(ភ្នំពេញ)៖ បើទស្សនិកជននៅចាំមិនភ្លេច ចាន់ ស្រីខួច កាលពីឆ្នាំ២០១៧ នាងជាកុមារីសម្បុរស្រអែមម្នាក់ ដែលមានមហាជនចាប់អារម្មណ៍ខ្លាំង តាមរយៈបញ្ចេញសមត្ថភាពប្រឡងចម្រៀង ក្នុងកម្មវិធី «The Voice Kids Cambodia»។ យ៉ាងណាមិញ រហូតមកទល់នឹងបច្ចុប្បន្ននេះ សម្រស់របស់តារាចម្រៀងវ័យក្មេងរូបនេះ ហាក់ប្លែកទាំងស្រុងតែម្តង បើប្រៀបធៀបពេលឡើងឆាកប្រឡងលើកដំបូង ពោលកាន់តែមានភាពស្រស់ស្អាត ស្ទើរតែដូចមនុស្សពីរនាក់ផ្សេងគ្នា។ ការផ្លាស់ប្តូរនេះ បានធ្វើឲ្យមហាជនមួយចំនួន យល់ថាតារាវ័យក្មេងរូបនេះ ប្រហែលជាធ្វើការកែសម្ផស្សឬចាក់វីតាមីន ដើម្បីឲ្យស្បែកស្អាត សាច់សខ្ចី កែច្រមុះឲ្យស្រួចហើយមើលទៅ។
យ៉ាងណាមិញ ពាក់ព័ន្ធនឹងការយល់ឃើញបែបនេះ និងមានលេចធ្លាយថា តារាវ័យក្មេង ចាន់ ស្រីខួច មានឣ្នកចិញ្ចឹមនៅពីក្រោយខ្នង តាមរយះម៉ែយ៉ែមជាឣ្នកទាក់ទង បានធ្វើឲ្យនាងមិនពេញចិត្តនោះទេ ព្រោះការលើកឡើងបែបនេះ ធ្វើឲ្យប៉ះពាល់ដល់អារម្មណ៍របស់នាងក្នុងនាមជាតារាវ័យក្មេង។ ម្យ៉ាង ចាន់ ស្រីខួច ខិតខំប្រឹងប្រែងក្នុងវិថីសិល្បៈទាំងសមត្ថភាពផ្ទាល់ខ្លួន ប្រៀបដូចជាគ្មានតម្លៃទាល់តែសោះ។
ក្នុងកម្មវិធី «អាថ៌កំបាំងក្រៅឆាករបស់តារា» កញ្ញា ចាន់ ស្រីខួច បាននិយាយថា តាមពិតទៅព័ត៌មានដែលចុះផ្សាយថា នាងកែសម្ផស្សនោះ គឺមិនមែនជាការពិតទេ។ ការបដិសេធបែបនេះ នាងបានលើកហេតុផលមួយថា ដោយសារវ័យរបស់នាងនៅក្មេង ជាពេលវេលារាងកាយត្រូវលូតលាស់ ដូច្នេះសូម្បីតែហាងកែសម្ផស្សក៏គេមិនទទួលដែរ តើឲ្យនាងទៅធ្វើការកែសម្ផស្សដោយវិធីណា?
និយាយដល់ចំណុះនេះ ស្រីខួច បានពន្យល់ថា មូលហេតុដែលធ្វើឲ្យផ្ទៃមុខនាងមានការផ្លាស់ប្តូរ ជាពិសេសច្រមុះស្រួចជាមុន គឺមានវិធីបែបធម្មជាតិជាច្រើន ដែលនាងបានស្រាវជ្រាវតាមអ៉ីនធើណេត និងព្យាយាមអនុវត្តន៍ជារៀងរាល់ថ្ងៃ អស់រយៈពេលច្រើនឆ្នាំមកហើយ ពោលគឺប្រើការម៉ាស្សានៅពេលព្រឹក ដោយចលនាដៃថ្នម និងប្រើប្រាស់ផលិតផលជំនួយ ទើបទទួលបានទំរង់មុខស្អាត និងសមតាមបំណង។
ស្រីខួច បានបង្ហាញការមិនសប្បាយចិត្តជាខ្លាំង ពេលមានមហាជនយល់ច្រឡំបែបនេះមកលើខ្លួន ជាពិសេសគឺរឿងដែលថាមានអ្នកចិញ្ចឹម ទើបមានការរីកចំរើនដូចពេលនេះ។ បកស្រាយទៅមហាជន តាមរយៈកម្មវិធី «អាថ៌កំបាំងក្រៅឆាករបស់តារា» កញ្ញា ចាន់ ស្រីខួច បានសង្កត់ធ្ងន់ថា ពេលលឺពាក្យទាំងនេះ បានវាយប្រហារផ្លូវចិត្តនាងជាខ្លាំង ពោលគឺមានភាពឈឺចាប់ ព្រោះខ្លួនទើបតែមានវ័យ១៥ឆ្នាំ។ នាងបន្តថា បុគ្គលមួយចំនួនថា នាងមានគេផ្គត់ផ្គង់ពីក្រោយខ្នង ទើបមានការរីកចម្រើនខ្លាំងទៅលើអាជីពសិល្បៈ ដោយសារអះអាងបែបនេះ ហាក់មិនផ្តល់តម្លៃចំពោះការប្រឹងប្រែងរបស់នាងទាល់តែសោះ។
គួរជម្រាបថា កញ្ញាចាន់ ស្រីខួច បច្ចុប្បន្នជាតារាចម្រៀងវ័យក្មេងម្នាក់ ដែលទទួលបានការគាំទ្រច្រើនពីសំណាក់ទស្សនិកជន ខណៈវត្តមានរបស់តារាវ័យក្មេងដួងនេះ ត្រូវបានគេសង្កេតឃើញថា បានបង្ហាញវត្តមានច្រៀងលើឆាកតន្ត្រីរបស់ទូរទស្សន៍ហង្សមាសជារឿយៗ និងមានទីផ្សារច្រើនផ្នែកថតសំអាងការ និងស្ពតពាណិជ្ជកម្មនានា។ ទាំងនេះបានបញ្ជាក់ថា ទោះស្ថិតក្នុងវ័យក្មេងក៏ពិតមែន តែក៏បានដណ្តើមបានទីផ្សារមិនចាញ់តារារៀមច្បងឡើយ។
ពាក់ព័ន្ធនឹងការយល់ច្រឡំទៅ កញ្ញា ចាន់ ស្រីខួច បានលើកដៃសំពះសំណូមពរដល់មហាជន តាមរយៈកម្មវិធី «អាថ៌កំបាំងក្រៅឆាក របស់តារា» ថា នាងយល់ថារាល់ការរិះគន់របស់មហាជនគឺក្នុងន័យស្ថាបនា ប៉ុន្តែពាក្យសំដីខ្លះគឺបានទម្លុះដល់បេះដូងរបស់នាង និងប៉ះពាល់ដល់អារម្មណ៍យ៉ាងខ្លាំង ប៉ុន្តែនាងអាចធ្វើចិត្តបាន ដោយយករឿងសប្បាយចិត្តមកគិតជំនួសវិញ៕
