរូប ប្រចាំប្រទេសហើយព្យាយាម ដើម្បីសំរេចសេចក្ដីប៉ងប្រាថ្នានេះ។ លោកមិនដែលធ្លាប់បានប្រឡង ក្នុងកម្មវិធីប្រឡងចម្រៀងណាមួយឡើយ ដោយហេតុថា លោកខ្វះភាពជឿជាក់ តែលោកមិនដែលបោះបង់ក្តីប្រាថ្នានោះឡើយ។ គ្រប់កម្មវិធីជប់លៀងឬមង្គលការរបស់មិត្តភក្តិ ឬរបស់បងប្អូន លោកតែងតែឡើងច្រៀងជានិច្ច។
ក្នុងឆ្នាំ២០០៥ ដោយមានការជំរុញ និងលើកទឹកចិត្តពីមិត្តភក្តិ និងបងប្អូន លោកបានដាក់ពាក្យ និងចូលធ្វើតេស្តសំឡេងនៅផលិតកម្ម U2 និងផលិតកម្មចេនឡាប្រាដឺដែលជាបុត្រសម្ព័ន្ធនឹងគ្នា បានចំនួន២បទគឺបទ «ពេលណាអូនស្មោះ» និងបទ «ចាំទាំងត្រដរ» ហើយបានរង់ចាំមួយរយៈ តែមិនឃើញការឆ្លើយតបពីផលិតកម្មខាងលើនេះទេ។ តែលោកក៏មិនបានបាក់ទឹកចិត្តឡើយ លោកបន្តដាក់ពាក្យចូលផលិតកម្មរស្មីហង្សមាសបន្តទៀត និងបន្ទាប់មកត្រូវបានថ្នាក់ដឹកនាំហង្សមាស អនុញ្ញាតឲ្យចូលច្រៀងក្នុងផលិតកម្ម ក្រោយពីបានធ្វើតេស្តសំឡេងតាំងពីពេលនោះមក។ លោកក៏ក្លាយជាអ្នកចម្រៀងប្រចាំផលិតកម្ម ហង្សមាស ចាប់ពីពេលនោះមក។ បទដំបូងៗដែលលោកបានធ្វើឲ្យអ្នកគាំទ្រស្គាល់នោះគឺបទ «យំប្រាប់មេឃ» «១ខែ១០ថ្ងៃ» «ឲ្យបងចាំអូនដល់ពេលណា» «រឿងនិទានមុនចូលគេង» ជាដើម។ ក្នុងផលិតកម្មរស្មីហង្សមាស លោកច្រៀងឆ្លងឆ្លើយជាមូយ សុគន្ធ និសា, ឱក សុគន្ធកញ្ញា បានយ៉ាងល្អនិងស៊ីសង្វាក់គ្នា។ ក្រោយពីសាងភាពល្បីល្បាញក្នុងផលិតកម្មរស្មីហង្សមាសហើយនោះ លោកក៏បានបង្ហាញខ្លួនលើឆាកតន្រ្តីលំដាប់អន្តរជាតិ ក្នុងប្រទេសកម្ពុជា៤ឆ្នាំជាប់គ្នា ក្នុងកម្មវិធី «Best of the Best» ដែលត្រូវបានចាប់អារម្មណ៍ជាខ្លាំងពីមហាជន។
បទចម្រៀងដែលមានការទទួលស្គាល់ខ្លាំង គឺបទ «ទីក្រុងគ្មានមេឃ» និងបទ «នឹក A ស្រឡាញ់ B» សុទ្ធសឹងជាបទដែលបានអង្រួនដួងចិត្តយុវវ័យនាសម័យឆ្នាំ២០១២។ ភាពល្បីឈ្មោះនេះ លោក ឆន សុវណ្ណរាជ ត្រូវបានអញ្ជើញចេញទៅសម្តែងក្រៅប្រទេសជាច្រើនដង ដូចជានៅប្រទេសកូរ៉េ បារាំង អូស្ត្រាលី និងអាមេរិកជាដើម។
