(បរទេស)៖ «Mulan» គឺជាខ្សែភាពយន្តមួយទទួលបានការចាប់អារម្មណ៍យ៉ាងខ្លាំងនៅពាក់កណ្តាលឆ្នាំ២០២០នេះ ដែលត្រូវបានផលិតឡើងដោយក្រុមហ៊ុន Walt Disney Pictures ដោយចំណាយទឹកប្រាក់ក្នុងការថតអស់២០០លានដុល្លារអាមេរិក។ យ៉ាងណាមិញ តួអង្គចូលរួមសម្តែងក្នុងរឿងមួយនេះ ក៏ត្រូវបានទស្សនិកជនចាប់អារម្មណ៍មិនស្ទើរនោះដែរ ជាពិសសគឺតួឯកស្រី Mulan ដែលម្តង ដោយនាងមានឈ្មោះពិតថា «Liu Yifei» ជាតារាស្រីម្នាក់ក្នុងចំណោមមនុស្ស១០០០នាក់ ដែលក្រុមហ៊ុន Disney សម្រេចជ្រើសរើសយកមកសម្តែងជាតួក្នុងរឿង «Mulan» ។

ខាងក្រោមនេះជាប្រវត្តិត្រួសៗពីតារាសម្តែងល្បី Liu Yifei៖

Liu Yifei កើតនៅថ្ងៃទី២៥ ខែសីហា ឆ្នាំ១៩៨៧ នៅទីក្រុង Wuhan ខេត្ត Hubei ប្រទេសចិន។ នាងជាកូនកាត់អាមេរិក-ចិន ដែលក្នុងសិល្បៈជាតារាសម្តែងផង ជាតារាចម្រៀងផង និងជាតារាម៉ូដែលផង។ នាងជាកូនទោលក្នុងគ្រួសារ។ ឪពុករបស់នាងឈ្មោះ An ShaoKang ជាលេខាទី១ នៅស្ថានទូតចិនប្រចាំប្រទេសបារាំង និងជាសាស្ត្រាចារ្យភាសាបារាំង ក្នុងសាកលវិទ្យាល័យមួយ។ ម្តាយរបស់នាងឈ្មោះ Liu Xiaoli ជាអ្នករាំ និងជាអ្នកសម្តែងលើឆាកដ៏ប៉ិនប្រសព្វម្នាក់។ តាំងពីអាយុ១០ឆ្នាំរហូតមក តារាសម្តែង Liu Yifei បានធំធាត់ចម្រើនវ័យឡើងជាមួយម្តាយ បន្ទាប់ពីឪពុកម្តាយរបស់នាងបានធ្វើការលែងលះគ្នា។ ចាប់តាំងពីពេលនេះមក នាងក៏បានយកឈ្មោះម្តាយរបស់នាងជានាមត្រកូល ដោយប្តូរមកជា «Liu Ximeizi»។

នៅក្នុងឆ្នាំ១៩៩៧ នៅពេលដែល Liu Yifei មានវ័យ១០ឆ្នាំ នាងនិងម្តាយបានផ្លាស់ទៅរស់នៅក្នុងរដ្ឋ Queen ទីក្រុងញូយ៉ក សហរដ្ឋអាមេរិក ជាកន្លែងដែលនាងបានចូលរៀននៅសាលា Louis Pasteur Middle School ហើយឆ្នាំ២០០២ Liu Yifei ក៏បានត្រឡប់ទៅប្រទេសចិនវិញ ដើម្បីចាប់យកអាជីពជាតារាសម្តែង និងបានប្តូរឈ្មោះពី «Liu Ximeizi» មកជា «Liu Yifei»។ ពីរបីសប្តាហ៍ក្រោយមក នាងក៏បានទទួលការបណ្តុះបណ្តាលផ្នែកសម្តែងពីវិទ្យាស្ថានមួយនៅទីក្រុង Beijing គឺ «Beijing Film Academy» ដែលហៅថា «រាជ្យបណ្ឌិត្យសភាភាពយន្តទីក្រុងប៉េកាំង» និងបានបញ្ចប់ការសិក្សាក្នុងឆ្នាំ២០០៦។

