(ចិន)៖ ក្រុមហ៊ុន Ant Group (Ant Financial និង Alipay) ដែលជាបុត្រសម្ព័ន្ធរបស់ក្រុមហ៊ុន Alibaba Group បានបញ្ជូលឯកសារទៅកាន់និយ័តករមូលបត្រដើម្បីចុះឈ្មោះនៅក្នុងផ្សារហ៊ុនស៊ាងហៃ ខណៈដែលប្រភពព័ត៌មានជាច្រើនបានឡើងថា តម្លៃ IPO របស់ក្រុមហ៊ុននេះ សរុបទាំងផ្សារហ៊ុនស៊ាងហៃ និងហុងកុង មានចំនួនរហូតដល់ ៣៥ពាន់លានដុល្លារអាមេរិក។
យោងតាមការចេញផ្សាយរបស់សារព័ត៌មាន Reuters នៅថ្ងៃទី២៣ ខែកញ្ញា ឆ្នាំ២០២០ បានឱ្យដឹងថា ក្រុមហ៊ុនបច្ចេកវិទ្យាហិរញ្ញវត្ថុមួយនេះ មានគម្រោងចេញលក់ IPO នៅផ្សារហ៊ុនស៊ាងហៃ និងហុងកុងក្នុងពេលដំណាលគ្នា នាខែតុលា ឬក៏ឆាប់ៗខាងមុខនេះ ដោយក្នុងនោះតម្លៃ IPO ដែលបានមកពីផ្សារហ៊ុនទាំងពីរ ត្រូវបានក្រុមអ្នកវិភាគលើកឡើងថា នឹងមានរហូតដល់ ៣៥ពាន់លានដុល្លារអាមេរិក។
ប្រភពខាងលើបានបន្ថែមទៀតថា បើសិនជាក្រុមហ៊ុន Ant Group ទទួលបានតម្លៃ IPO ចំនួន ៣៥ពាន់លានដុល្លារនោះមែន នោះតម្លៃទីផ្សារនៃក្រុមហ៊ុនមួយនេះនឹងកើនឡើងដល់ ២៥០ពាន់លានដុល្លារ ឬអាចលើសនេះ បើសិនជាមានការបោះទុនវិនិយោគបន្ថែម ក្រោយពេលចេញលក់ IPO ។
គួរបញ្ជាក់ផងដែរថា Ant Group ជាក្រុមហ៊ុនបច្ចេកវិទ្យាហិរញ្ញវត្ថុមួយ ស្ថិតក្រោមក្រុមហ៊ុនធំ Alibaba ដែលបច្ចុប្បន្នផ្ដល់សេវាកម្មហិរញ្ញវត្ថុតាមប្រព័ន្ធអនឡាញ និងត្រូវបានគេស្គាល់ភាគច្រើនតាមរយៈ Alipay ដែលគិតមកដល់ពេលនេះ បង្កើតឡើងបាន៥ឆ្នាំហើយ ដោយមានបុគ្គលិកប្រមាណ ៩០០០នាក់ និងមានអតិថិជនប្រមាណ ៥៨៨លាននាក់៕