លោក ឆន សុវណ្ណរាជ គឺជាតារាចម្រៀងប្រុសតែម្នាក់គត់ប្រចាំផលិតកម្មហង្សមាស ដែលមានឱកាសចូលរួមក្នុងព្រឹត្តិការណ៍ដ៏ធំមួយនៅប្រទេសចិន មានឈ្មោះថា «មហោស្រពតន្រ្តីចម្រៀងអាស៊ាន»។ កម្មវិធីនេះបង្កើតឡើង ក្នុងគោលបំណងរឹតបន្តឹងមិត្តភាពរវាងចិន និងអាស៊ាន ដោយក្នុងនោះលោក ឆន សុវណ្ណារាជ ត្រូវបានកម្មវិធីអញ្ជើញជាភ្ញៀវកិត្តិយសចូលរួមសម្ដែង នៅព្រឹត្តិការណ៍នោះ។
និងស្នាដៃមួយទៀតដែលលោក ឆន សុវណ្ណរាជ ទទួលបានគឺពានរង្វាន់របស់ប្រទេសចិន (Cultural Ambassador of ZhengZhou) ដែលជាមោទនភាពដោយបានបង្ហាញពីសិល្បៈវប្បធម៌ចម្រៀង និងវប្បធម៌ផ្សេងៗរបស់កម្ពុជាទៅកាន់មនុស្សជាតិ លើពិភពលោកបានស្គាល់។
ក្រៅពីវិស័យចម្រៀង និងបទពិសោធន៍ក្នុងការសម្តែង MV លោកក៏ត្រូវបានផលិតកម្មជ្រើសរើសឲ្យធ្វើជាតួសម្តែងក្នុងរឿងភាពយន្តរបស់ផលិតកម្ម គឺក្នុងរឿងភាគ «សិសិររដូវក្នុងបេះដូង» តួឯកជាមួយ សុគន្ធ និសា ផងដែរ ហើយក៏ជារឿងទទួលបានការសរសើ ពីអ្នកគាំទ្រយ៉ាងខ្លាំងនាពេលនោះ។
ក្រៅពីសមិទ្ធផលនិងស្នាដៃខាងលើ នៅប៉ុន្មានឆ្នាំចុងក្រោយនេះ ត្រូវបានជ្រើរើសជា «COACH» ក្នុងកម្មវិធី «The Voice Cambodia» និង «Cambodian Idol» ដែលជាកម្មវិធីដ៏ល្បីលើពិភពលោក ដែលត្រូវបង្កើតឡើងនៅកម្ពុជា។ បេក្ខជន ប៊ុត សីហា ជាកូនក្រុមរបស់លោកក្នុងកម្មវិធី The Voice Cambodia ទទួលបានជោគជ័យនារដូវកាលទី១នេះ។
* អំពីជីវិតស្នេហា៖
បើនិយាយពីរឿងស្នេហាវិញ ដូចជារឿងចំឡែកបន្តិច ព្រោះថាគិតមកដល់ពេលនេះ (ឆ្នាំ២០២០) លោក ឆន សុវណ្ណរាជ មានអាយុ៣៥ឆ្នាំហើយ តែតារាប្រុសល្បីលំដាប់ជួរមុខនៃប្រទេស និងមានរូបរាងសង្ហារូបនេះ ហាក់បីដូចជាមាន «បេះដូងស្ងប់ស្ងាត់» ក្នុងរឿងស្នេហាមិនដែលលេចឮម្ដងណាឡើយថា លោកមានស្នេហាឬមានអ្នកតាមស្រឡាញ់ ឬមួយតារារូបនេះ មានលក្ខខណ្ឌតឹងតែងខ្លាំងចំពោះ «ម្ចាស់ក្សត្រី» ក្នុងដួងចិត្តរបស់លោក ឬក៏មិនទាន់ដល់ពេលលោកបើកបេះដូងទទួលរឿងស្នេហា។ ចំពោះរឿងនេះ Fresh News Plus ទុកពេលវេលាជូនលោក ព្រោះជារឿងផ្ទាល់ខ្លួននិងគ្រួសារ និងជារឿងអនាគតរបស់លោកផ្ទាល់ខ្លួន។
