(អាមេរិក)៖ នៅថ្ងៃទី១៤ ខែធ្នូ ឆ្នាំ២០២០ម្សិលមិញនេះ សេវាកម្មរបស់ក្រុមហ៊ុន Google បានគាំងស្ទើពាសពេញពិភពលោក ប៉ុន្តែរហូតមកដល់ពេលនេះគឺនៅមិនទាន់ដឹងថា បញ្ហានោះមកពីមូលហេតុអ្វីនោះទេ ខណៈដែលការគាំងនេះកើតឡើងតែប៉ុន្មាន ថ្ងៃ ក្រោយប៉ុណ្ណោះនៃការគាំងកម្មវិធី Facebook Messenger និង Instagram។

តើលោកអ្នកចង់ដឹងទេថា ពេញមួយឆ្នាំ ២០២០នេះ ក្រុមហ៊ុន Google ឬសេវាកម្មរបស់ Google គាំងប៉ុន្មានដង?

យោងតាមការចេញផ្សាយនៅលើគេហទំព័រ Wikipedia បានឱ្យដឹងថា ពេញមួយឆ្នាំ ២០២០នេះ សេវាកម្មរបស់ក្រុមហ៊ុន Google បានគាំងលក្ខណៈទ្រង់ទ្រាធំៗចំនួន ៣ដង ដោយក្នុងនោះកាលពីសីហា, ខែវិច្ឆិកា និងចុងក្រោយនេះគឺកាលពីថ្ងៃទី១៤ ខែធ្នូ ម្សិល មិញនេះ។

១៖ កាលពីថ្ងៃទី២០ ខែសីហា ឆ្នាំ២០២០
តាមការបញ្ជាក់ពីក្រុមហ៊ុន Google ក៏ដូចរបាយការណ៍របស់គេហទំព័រ Downdetector បានឱ្យដឹងថា សេវាកម្មរបស់ក្រុមហ៊ុន Google នៅថ្ងៃទី២០ ខែសីហា ឆ្នាំ២០២០ បានគាំងប្រមាណជា ៦ម៉ោង នៅជុំវិញពិភពលោក ដោយនោះក្នុងនោះកម្មវិធី និងសេវាកម្មដែលជួបបញ្ហាធំជាងគេគឺ Gmail, Google Drive, Google Docs, Google Meet និង Google Voice។

ការគាំងនោះ ត្រូវបានគេរាយការណ៍មកថា បានចាប់ផ្ដើមគាំងតាំងពីម៉ោង ៦៖៣០នាទីព្រឹក (ត្រូវម៉ោង ១៖៣០នាទីរសៀល នៅ ស្រុកខ្មែរ) ដោយនៅអំឡុងពេលនេះ អ្នកប្រើប្រាស់បានរាយការណ៍មកថា ពួកគាត់មិនអាច Upload ឯកសារចូលក្នុង Gmail បាន និងអ្នកខ្លះទៀតមិនអាច Upload ចូលក្នុង Google Drive បាន។

២៖ កាលពីថ្ងៃទី១១ ខែវិច្ឆិកា ឆ្នាំ២០២០
ការគាំងសេវាកម្មរបស់ក្រុមហ៊ុន Google លើកនេះ គឺជួបបញ្ហាច្រើនជាងមុនបន្តិច ប៉ុន្តែសេវាកម្មដែលប៉ះពាល់ខ្លាំងគឺ YouTube, YouTube Music, YouTube TV, Google TV និង Google Play ។ តាមសេចក្ដីរាយការណ៍បានឱ្យដឹងថា បញ្ហាគាំងនេះ បានកើតមានឡើងនៅអំឡុងម៉ោង ៤ព្រឹក (ម៉ោង ១១ព្រឹក ស្រុកខ្មែរ) ដោយអ្នកប្រើប្រាស់គឺមិនអាចមើលវីដេអូនៅលើ YouTube បាន។

៣៖ ថ្ងៃទី១៤ ខែធ្នូ ឆ្នាំ២០២០
នៅថ្ងៃទី១៤ ខែធ្នូ ឆ្នាំ២០២០ម្សិលមិញនេះ គឺជាការគាំងក្នុងទ្រង់ទ្រាធំតែម្ដង ដោយចាប់ផ្ដើមគាំងចាប់ពីម៉ោង ១១៖៤៥ព្រឹក (ម៉ោង ៦៖៤៥នាទីល្ងាចនៅស្រុកខ្មែរ) រហូតដល់ម៉ោង ១រសៀល (ម៉ោង ៨ល្ងាចនៅស្រុកខ្មែរ) ទើបដំណើរការល្អប្រសើរឡើងវិញ។ លើក ទី៣នេះ បានបណ្ដាលឱ្យគាំងសេវាកម្មជាច្រើនដូចជា Gmail, YouTube, Google Drive, Google Docs, Google Calendar និង Google Play ៕