(ក្រុងតូរីន)៖ កីឡាករខ្សែបម្រើ-ប្រយុទ្ធ Arturo Vidal បានចុះកិច្ចសន្យាលេងឲ្យក្លិប Inter Milan រយៈពេល ២ឆ្នាំ ក្រោមតម្លៃផ្ទេរពីក្លិបអេស្ប៉ាញ FC Barcelona តែជាង ១លានដុល្លារប៉ុណ្ណោះ។ នេះបើយោងតាមការចេញផ្សាយដោយ BBC នៅល្ងាចថ្ងៃអង្គារ ទី២២ ខែកញ្ញា ឆ្នាំ២០២០។

ខ្សែបម្រើវ័យ ៣៣ឆ្នាំសញ្ជាតិឈីលខាងលើនេះ នឹងបន្តធ្វើជាកូនសិស្សរបស់អ្នកចាត់ការទូទៅ Antonio Conte ដែលធ្លាប់ជួយ Juventus ឈ្នះពាន Serie A ៣សម័យកាលផងដែរជាមួយគ្នានាពេលកន្លងមក។

Vidal នឹងមានឱកាសបង្ហាញខ្លួនលើកដំបូងក្នុងក្លិបថ្មីពេល Inter ប៉ះក្រុមភ្ញៀវ Fiorentina នៅរាត្រីថ្ងៃអាទិត្យចុងសប្តាហ៍នេះ ពី១ប្រកួតបើកឆាករដូវកាលថ្មីរបស់ពួកគេ។

Vidal បានផ្លាស់មកលេងឲ្យ Barcelona កាលឆ្នាំ២០១៨ ក្រោយចាកចេញពីក្លិបអាល្លឹម៉ង់ Bayern Munich ជាមួយនឹងការចំណាយពេល ៤ឆ្នាំលេងឲ្យក្លិបសេះបង្កង់ Juventus ផងដែរ៕