(ភ្នំពេញ)៖ ពេជ្រ សោភា ម្ចាស់បទ «Better Day» ជាតារាចម្រៀងស្រីមានប្រជាប្រិយភាពលំដាប់ជួរមុខមួយរូប បានបង្ហាញខ្លួននៅឆ្នាំ២០០៤ ក្នុងផលិតកម្មរស្មីហង្សមាស។ ជារាតាចម្រៀងដែលមានជីវិតកំសត់ជាងគេ បើប្រៀបនឹងជីវិតតារាចម្រៀងដូចគ្នា។ ពេជ្រ សោភា ធ្លាប់និយាយថា «បទ Better Day គឺជាបទចម្រៀងបើកទំព័រជីវិតថ្មីរបស់ក្រុមគ្រួសារនាង ដែលនាងមិនអាចបំភ្លេចបានទេ»។
ខាងក្រោមនេះ សូមលើកយកប្រវត្តិតស៊ូពីជីវិតខ្សត់ខ្សោយ មកដល់ភាពជោគជយ នៃរាតាចម្រៀងកំសត់ជាងគេរូបនេះ មកជូនលោកអ្នកអានដែលគាំទ្រ Fresh News Plus និងអ្នកគាំទ្រតារាចម្រៀង ពេជ្រ សោភា ផងដែរ។
* អំពីប្រវត្តិសង្ខេប ជីវិតគ្រួសារ និងការសិក្សា
ពេជ្រ សោភា មានឈ្មោះដើម សួរ សោភា កើតនៅថ្ងៃទី០៥ ខែមិថុនា ឆ្នាំ១៩៨៤ នៅសង្កាត់បឹងសាឡាងខណ្ឌទួលគោករាជធានីភ្នំពេញ។ ឪពុកឈ្មោះ សួរ សាវ៉ាត និងម្តាយឈ្មោះ សួរ សុភា។ ពេជ្រ សោភា គឺជាកូនពៅក្នុងចំណោមបងប្អូន៥នាក់ ប្រុសម្នាក់និងស្រី៤នាក់។ ក្រោយមកគ្រួសារនាងបានផ្លាស់មករស់ក្នុងភូមិសំបុកចាប សង្កាត់ទន្លេបាសាក់ ខណ្ឌចំការមន រាជធានីភ្នំពេញវិញ។ ក្នុងគ្រួសារមានជីវភាពខ្សត់ខ្សោយនាពេលនោះ ស្របពេលអាយុទើបបាន១០ឆ្នាំ កុមារី ពេជ្រ សោភា ក្រោយទំនេរពីការសិក្សា តែងជួយរុញរទេះអំពៅសាង និងស្ករគ្រាប់លក់តាមមាត់ទន្លេ និងនៅរដូវវស្សាដូរមកលក់ខ្យង និងខ្ចៅស្ងោរវិញ ជាការជួយដល់ជីវភាពឪពុកម្តាយនិងគ្រួសារ។ ឆ្នាំ២០០២ ក្រុមគ្រួសារនាង និងប្រជាជនផ្សេងទៀតត្រូវបានអាជ្ញាធក្រុងភ្នំពេញឲ្យអ្នករស់នៅក្នុងភូមិសម្បុកចាប សង្កាត់ទន្លេបាសាក់ ខណ្ឌចំការមន ចាកចេញដោយត្រូវបានអាជ្ញាធរចែកដីឲ្យគ្រួសារនីមួយៗមួយនៅផ្លូវព្រៃសរ។ ឪពុកនាងបានពិការដៃម្ខាង រហូតដល់ពេល លោកទទួលមរណភាព ក្នុងឆ្នាំ២០១៦។
ពេជ្រ សោភា ចូលរៀននៅសាលាបឋមសិក្សាសុធារស ក្នុងសង្កាត់ទន្លេបាសាក់ ខណ្ឌចំការមនរាជធានីភ្នំពេញ។ បន្ទាប់ពីបញ្ចប់បឋមសិក្សានាងបានទៅរៀននៅអនុវិទ្យាល័យព្រះស៊ីសុវត្ថិ។ ដោយសារជីវភាពគ្រួសារនាងបានបញ្ឈប់ការសិក្សាត្រឹមថ្នាក់មធ្យមសិក្សាប៉ុណ្ណោះ។ ពេជ្រ សោភា និងគ្រួសារជាគ្រឹស្តសាសនិក។
* អំពីស្នាដៃក្នុងវិស័យសិល្បៈ