* អំពីជំនួញក្រៅពីសិល្បៈ៖
ក្រៅពីអាជីពជាអ្នកសិល្បៈ តើលោក ឆន សុវណ្ណរាជ មានមុខជំនួញអ្វីខ្លះនោះ? នៅឆ្នាំ២០០៧ យើងនៅចាំថា លោកបានបើកហាងកាត់ដេរសម្លៀកបំពាក់ ព្រមទាំងហាងថតរូបមួយកន្លែងមានទីតាំងតាមបណ្តោយផ្លូវទេពផន តែបច្ចុប្បន្ននេះពុំឃើញមានដំណើការទេ នេះអាចថាលោករវល់នឹងការងារសិល្បៈ ធ្វើឲ្យលោកពុំមានពេលគ្រប់គ្រាន់សម្រាប់ការងារជំនួញ ទើបហាងនេះមិនបានដំណើរការបន្តទៀត។
ក្រៅពីភាពល្បីល្បាញបានពីសំឡេងដ៏ពីរោះ រូបសម្បត្តិដ៏សង្ហាហើយនោះ បានទាក់ទាញដល់ម្ចាស់ផលិតផលមួយចំនួន មិនអាចខ្វះរូបលោកបាន ដោយបានអញ្ជើញលោកជាតំណាងផលិតផលរបស់ក្រុមហ៊ុន មានដូចជាផលិតផល VASELINE ខោទ្រនាប់ HEROPOWER ជាដើម។
* អំពីរឿងចចាមអារ៉ាម និងផ្សាយក្នុងសារព័ត៌មាន៖
រឿងរ៉ាវជុំវិញខ្លួន លោក ឆន សុវណ្ណរាជ ក្នុងសារព័ត៌មានតែងតែរងនូវព័ត៌មានខ្លះៗ ដោយគេចមិនផុតឡើយ ព្រោះលោកជាមនុស្សដែលមហាជនចាប់អារម្មណ៍ ដូចជាកន្លងទៅលេចឮថា លោកជាមនុស្សស្រឡាញ់ភេទដូចគ្នាម្តងជាពីរដង ត្រូវបានចុះផ្សាយលើទំព័រសារព័ត៌មានអេឡិចត្រូនិចនាពេលនោះ តែចំពោះរឿងចចាមអារ៉ាមនោះ ក៏ស្ងប់ស្ងាត់ទៅវិញដោយមានការបកស្រាយពីលោក ព្រោះជាព័ត៌មានមិនពិត គឺជាព័ត៌មានដើម្បីជាការទាក់ទាញឲ្យមានការចាប់អារម្មណ៍ ពីអ្នកអានរបស់ខ្លួន។ មានរឿងដូចជា ថាលោកមានស្នេហាជាមួយ ឱក សុគន្ធកញ្ញា ក្រោយពីលេចរូបភាពស្និទ្ធស្នាលគ្នា និងបាត់ស្ងាត់ទៅវិញក្រោយការចេញបកស្រាយពីម្ចាស់ខ្លួនទាំងសងខាង និងរឹតតែស្ងាត់ក្រោយ ឱក សុគន្ធកញ្ញា រៀបការហើយ។ មានការផ្សាយកោតសរសើរ ពីទង្វើកតញ្ញូរបស់លោកចំពោះឪពុកម្តាយ ដូចជារឿយៗលោក ឆន សុវណ្ណរាជ តែងតែទិញវត្ថុមានតម្លៃដូចជា មាស ពេជ្រ ជូនឪពុកម្តាយក្នុងពេលខួបកំណើត ឬពេលចូលឆ្នាំជាដើម។
