(ភ្នំពេញ)៖ ការចាប់ដៃគូជាមួយគ្នាយ៉ាងស័ក្តិសម ក្នុងការបកស្រាយចម្រៀង រវាងតារាប្រុសស្រី តន់ ច័ន្ទសីម៉ា និង ខេម បានធ្វើឲ្យមហាជនពេញចិត្តយ៉ាងខ្លាំង ជាពិសេសគ្រប់គ្នាសុទ្ធតែលាន់មាត់ថា «ស្អកប៉ះស្អកមិនធម្មតា» ឡើយ ខណៈសឹងតែគ្រប់បទដែលអ្នកទាំងពីរបកស្រាយជាមួយគ្នា គឺពីរោះប្លែកអារម្មណ៍តែម្តង មិនថាបទមនោសញ្ចេតនា ឬបែបឌឺដងឡើយ។ យ៉ាងណាមិញ ពិតជាមិនធ្វើឲ្យទស្សនិកជនរង់ចាំយូរឡើយ នៅពេលនេះផលិតកម្ម «Galaxy Navatra» បានបញ្ចេញ Full MV ចម្រៀងរបស់អ្នកទាំងពីរ ចំណងជើងថា «ការស្រឡាញ់ដែលខ្វះជាតិស្ករ» ជាផ្លូវការហើយ សាច់រឿងទស្សនាហើយមិនសរសើរមិនបាន។

ជាការកាត់សម្គាល់ តាមរយៈការបញ្ចេញ MV ចម្រៀងជាផ្លូវការរបស់តារាចម្រៀង តន់ ច័ន្ទសីម៉ា និងខេម នៅពេលនេះ ត្រូវបានគេសង្កេតឃើញថា ទទួលបានការគាំទ្រ និងមានអ្នកចូលទស្សនាយ៉ាងច្រើនកុះករ ពោលគឺបញ្ចេញមិនទាន់បានប៉ុន្មាន២ម៉ោងស្រួលបួលផង មានអ្នកចូលទស្សនារហូតដល់ទៅជាង២ម៉ឺននាក់ឯណោះ។ ក្រៅពីការបកស្រាយចម្រៀងរបស់តារាទាំងពីរ ដាក់មនោសញ្ចេតនាដល់ហើយនោះ ងាកមកការសម្តែងរបស់តួអង្គដែលមានក្នុង MV វិញគឺសុទ្ធតែស្អាត ហើយចូលតួតាមសាច់រឿងបានយ៉ាងល្អ។

គួរជម្រាបថា បទ «ការស្រឡាញ់ដែលខ្វះជាតិស្ករ» ត្រូវបានគេដឹងថាជាចម្រៀងឆ្លងឆ្លើយទី២ របស់លោក ខេម ក្នុងផលិតកម្ម Galaxy Navatra ខណៈបទទី១ គឺមានចំណងជើងថា «សុំមួយពេលមក»។ ក្រៅពីនេះ មានចម្រៀងបែបយុវវ័យជាច្រើនបទទៀត ដែលជាការបកស្រាយរបស់ខេម ក្នុងផលិតកម្មថ្មីនេះ ខណៈសឹងតែគ្រប់បទ គឺទទួលបានការពេញចិត្ត ពីប្រិយមិត្តអ្នកស្ដាប់គ្រប់ស្រទាប់វណ្ណៈ៕