(ក្រុងឡុងដ៍)៖ បិសាចក្រហម Manchester United បានធ្វើដំណើរឆ្ពោះទៅវគ្គ ៨ក្រុមចុងក្រោយនៃពានរង្វាន់លំដាប់ទី៣ អង់គ្លេស League Cup (Carabao Cup) រដូវកាលឆ្នាំ២០២០-២០២១ ជាបន្តទៀត បន្ថែមលើជ័យជម្នះលើកទី២ ត្រឹមរយៈពេល ៤ថ្ងៃទៅលើម្ចាស់ផ្ទះ Brighton នៅនារាត្រីថ្ងៃពុធ ទី៣០ ខែកញ្ញា។

ក្រុមឈុតទី២ របស់លោក Ole បានលើទ័ពទៅបំបាក់ម្ចាស់ផ្ទះ Brighton ដល់ទៅ ៣-០ បន្ថែមលើជ័យជម្នះ ៣-២ ទៀតនៅ Premier League កាលពីរាត្រីថ្ងៃសៅរ៍សប្តាហ៍មុន ដែលមានគម្លាតត្រឹមតែ ៤ថ្ងៃប៉ុណ្ណោះដែលក្រុមទាំងពីរប៉ះគ្នា។

កីឡាករលេងនៅតំបម្រើទាំងបីរួមមាន Scott McTominay, Juan Mata និង Paul Pogba សុទ្ធតែរកបានម្នាក់ ១គ្រាប់ដូចគ្នានៅទឹកដីក្រៅផ្ទះ ដើម្បីបន្តជួយក្រុមបន្តដំណើរឡើងទៅវគ្គ ១/៤ជាបន្តទៀតដែលមានក្រុមខ្លាំង Everton, Spurs, Manchester City និង Liverpool សុទ្ធតែបានឡើងដូចគ្នា។

១ប្រកួតបន្ទាប់ Man Utd ត្រូវប៉ះក្រុមភ្ញៀវ Tottenham Hotspur នៅកីឡដ្ឋាន Old Trafford នាចុងសប្តាហ៍នេះក្នុង Premier League សប្តាហ៍ទី៤ ដែលមានអតីតអ្នកចាត់ការចាស់របស់ខ្លួន លោក Jose Mourinho នៅទីនោះ ក្រោយពេល Brighton ត្រូវប៉ះម្ចាស់ផ្ទះ Everton នៅរាត្រីថ្ងៃសៅរ៍ក្នុងក្របខណ្ឌ Premier League ដូចគ្នា៕