* អំពីទ្រព្យសម្បត្តិ៖
ដោយឈរជាលំដាប់ជួរមុខលើវិស័យសិល្បៈចម្រៀងក្នុងប្រទេស ពិតជាមហាជនចង់ដឹងណាស់ថា តារារូបនេះមានទ្រព្យសម្បត្តិអ្វីខ្លះ ក្នុងរូបភាពលល្បីល្បាញអស់រយៈពេល១៥ឆ្នាំមក។ តាមការស្វែងរកព័ត៌មានឃើញថាលោក ឆន សុវណ្ណរាជ មានយានជំនិៈផ្ទាល់ខ្លួន រថយន្តតូយ៉ាតាម៉ាក «SIENNA» ដែលមានតម្លៃប្រហែល១០ម៉ឺនដុល្លារ។ មានផ្ទះវីឡានៅក្នុងបុរីមួយក្នុងតំបន់ទួលគោក ដែលជាតំបន់សក្តានុពលខ្ពស់ និងផ្ទះវីឡាមួយកន្លែងទៀតនៅតំបន់ទួលសង្កែ និងមានអចលនទ្រព្យផ្សេងៗទៀត ជាមួយគ្រឿងអលង្ការមួយចំនួន។
* អំពីទម្លាប់ និងចំណង់ចំណូលចិត្ត៖
ជាទម្លាប់ក្នុងបណ្តាញសង្គម លោក ឆន សុវណ្ណរាជ និយមលេងទាំង Feabook និង Instagram ដែល Feabook មានអ្នក Follow 815K និង Instagram មានអ្នក Follow 633K។ យូរៗម្តងលោកចេញដើរកំសាន្តជាក្រុមគ្រួសារ នៅតំបន់ទេសចរណ៍នានាក្នុងប្រទេស និងពេលបុណ្យទានលោកក៏និយមទៅជាក្រុមគ្រួសារ មានឪពុម្ដាយបងប្អូនជាមិនដែលខាន។ ទម្លាប់មួយទៀតលោកចូលចិត្តអានសៀវភៅ។ ពេលធ្វើដំណើរតាមរថយន្តទៅតាមខេត្តដើម្បីសម្តែងម្តងៗ លោកតែងតែអានសៀវភៅជានិច្ច និងពេលនៅផ្ទះទំនេរពីការងារច្រៀង លោកតែងឆ្លៀតតែងនិពន្ធនូវបទចម្រៀង។
លោក ឆន សុវណ្ណរាជ មានទម្លាប់ពិសេសមួយទៀត គឺលោកមានចំណូលចិត្តសន្សំគ្រឿងអលង្ការមាស និងពេជ្រ។ លោកកម្រចេញក្រៅណាស់លោកទម្លាប់នៅផ្ទះពេលទំនេរ។ លោកហាត់ប្រាណនៅផ្ទះពេលព្រឹក និងហាត់រាំនៅក្រុមហ៊ុនពេលមានបទថ្មី។ លោកទទួលទានស្រា និងស្រាបៀរកំរិតតិចបំផុត និងទម្លាប់ញ៉ាំទឹកប្រហែល៣លីត្រក្នុងមួយថ្ងៃ។ ចំណែកសម្លៀកបំពាក់វិញលោកទិញតិចតួច លោកនិយមកាត់ដេរដោយមានជាងផ្ទាល់ខ្លួន និងចេញម៉ូដដោយខ្លួនលោកផ្ទាល់ និងមានការប្រឹក្សាពីជំនួយការលោកផ្ទាល់។ លោកនិយមពាក់គ្រឿងអលង្ការមាស និងពេជ្រធំៗក្នុងកម្មវិធីសង្គមផ្សេងៗរួមទាំងការសម្តែងម្តងៗផងដែរ៕
