(ភ្នំពេញ)៖ ពានរង្វាន់សម្ដេចតេជោ ហ៊ុន សែន - Hun Sen Cup លើកទី១៤ ថ្នាក់ជាតិ ឆ្នាំ២០២០ នឹងបន្ដការប្រកួតវគ្គជម្រុះ ៨ក្រុមចុងក្រោយ ជើងទី២ នៅថ្ងៃទី០៧-០៨ ខែតុលានេះហើយ គ្រាដែលល្ងាចនេះនឹងរកឃើញបេក្ខភាព ២ក្រុម ដែលត្រូវកក់កៅអីវគ្គពាក់កណ្ដាលផ្ដាច់ព្រ័ត្រមុនគេ។
ចំពោះកម្មវិធីប្រកួតថ្ងៃនេះគឺមាន ២គូរួមមានក្រុមគិរីវង់សុខសែនជ័យ ត្រូវបើកទ្វារផ្ទះទទួលក្រុមភ្នំពេញក្រោន នាវេលាម៉ោង ៣៖៣០នាទីរសៀល នៅកីឡដ្ឋានគិរីវង់សុខសែនជ័យ។ ឯមួយគូទៀត គឺក្រុមព្រះខ័នរាជស្វាយរៀង ជួបក្រុមណាហ្គាវើលដ៏ នៅកីឡដ្ឋានខេត្តស្វាយរៀង នាវេលាម៉ោង ៦ល្ងាច។
កាលពីជើងទី១ ភ្នំពេញក្រោនបានយកឈ្នះក្រុមគិរីវង់ ២-១ ក្នុងដី ខណៈក្រុមព្រះខ័នរាជស្វាយរៀង បានប្រកួតស្មើក្រុមណាហ្គា ២-២ នៅកីឡដ្ឋានស្ដាតចាស់។ តាមរយៈលទ្ធផលនេះ គឺជាបន្ទុកមួយដ៏ធ្ងន់ សម្រាប់ក្រុមនីមួយៗ ក្នុងការប្រកួតកាត់សេចក្ដីល្ងាចនេះ ដ្បិតលទ្ធផលនៅប្រទាញប្រទង់គ្នានៅឡើយ។
ដោយឡែក ២ប្រកួតទៀត នឹងត្រូវប្រកួតនាថ្ងៃទី០៨ ខែតុលាស្អែក រួមមានខេត្តព្រៃវែង បើកទ្វារផ្ទះទទួលក្រុមកងយោធពលខេមរភូមិន្ទ បន្ទាប់ពីរងបរាជ័យក្រៅដី ១-០ កាលពីជើងទី១។ ចំណែកក្រុមវិសាខា ត្រូវជួបក្រុមការពារតំណែងជើងឯកបឹងកេតអែហ្វស៊ី នៅកីឡដ្ឋានព្រីនស៍ ក្រោយប្រកួតស្មើគ្នា ១-១ កាលពីជើងទី១៕
