(ហ្សាការតា)៖ ក្រុមហ៊ុនផលិតរថយន្តអគ្គិសនីរបស់អាមេរិក Tesla នឹងបញ្ជូនគណៈប្រតិភូទៅកាន់ប្រទេសឥណ្ឌូនេស៊ីនៅខែក្រោយ ដើម្បីពិភាក្សាអំពីសក្ដានុពលនៃការវិនិយោគ ក្នុងខ្សែសង្វាក់ផលិតកម្មផ្គត់ផ្គង់រថយន្តអគ្គិសនីរបស់ខ្លួន។

យោងតាមការចេញផ្សាយរបស់សារព័ត៌មាន Reuters នៅថ្ងៃទី ១៤ ខែធ្នូ ឆ្នាំ២០២០ បានឲ្យដឹងថា រដ្ឋាភិបាលឥណ្ឌូនេស៊ី បានធ្វើការទាក់ទងទៅកាន់លោក Elon Musk ដែលជានាយកប្រតិបត្តិក្រុមហ៊ុន Tesla កាលពីចុងសប្ដាហ៍មុន ដោយក្នុងនោះឥណ្ឌូនេស៊ី បានធ្វើបទបង្ហាញអំពីសក្តានុពលសម្រាប់ទីផ្សារ Tesla ជាពិសេសគឺផលិតអាគុយសម្រាប់រថយន្តអគ្គិសនីតែម្ដង។

គួរបញ្ជាក់ផងដែរថា កន្លងមក លោក Elon Musk ធ្លាប់បាននិយាយថា លោកមានបំណងចង់ចុះកុងត្រាជាមួយក្រុមហ៊ុនផលិតអាគុយរថយន្តអគ្គិសនី ក្នុងរយៈពេលយូរ។