(ភ្នំពេញ)៖ លោក ឡុច សុភា គ្រូបង្វឹកសមាគមកីឡាបាល់ទាត់ខេត្តព្រៃវែង បានសម្ដែងក្តីបារម្ភ ចំពោះការប្រកួតសេសសល់ក្នុងក្របខណ្ឌលីគទី២ កម្ពុជា ក៏ដូចជាការប្រជែងកៅអីលីគកំពូលកម្ពុជា ឆ្នាំ២០២១ បន្ទាប់ពីសមាជិកស្នូល ៥នាក់បានរងពិន័យច្រើនខែពីសហព័ន្ធកីឡាបាល់ទាត់កម្ពុជា បន្ទាប់ពីមានការប៉ះទង្គិច រហូតបង្កជាហិង្សា អំឡុងការប្រកួតសប្ដាហ៍ទី៤ ជាមួយ U21 ភ្នំពេញក្រោន កាលពីចុងខែតុលាកន្លងទៅ។

គ្រូបង្វឹកជួយខេត្តព្រៃវែង សាងប្រវត្តិសាស្ដ្រក្នុងពានសម្ដេចតេជោ ហ៊ុន សែន ឆ្នាំ២០២០ ដោយផ្ដួលក្រុមភ្នំពេញក្រោន គ្រងចំណាត់ថ្នាក់លេខ៣ កាលពីថ្មីៗនេះបានបញ្ជាក់ថា កីឡាកររងពិន័យ សុទ្ធតែកីឡាករល្អៗ ដូច្នេះលោកពិតជាមានការបារម្ភ។ តែយ៉ាងណាលោកនៅតែមានសុទិដ្ឋិនិយមលើកូនក្រុម នឹងខិតខំប្រឹងអស់ពីសមត្ថភាព ដើម្បីសម្រេចគោលដៅក្នុងការប្រកួតលីគទី២ ផង និងប្រជែងកៅអីលីគកំពូលផង។

លោកបន្ដថា «ក្នុងលីគទី២ ចំពោះការទទួលនូវការពិន័យ ពួកយើងមានការបារម្ភច្រើន ដោយសារកីឡាករយើងមួយចំនួន សុទ្ធតែកីឡាករដែលល្អៗជាប់ការពិន័យ។ អញ្ចឹងយើងបារម្ភដែរ។ តែអ្វីដែលយើងត្រូវធ្វើ គឺត្រូវហ្វឹកហាត់ ទោះគាត់ជាប់ ៥នាក់ ក៏នៅមានអ្នកផ្សេងអាចធ្វើបានដូចពួកគាត់អញ្ចឹង។ ខ្ញុំជឿជាក់ពួកគេអាចធ្វើបានល្អ ដូចការប្រកួតពានរង្វាន់សម្ដេចតេជោ ហ៊ុន សែន (វគ្គដណ្ដើមចំណាត់ថ្នាក់លេខ៣) ដែរ»។

សមាជិកក្រុមព្រៃវែង ដែលរងពិន័យ ក្រោយមានការប៉ះទង្គិច រហូតបង្កជាហិង្សា កាលពីចុងខែតុលា រួមមានកីឡាករ គី រីណា, វុធ តុលា, ពៅ ចាន់ថេត និងលីន តារាដេវិទ្យ ត្រូវបានសហព័ន្ធព្យួរមិនឲ្យប្រកួតរយៈពេល ៣ខែ និងពិន័យជាប្រាក់ ២៥ម៉ឺនរៀល លើកំហុសចូលរួមជម្លោះវាយតប និងកីឡាករ វឿន វ៉ា រងពិន័យព្យួរ ២ប្រកួតពីបទជនបង្កហេតុ។ តែសមាជិកក្រុម U21 ភ្នំពេញក្រោន ២រូប ក៏ត្រូវបានសហព័ន្ធពិន័យព្យួរការប្រកួត ៣ខែ និងពិន័យជាប្រាក់ ២៥ម៉ឺនរៀលដែរ រួមមានអ្នកចាំទី គឹម ចាន់ធី និងកីឡាករ មន រួង។

ក្រឡេកមកចាប់អារម្មណ៍ការប្រកួតលីគទី២ ឆ្នាំ២០២០ វិញ នឹងចាប់ផ្ដើមការប្រកួតបន្ដ ក្រោយព្រឹត្តិការណ៍ ៣វិច្ឆិកា នាចុងសប្ដាហ៍នេះ ប៉ុន្ដែមានឈានដល់ការប្រកួតសប្ដាហ៍ទី៦ ក៏មានជំនួបបង្គ្រប់សប្ដាហ៍ទី៥ ចំនួន ១ប្រកួត នៅរសៀលថ្ងៃពុធនេះដែរ គឺខេត្តព្រៃវែង ត្រូវជួបក្រុមម្ចាស់ផ្ទះខេត្តកំពង់ស្ពឺ នៅទីលានវិទ្យាល័យខេត្តកំពង់ស្ពឺ នាវេលាម៉ោង ៣រសៀលនេះ៕