(ភ្នំពេញ)៖ សណ្ឋាគារ ហៃយ៉ាត់ រីជិនស៊ី ភ្នំពេញ ដែលគ្រោងនឹងដាក់ឲ្យដំណើរការដើមឆ្នាំ២០២១ខាងមុខនេះ នឹងផ្តល់ជូនបទពិសោធន៍ដ៏សម្បូរបែប និងថ្មីសន្លាងសម្រាប់ភ្ញៀវទេសចរជាតិ និងអន្តរជាតិមកពីគ្រប់តំបន់នៃសកលលោក ព្រមទាំងជាទីតាំងដ៏ស័ក្តិសមបំផុតសម្រាប់កិច្ចប្រជុំពាណិជ្ជកម្មធំៗទាំងថ្នាក់តំបន់ និងថ្នាក់អន្តរជាតិ។
សណ្ឋាគារ ហៃយ៉ាត់ រីជិនស៊ី ភ្នំពេញ ជាសណ្ឋាគារផ្កាយប្រាំ ដែលនឹងអនុញ្ញាតឲ្យភ្ញៀវអាចចាប់ផ្តើមកក់បន្ទប់ចាប់ពីថ្ងៃទី១៥ មករា ២០២១ ខាងមុខនេះ។
សណ្ឋាគារ ហៃយ៉ាត់ រីជិនស៊ី ភ្នំពេញ មានបន្ទប់ចំនួន២៤៧បន្ទប់ ភោជនីយដ្ឋានប្រណីត សាលប្រជុំដ៏ទំនើប បន្ទប់ស្ប៉ា ស្កាយបារ៍ ព្រមទាំងសេវាកម្មជាច្រើនទៀត។
Market Café & Lounge ត្រូវបានរចនាឡើងដោយអនុញ្ញាតឲ្យពន្លឺព្រះអាទិត្យចាំងចូលមកយ៉ាងគ្រប់គ្រាន់ និងមានបម្រើអាហារដ៏ឆ្ងាញ់ពិសា។ The Attic បារ៍ ដែលស្ថិតនៅជាន់ទី២ នៃវីឡាសម័យអាណានិគមបារាំង ក៏ត្រូវបានរចនាយ៉ាងល្អឯក ដោយផ្តល់ជូនបរិយាកាស នៃការច្របាច់បញ្ចូលគ្នានៃស្ថាបត្យកម្មសម័យទំនើប និងសម័យអាណានិគមបារាំង។
ភោជនីយដ្ឋាន FiveFive Rooftop & Bar ដែលស្ថិតនៅជាន់ទី១៤ អាចមើលឃើញទេសភាពដ៏ត្រកាលនៃទន្លេចតុមុខ។ Metropole Underground គឺជាបារ៍ ដែលស្ថិតនៅជាន់ក្រោមដី។
ក្រៅពីនេះ សណ្ឋាគារ ហៃយ៉ាត់ រីជិនស៊ី ភ្នំពេញ ក៏មានអាងហែលទឹក កន្លែងហាត់ប្រាណ២៤ម៉ោង និងស្បាលំដាប់ថ្នាក់ពិភពលោក Jivapita។
លើសពីនេះ ភ្ញៀវទេសចរណ៍នឹងទទួលបានបទពិសោធន៍ថ្មីៗតាមរយៈការច្របាច់បញ្ចូលនៃស្ថាបត្យកម្មចម្រុះ ដែលមានតម្លៃជាបេតិកភណ្ឌ។ សណ្ឋាគា ហៃយ៉ាត់ រីជិនស៊ី ភ្នំពេញ បានអភិរក្សវីទ្បាសម័យអាណានិគមបារាំងដោយបានកែលម្អឲ្យមានភាពរឹងមាំ ដោយរក្សាទម្រង់ និងរចនាបថដើមទាំងស្រុង ដែលនេះគឺជាផ្នែកមួយនៃការរក្សាអត្តសញ្ញាណក្នុងតំបន់។
សណ្ឋាគារ ហៃយ៉ាត់ រីជិនស៊ី ភ្នំពេញ មានទីតាំងស្ថិតនៅចំកណ្តាលសង្កាត់ពាណិជ្ជកម្ម និងវប្បធម៌នៃទីក្រុងភ្នំពេញ នៅក្បែរសារមន្ទីរជាតិ ព្រះបរមរាជវាំង សាកលវិទ្យាល័យភូមិន្ទវិចិត្រសិល្បៈ សាលវិចិត្រសិល្បៈ វាលព្រះមេរុ ផ្សាររាត្រី វត្តអារាម និងទន្លេចតុមុខ ដែលផ្តល់ ភាពងាយស្រួលដល់ភ្ញៀវជាតិ និងអន្តរជាតិក្នុងដំណើរទស្សនកិច្ចនៅទីក្រុងភ្នំពេញ៕