(អាមេរិក)៖ ក្រុមហ៊ុន Apple បានប្រកាសដាក់ឱ្យធ្វើការបញ្ជាទិញទុកមុននូវ iPhone 12 mini និង iPhone 12 Pro Max កាលពីថ្ងៃសុក្រសប្ដាហ៍មុន ហើយនឹងដឹកជញ្ជូនឱ្យនៅថ្ងៃទី១៣ វិច្ឆិកា ប៉ុន្មានថ្ងៃខាងមុខនេះទៀត ប៉ុន្តែអ្វីដែលអតិថិជន Apple ទន្ទឹងរង់ចាំនោះ គឺ ឆ្នាំសាកថ្មឥតខ្សែ MagSafe Duo។

យោងតាមការចេញផ្សាយរបស់សារព័ត៌មាន The Verge នៅថ្ងៃទី១០ ខែវិច្ឆិកា ឆ្នាំ២០២០ បានឱ្យដឹងថា នៅពេលនេះ ក្រុមហ៊ុន Apple បានដាក់បញ្ចូលឆ្នាំសាកថ្មឥតខ្សែ MagSafe Duo ទៅលើវេបសាយរបស់ខ្លួនរួចរាល់ហើយ រង់ចាំតែថ្ងៃដាក់ឱ្យធ្វើការបញ្ជាទិញទុកមុន ប៉ុណ្ណោះ ខណៈដែលអតិថិជនជាច្រើនបានរអ៊ូឱ្យ Apple ប្រញាប់ចេញលក់ ព្រោះពួកគេចង់ប្រើប្រាស់វាភ្លាមៗ។

នៅលើវេបសាយរបស់ Apple បានបញ្ជាក់រួចហើយគឺ ឆ្នាំសាកថ្មឥតខ្សែ MagSafe Duo មានតម្លៃ ១២៩ដុល្លារអាមេរិក ដោយវាមាន សមត្ថភាពខ្ពស់អាចសាកថ្មបាន iPhone 12 គ្រប់ស៊េរី និង iPhone 8 ហើយក្នុងនោះ Apple Watch ក៏អាចប្រើប្រាស់បានដែរ និង អ្វីដែលកាន់តែពិសេសជាងនេះទៅទៀតនោះគឺអាចសាកថ្មបានពេញលឿន៕