អ្នកនាង ពេជ្រ សោភា ស្រឡាញ់សិល្បៈចម្រៀងតាំងតែពីតូចមកម្ល៉េះ ពេលនាងរុញរទេះអំពៅសាងលក់ នាងតែងតែច្រៀងលេងដោយមិនមានការខ្មាសអៀនឡើយ។ ពេលនាងរុញរទេះអំពៅសាងលក់កាត់ភ្លៀង នាងតែងច្រៀងលេងដើម្បីបំបាត់ភាពរងា មានតែចម្រៀងប៉ុណ្ណោះ ដែលអាចជួយរំលែកទុក្ខនៅពេលដែលមានលំបាកចិត្ត។ នៅចុងឆ្នាំ២០០១ នាងបានទៅដាក់ពាក្យប្រឡងចម្រៀងនៅក្នុងភោជនីយដ្ឋានមួយកន្លែង ហើយទទួលបានពានរង្វាន់ជាប្រាក់មួយចំនួន។ កាលណោះនាងបានយកប្រាក់នោះ ទៅជូនម្ដាយរបស់នាងដើម្បីទិញម៉ាស៊ីនកិនទឹកអំពៅជំនួសការរុញរទេះអំពៅសាង។
ក្រោយពីពេលនោះមក ពេជ្រ សោភា ក៏បានចូលច្រៀងនៅក្នុងភោជនីយដ្ឋាន «រាត្រី» (ភោជនីយដ្ឋាន «រាត្រី» ស្ថិតនៅក្រោយទីស្តីការក្រសួងទេសចរណ៍ចាស់នាពេលនោះ) ដោយបានទទួលបានប្រាក់កំរៃតិចតួច។ នាងច្រៀងនៅទីនោះបានជិតមួយឆ្នាំ ក៏ត្រូវបានមជ្ឈមណ្ឌលស្ប៉ាកចាប់អារម្មណ៍ ហើយបានអនុញ្ញាត្តឲ្យនាងទៅច្រៀងក្លិបតន្រ្តីស្ប៉ាកនៅពេលនោះបន្ត។
ដោយទឹកដមសំឡេងមានទម្ងន់ និងពីរោះពីកំណើត នាងត្រូវបានអ្នកគ្រប់គ្រងផលិតកម្មរស្មីហង្សមាសបានចាប់អារម្មណ៍ ក៏បានទាក់ទងមកនាងទៅសាកល្បងសំឡេង។ ឆ្នាំ២០០៤ នាងមានឱកាសចេញវ៉ុលដំបូងរបស់នាង គឺតាមរយៈបទ «Better Day» ជាវ៉ុលដំបូងនេះដែលធ្វើឲ្យអ្នកគាំទ្រ ពេជ្រ សោភា បានស្គាល់នាងជាបណ្តើៗ។ បន្ទាប់មកទៀតបទល្បីៗដូចជា «ស្ដាប់បេះដូងអូនផង» «នារីល្ងើស្មោះស្នេហ៍» «ស្រីល្ងង់» «ចាំបងមានថ្មីចាំបែកពីអូន» «លាងចិត្តឲ្យជ្រះ» និងបទ «Dream About You»។ រហូតមកទល់បច្ចុប្បន្ននេះ នាងបានបន្សល់បទចម្រៀងរាប់រយបទ ដែលបទចម្រៀងភាគច្រើនរបស់នាង គឺត្រូវបានទស្សនិកជនទទួលស្គាល់ថាពិតជាពីរោះ។ មិនត្រឹមតែច្រៀងនោះទេ ពេជ្រ សោភា ក៏ធ្លាប់បាននិពន្ធបទទំនុកច្រៀងជាច្រើនបទផងដែរ រួមជាមួយការសម្តែង MV បានជាច្រើន។ ពេជ្រ សោភា ច្រៀងនៅក្នុងផលិតកម្មរស្មីហង្សមាសបានប្រហែល១ឆ្នាំប៉ុណ្ណោះ នាងក៏មានឱកាសចេញច្រៀង និងសម្ដែងនៅក្រៅប្រទេសក្នុងនោះមានដូចជា ប្រទេសអូស្ត្រាលី ក្នុងឆ្នាំ២០០៥ បន្ទាប់មកទៀត គឺកាណាដា បារាំង ជប៉ុន អាមេរិក…។ យើងនៅចាំបទចម្រៀចូលឆ្នាំ គឺបទ «ញីកែងជើង» ដែលច្រៀងរួមគ្នាជាមួយ លោក ជា ដេវីត ពិតជាបានធ្វើឲ្យមានការចាប់អារម្មណ៍ រហូតដល់ថ្នាក់ដឹកនាំប្រទេស យកមករាំយ៉ាងសប្បាយ ក្នុងឱកាសចូលឆ្នាំថ្មី ក្រោមម្លប់សន្តិភាពផងដែរ។ នៅក្នុងផលិតកម្មហង្សមាស ពេជ្រ សោភា ត្រូវបានចាប់ដៃគូនូវបទចម្រៀងរ៉េប ជាមួយ Dj ស្តី លោក ជា ដាវីត លោក Step បានយ៉ាងល្អ។
ដោយសារសំឡេងដ៏ឆ្ងន់ និងពីរោះរបស់នាងបានធ្វើឲ្យ ពេជ្រ សោភា បានបង្ហាញខ្លួនលើឆាកតន្ត្រីលំដាប់អន្តរជាតិ ដែលរៀបចំដោយផលិតកម្ម ហង្សមាស និងរស្មីហង្សមាស ៣ឆ្នាំជាប់គ្នាក្នុងកម្មវិធី «Best of The Best» ដែលត្រូវបានចាប់អារម្មណ៍ជាខ្លាំងពីមហាជន និងយុវជននាពេលនោះ និងបទពិសោធន៍នៃចម្រៀងធ្វើឲ្យនាងបានក្លាយជាគ្រូបង្វឹក «COACH» ក្នុងកម្មវិធីពិភពលោក «The Voice Cambodai» រដូវកាលទី១ រៀបចាំដោយទូរទស្សន៍ហង្សមាស។
* អំពីជីវិតស្នេហា
ចំពោះរឿងស្នេហាវិញ ហាក់ដូចជាស្រពិចស្រពិលបន្តិច ក្រោយពីការលេចឈ្មោះល្បីក្នុងសង្គមដំបូង។ តែអ្វីដែលប្រាកដនោះគឺអ្នកនាង ពេជ្រ សោភា ធ្លាប់បានរៀបការជាមួយបុរសជាអាណិកជនខ្មែរមកពីអាមេរិក ឈ្មោះ ឡៅ ឆលី កាលពីឆ្នាំ២០១៥ នៅផ្ទះដែលនាងបើកហាងកាត់សក់ «បុរសនារី ពេជ្រ សោភា» តាមបណ្តោយផ្លូវត្រសក់ផ្អែម។ តែក្រោយមកជីវិតស្នេហានេះ បានចែកផ្លូវគ្នាវិញ នៅរយៈពេល៣ខែក្រោយ។ ការបែកបាក់នេះមិនបានបញ្ជាក់ច្បាស់លាស់ពីអ្នកនាង ពេជ្រ សោភា ជាម្ចាស់ខ្លួនផ្ទាល់នាពេលនោះទេ។
នៅក្នុងឆ្នាំ២០១៨ ក៏បានលេចឮថា អ្នកនាង ពេជ្រ សោភា មានស្នេហាថ្មីទៀតជាអ្នកសម្តែងថ្មីជាមួយនាង គឺលោក ឆឹម សក្កដា។ ការលេចឮទំនាក់ទំនងដំបូង មានការចាប់អារម្មណ៍ថា ជាស្នេហាក្លែងក្លាយ ដើម្បីតោងភាពល្បីពីតារាចម្រៀង ពេជ្រ សោភា ប៉ុណ្ណោះ។ បន្តិចម្តងៗ ត្រូវបានអ្នកទាំងពីរចេញមកសារភាពថាជាស្នេហាពិត មិនមែនជារឿងស្នេហាដើម្បី «តោងការលីបគ្នានោះទេ» ហើយក៏ត្រៀមចូលរោងការ៥០ភាគរយផងដែរ។ ដោយឡែក ពេជ្រ សោភា ថា៥០ភាគរយទៀត ត្រៀមសំរាប់ពេលវេលា ព្រោះមិនចង់ជាន់រឿងចាស់។ តែរហូតដល់ពេលនេះ (ឆ្នាំ២០២០) ពុំមានលទ្ធផលជាវិជ្ជមាននៅឡើយទេ។
* អំពីជំនួញក្រៅពីសិល្បៈ