* អំពីអាជីពសិល្បៈ ២០០៣-២០០៦

ភ្លាមៗបន្ទាប់ពីបញ្ចប់ការសិក្សានៅ រាជ្យបណ្ឌិត្យសភាភាពយន្តទីក្រុងប៉េកាំង នាងត្រូវបានស្ថានីយទូរទស្សន៍ជាច្រើនផ្តល់ឱកាសសម្តែងភាពយន្ត ខណៈរឿងដំបូងដែលនាងចូលរួមសម្តែង គឺបែបរ៉ូមែនទិកចំណងជើងថា «The Story of a Noble Family» ក្នុងឆ្នាំ២០០៣។ រឿងភាគនេះទទួលបានចំណាត់ថ្នាក់ខ្ពស់បំផុតនៅលើកញ្ចក់ទូរទស្សន៍ CCTV ដោយទទួលបានការគាំទ្រយ៉ាងខ្លាំងពីអ្នកទស្សនា។ ក្នុងឆ្នាំដដែល នាងត្រូវបានផលិតករល្បីឈ្មោះ Zhang Jizhong ជ្រើសរើសឲ្យចូលរួមសម្តែងជាតួអង្គ Wang Yuyan ក្នុងរឿង «Demi-Gods and Semi-Devils»។ រឿងនេះ ត្រូវបានចាក់ផ្សាយនៅតៃវ៉ាន់ និងទទួលបានចំណាត់ថ្នាក់ ៥,៦៩ ក្លាយជារឿងភាគចិនដែលទទួលបានចំណាត់ថ្នាក់ខ្ពស់ជាងគេនៅតៃវ៉ាន់ក្នុងឆ្នាំនោះ។ កាលណោះ Liu សម្តែងជាតួស្រីដែលមានរូបសម្រស់ស្រស់សោភាម្នាក់ រហូតត្រូវបានទស្សនិកជនដែលគាំទ្រនាង ដាក់រហស្ស័នាមឲ្យថា «Fairy Sister»។

ក្នុងឆ្នាំ២០០៥ Liu បានសម្តែងក្នុងរឿង «Chiness Paladin» ដែលកាន់តែធ្វើឲ្យនាងមានប្រជាប្រិយភាពខ្លាំងឡើងៗ រហូតដល់ឆ្នាំ២០០៦ នាងត្រូវបានជ្រើសរើសឲ្យសម្តែងជាតួអង្គ សៀវឡុងនី ក្នុងរឿង «The Return of the Condor Heroes» ឬ «ទេពឥន្ទ្រីបក្សីស្នេហ៍»។ បន្ទាប់ពីសម្តែងរឿងនេះរួច កេរ្តិ៍ឈ្មោះរបស់ Liu ក្នុងវិស័យឧស្សាហ៍កម្មភាពយន្តហាក់ល្បីល្បាញជាបន្តបន្ទាប់ ខណៈក្នុងឆ្នាំដដែលនេះនាងត្រូវបានជ្រើសរើសសម្រាប់ពានរង្វាន់ដ៏ឆ្នើមមួយឈ្មោះថា «Golden Eagle Goddess» ក្នុងមហោស្រពសិល្បៈទូរទស្សន៍របស់ចិន លើកទី៦ «China Golden Engle TV Art Festival»។

* ការវិវត្តន៍ទៅសម្តែងភាពយន្តខ្នាតធំ ២០០៨-២០១៣

បន្ទាប់ពីជោគជ័យខ្លាំងលើអាជីពសម្តែងក្នុងឆ្នាំ២០០៧ នាងបានចូលរួមសម្តែងក្នុងផលិតកម្មហូលីវូដលើកដំបូងគឺរឿង «The Forbidden Kingdom» ក្នុងនាមជាតួអង្គ ចាបមាស។ ក្រោយមក នៅឆ្នាំ២០១០ នាងបានចាប់ផ្តើមសម្តែងរឿងកំប្លែងបែបរ៉ូមែនទិក ចំណងជើងថា «Love in Disguise» ជាតួជាមួយនឹងសម្ដែងតៃវ៉ាន់លោក Wang Leehom។ ក្នុងឆ្នាំ២០១១ នាងបានសម្តែងនៅក្នុងខ្សែភាពយន្តបែបយុទ្ធសិល្ប៍ចំណងជើងថា «A Chiness Ghost Story»។

ក្នុងឆ្នាំ២០១២ Liu បានឈ្នះពានរង្វាន់ជាតារាសម្តែងដ៏ឈានមុខគេជាលើកដំបូងនៅក្នុងអាជីពរយៈពេល១១ឆ្នាំរបស់នាង និងឈ្នះពានតារាសម្តែងស្រីឆ្នើម ក្នុងមហោស្រពភាពយន្តអន្តរជាតិ Macua លើកទី៥ផងដែរ។

ក្នុងឆ្នាំ ២០១៤ Liu បានចាប់ដៃគ្នាសហការណ៍សម្តែងភាពយន្តបែបរ៉ូមែនទិក ជាមួយតារាចម្រៀង និងជាតារាសម្តែងប្រុសល្បីឈ្មោះរបស់កូរ៉េ ចំណងជើងថា «For Love or Money»។

ក្នុងឆ្នាំ២០១៥ នាង សម្តែងក្នុងផលិតកម្មចិន-កូរ៉េខាងត្បូងមួយផ្សេងទៀត ក្នុងរឿង «The Third Way of Love» ខណៈការសម្តែងរឿងនះ បានធ្វើឲ្យនាងឈ្នះពានរង្វាន់ដ៏អស្ចារ្យមួយ ក្នុងកម្មវិធីប្រគល់ពានរង្វាន់ «Chinese Film Media Award» លើកទី១៦។ ក្នុងឆ្នាំ ២០១៦ សម្តែងរឿងបែបរ៉ូមែនទិកបន្ត ក្រោមចំណងជើងថា «Night Peacok» របស់ផលិតកម្មចិន-បារាំង និងដឹកនាំដោយលោក Dai Sijie។

ក្នុងឆ្នាំ២០១៧ នាងចាប់ផ្តើមសម្តែងជាមួយតួប្រុស Yang Yang ភាពយន្តរ៉ូមែនទិក «Once Upon a Time»។ ក្នុងឆ្នាំដដែលនាងក៏បានសម្តែងភាពយន្តបែបប្រវត្តិសាស្ត្រដែលដឹកនាំដោយផលិតករ Belle August មានចំណងជើងថា «The Chinese Widow» ផងដែរ ហើយក៏ទទួលបានពានរង្វាន់តារាសម្តែងស្រីឆ្នើមបំផុត ពីមហោស្រពភាពយន្តអន្តរជាតិទីក្រុងសៀងហៃ។

ក្នុងឆ្នាំ២០១៧ដដែល នៅខែវិច្ឆិកា Liu បានចូលរួមសម្តែងក្នុងខ្សែភាពយន្តខ្នាតធំ មានចំណងជើងថា «Mulan» សម្រាប់ចាក់បញ្ចាំងក្នុងឆ្នាំ២០២០ ដែលជាភាពយន្តយកលំនាំដើមតាមភាពយន្តតុក្ដតារឿង «The Ballad of Mulan» ដែលជារឿងនិទានដ៏មានប្រជាប្រិយភាពរបស់ចិន។ ក្នុងឆ្នាំ២០១៧ដដែល នៅខែធ្នូ មានសេចក្តីរាយការណ៍ថា Liu នឹងសម្តែងនៅក្នុងខ្សែភាពយន្តថ្មីមួយទៀត ចំណងជើងថា «The Love of Hypnosis»។

* អំពីរឿងស្នេហា

តារាសម្តែងល្បី Liu បានចាប់ផ្តើមមានទំនាក់ទំនងជាមួយតារាសម្តែងប្រុស Song Seung-Heon ក្នុងឆ្នាំ២០១៥។ ពួកគេបានជួបគ្នាក្នុងឆ្នាំ២០១៣ នៅពេលសម្តែងរឿង «The Third Way of Love» ជាមួយគ្នា។ យ៉ាងណាមិញ ក្នុងខែមករា ឆ្នាំ២០១៨ ក្រុមការងាររបស់តារាប្រុស Song Seung-Heon បានឲ្យដឹងថា ពួកគេបានបែកបាក់គ្នាហើយ ដោយសារតែអ្នកទាំងពីររវល់រៀងៗខ្លួន និងកត្តាមួយចំនួនទៀត៕