(ភ្នំពេញ)៖ តារាសម្តែង និងជាតារាម៉ូដែលស្រីពន្លកថ្មី ដែលកំពុងមានប្រជាប្រិយភាពខ្លាំង តាមរយៈចូលរួមសម្តែងក្នុងរឿងភាគខ្មែរ «ទេពធីតាព្កុលមាស» ជាតួឆោមផ្កា និងមានឈ្មោះពិតថា អ៊ឹម កែវម៉ូនីតា ហាក់មិនស្ទាក់ស្ទើរនោះឡើយ ក្នុងការបង្ហាញចំណងស្នេហ៍របស់ខ្លួន ទៅកាន់សាធារណជន ស្របពេលដែលនាងកំពុងមានភាពល្បីល្បាញ។ ម្យ៉ាងជាតារាពន្លកថ្មីផងនោះ ពោលគឺហាក់ផ្ទុយស្រឡះពីតារាមួយចំនួន ដែលព្យាយាមលាក់បាំងរឿងឯកជនរបស់ពួកគេ ខណៈកំពុងល្បីល្បាញ ព្រោះខ្លាចបាត់បង់ប្រជាប្រិយភាព។
តាមរយៈចូលរួមជាតារាកតិ្តយសក្នុងកម្មវិធី «អាថ៌កំបាំងក្រៅឆាក របស់តារា» កញ្ញា អ៊ឹម កែវម៉ូនីតា ជាតួអង្គកាចឆ្នាស់ ឈ្មោះ ឆោមផ្កា ក្នុងរឿង «ទេពធីតាព្កុលមាស» បានឲ្យដឹងថា ដំបូងឡើយនាងគឺជាតារាម៉ូដែលម្នាក់ ប៉ុន្តែមិននឹកស្មានទាល់តែសោះ ថាខ្លួនអាចសម្តែងភាពយន្តបាន ជាពិសេសសម្តែងជាតួអង្គកាចឆ្នាស់ ដល់ថ្នាក់ធ្វើឲ្យទស្សនិកជនដែលទស្សនាការសម្តែងរបស់នាងហើយ ស្អប់ឬជេរនាងគ្រប់គ្នា។ ទាំងនេះអាចនិយាយបានថា សមត្ថភាពនៃការសម្តែងភាពយន្តរបស់នាងពិតជា ចូលតួបានល្អស័ក្តិសមជាតារាសម្តែងវ័យក្មេង ត្បិតជាលើកទី១ក្នុងការសម្តែងក្តី។
តារាវ័យក្មេងរូបនេះ ត្រូវបានទស្សនិកជនច្រើនកាន់តែច្រើន តាមរយៈសម្តែងរឿងលើកដំបូង «ទេពធីតាព្កុលមាស» និងបានធ្វើឲ្យកេរ្តិ៍ឈ្មោះ រួមជាមួយនឹងស្នាដៃសម្តែងរបស់នាង កាន់តែល្បីល្បាញក្នុងនាមជាតារាពន្លកថ្មី ។ តែយ៉ាងណា ការគិតរបស់ កែវម៉ូនីតា ហាក់ផ្ទុយស្រឡះពីអ្នកសិល្បៈដទៃ ដែលមិនហ៊ានទម្លាយទាល់តែសោះ ពីចំណងស្នេហ៍របស់ខ្លួន ស្របពេលកំពុងល្បីល្បាញ ខណៈតាមរយៈចូលរួមជាតារាកិត្តិយសក្នុងកម្មវិធី «អាថ៌កំបាំងក្រៅឆាករបស់តារា» កញ្ញា កែវម៉ូនីតា បានបញ្ជាក់ពីរឿងឯកជនទាំងមិនស្ទាក់ស្ទើរថា នាងមានទំនាក់ទំនងស្នេហាជាមួយសង្សាររួចហើយ។ ជាពិសេសការទម្លាយបែបនេះ នាងមិនខ្លាចបាត់បង់ប្រជាប្រិយភាពឡើយ។
និយាយដល់ចំណុចនេះ កញ្ញា អ៊ឹម កែវម៉ូនីតា អះអាងថា ការដែលមានប្រជាប្រិយភាព ឬល្បីល្បាញក្នុងវិស័យសិល្បៈ សម្រាប់នាងគឺមិនមែនទាល់តែលាក់បាំងរឿងស្នេហា ទើបឆាប់ល្បីនោះទេ សំខាន់ឲ្យតែមានសមត្ថភាព និងទេពកោសល្យទៅគឺបានហើយ។ សម្រាប់នាង រឿងស្នេហាគឺគ្មានអ្វីត្រូវលាក់បាំងនោះទេ ហើយរឿងអាជីពសិល្បៈ គឺត្រូវពង្រឹងសមត្ថភាពឲ្យល្អ ដើម្បីទទួលបានភាពល្បីល្បាញបន្ថែម។
គួរជម្រាបថា តារាសម្តែងនិងជាតារាម៉ូដែលស្រីពន្លកថ្មី ដែលកំពុងមានប្រជាប្រិយភាពខ្លាំង តាមរយៈចូលរួមសម្តែងក្នុងរឿងភាគខ្មែរ «ទេពធីតាព្កុលមាស» ជាតួឆោមផ្កា ដែលមានឈ្មោះពិតថា កញ្ញា អ៊ឹម កែវម៉ូនីតា ក្រៅពីអ្នកសិល្បៈ បច្ចុប្បន្ននាងគឺជានិស្សិតម្នាក់កំពុងបន្តការសិល្បៈ ផ្នែកទំនាក់ទំនងអន្តរជាតិឆ្នាំទី២ មកពីសាកលវិទ្យាល័យបញ្ញាសាស្ត្រ។ តារារូបនេះ ត្រូវបានមហាជនកោតសរសើរគ្រប់គ្នាទាំងចំណេះដឹង និងសមត្ថភាពសិល្បៈ៕
