(ប៊ូដាផេស)៖ Bayern Munich ដែលជាជើងឯក Champions League នឹងត្រូវប៉ះជើងឯក Europa League, Sevilla ដើម្បីដណ្តើមពាន UEFA Super Cup 2020 ដែលនឹងធ្វើឡើងនៅប្រទេសហុងគ្រីនារាត្រីនេះ។

ជំនួបរវាងជើងឯកអឺរ៉ុបទាំងពីរនារដូវកាលមុន Bayern Munich របស់អាល្លឺម៉ង់ និង Sevilla របស់អេស្ប៉ាញ នឹងធ្វើឡើងនៅឯកីឡដ្ឋានដែលស្ថិតក្នុងទីក្រុង Budapest ប្រទេសហុងគ្រីនាម៉ោង ២៖០០នាទីរំលងអាធ្រាត្រឈានចូលថ្ងៃសុក្រ ទី២៥ ខែកញ្ញា ឆ្នាំ២០២០ (ម៉ោងនៅកម្ពុជា)។

ក្រុមទាំងពីរធ្លាប់មានប្រវត្តិជួបគ្នា ២ដងកាលឆ្នាំ២០១៨ ដោយស្មើគ្នា ០-០ និង Bayern Munich បានយកឈ្នះ Sevilla ២-១ គ្រាដែលក្រុមជើងឯកអាល្លឹម៉ង់ ក៏បានបំបាក់ Schalke 04 ក្នុងលទ្ធផល ៨-០ នៅថ្ងៃបើកឆាក Bundesliga គ្រាដែល Sevilla នៅពុំទាន់ចាប់ផ្តើមប្រកួតនៅ LaLiga នោះទេ បើទោះបីជាចាប់ផ្តើមបាន ១សប្តាហ៍ហើយក៏ដោយ។

Bayern Munich ជាជើងឯក UEFA Champions League ឆ្នាំ២០២០-២០២១ ក្រោយយកឈ្នះ Paris Saint-Germain ក្នុងលទ្ធផល ១-០ នៅវគ្គផ្តាច់ព្រ័ត្រ គ្រាដែល Sevilla ជាជើងឯកពានលំដាប់ទី២ អឺរ៉ុប UEFA Europa League បន្ទាប់ពីយកឈ្នះគូប្រជែង Inter Milan ៣-២ ផងដែរ៕