ក្រៅពីភាពល្បីល្បាញក្នុងវិស័យចម្រៀង អ្នកនាង ពេជ្រ សោភា បានទទួលសិទ្ធិផ្ដាច់មុខនាំចូលផលិតផលថែរក្សាសម្រស់ «The Beautiful Factr» មកពីប្រទេសកូរ៉េមកចែកចាយលក់នៅក្នុងប្រទេសកម្ពុជា ចាប់ពីខែកក្កដា ឆ្នាំ២០២០តទៅ។ ក្រៅពីភាពមមាញឹក និងភាពល្បីល្បាញពីកេរ្តិ៍ឈ្មោះ និងរូបសម្រសរបស់នាង ក៏មិនអាចខ្វះបានពីផលិតផលល្បីៗ កំពុងពេញនិយមក្នុងប្រទេសកម្ពុជា ដែលក្នុងនោះផលិតផលទូរស័ព្ទដៃម៉ាក់ OPPO បានអញ្ជើញអ្នកនាងរួមជាមួយតារាល្បីពីររូបទៀត ជាទូតសុឆន្ទៈផលិតផលដ៏ល្បីខាងលើនេះផងដែរ។ អ្វីដែលមានពេលទំនេទៀតនោះ នាងនៅ Live លក់អាហារដែលនាង ធ្វើដោយខ្លូនឯងដូចជា «ជ្រក់ជើងមាន់» ជាដើម។ ពេជ្រ សោភា ធ្លាប់បានទៅហាត់រៀនផ្នែក( Design) រចនាម៉ូដសម្លៀកបំពាក់នៅប្រទេសជប៉ុន។ ដោយការហាត់រៀននេះមានរយៈពេល៣ខែម្តង ដោយនាងត្រូវចេញទៅបំពេញការសិក្សានេះពីរដង ទើបចប់កម្មវិធីសិក្សារចនាម៉ូដសម្លៀកបំពាក់នេះ។
* អំពីទ្រព្យសម្បត្តិ និងទម្លាប់ ព្រមទាំងចំណង់ចំណូលចិត្ត
តាមការស្វែងរកព័ត៌មានបានឲ្យដឹងថា ពេជ្រ សោភា មានផ្ទះចាស់នៅផ្លូវព្រៃស និងផ្ទះវីឡាដ៏ទំនើបមួយកន្លែងទៀតនៅបុរី ប៉េង ហ៊ួត (ផ្សារប៉េសេ) ដែលមានតំលៃមិនក្រោម៥០ម៉ឺនដុល្លារឡើយ។ មានរថយន្តទំនើបម៉ាក Porsche ផ្ទាល់ខ្លួន ដែលមានតំលៃជាង១០ម៉ឺនដុល្លារ និងមានរថយន្ត ព្រមទាំងអចលនទ្រព្យដទៃផ្សេងៗទៀត និងគ្រឿងអលង្ការផងដែរ។
អ្នកនាង ពេជ្រ សោភា និយមលេងបណ្តាញ IG (Instagram) ដែលមានអ្នកគាំទ្រជាង 684K និងតាមបណ្តាញ Facebook មានអ្នកគាំទ្រជាង 3M។ ដោយឡែកទម្លាប់ប្រចាំថ្ងៃ អ្នកនាងហាត់ប្រាណនៅផ្ទះ និងហាត់រាំនៅក្រុមហ៊ុន ពេលមានបទថ្មី។ ពេលទំនេរ នាងតែងទំនុកច្រៀងដោយខ្លួនឯង និងពេលខ្លះឡាយលក់ផលិតផលតាមអនឡាយ។ ដោយឡែកសម្លៀកបំពាក់នាងច្នៃម៉ូដ និងរើសក្រណាត់ដោយផ្ទាល់។ នាងញ៉ាំស្រាក្រហម ស្រាវីស្គី និងស្រាបៀរ តែក្នុងកម្មវិធីមិត្តភក្តិ និងញុំក្នុងកំរិតតិចតួច។ នាងមិនសូវបង្ហាញខ្លួននៅទីសាធារណៈទេ។ នាងចូលចិត្តញ៉ាំសម្លខ្មែរ ដូចជាម្ជូរ ប្រហើរ ទឹកគ្រឿង ឯម្ហូបបរទេសក៏អាចញ៉ាំបានដែរ។ នាងមានភាពរស់រាយជាមួយអ្នកគាំទ្រ និងមិត្តរួមការងារ។ នាងតែងទៅមុន៥នាទីគ្រប់កម្មវិធីនៃការណាត់ជួប និងការងារផ្សេងៗ៕
