(កូរ៉េ)៖ Army ឬក៏អ្នកគាំទ្រក្រុមចម្រៀងបុរស BTS ជាច្រើន បានសម្តែងការមិនពេញចិត្តរបស់ពួកគេ ចំពោះផលិតកម្ម Big Hit Entertainment ដោយបានលើកឡើងថា ផលិតកម្មនេះគិតតែពីផលប្រយោជន៍ក្រុមហ៊ុន ជាពិសសគិតតែពីភាគហ៊ុន ដែលមិនគិតគូពីសិល្បករក្នុងផលិតកម្មឡើយ ពោលគឺយក BTS ដើម្បីទាញផលចំណេញ។ ខណៈថ្មីៗនេះ មានឡាន LED ជាច្រើន បានបើកចុះឡើង ដើម្បីតវ៉ា និងស្នើដល់ផលិតកម្ម Big Hit ចំពោះសកម្មភាពទាញផលចំណេញនេះ។ នេះបើតាមការចេញផ្សាយរបស់សារព័ត៌មាន allkpop នៅថ្ងៃទី១៥ ខែធ្នូ ឆ្នាំ២០២០។

រថយន្តតវ៉ាទាំងនោះ បានចង្អុលបង្ហាញថា ក្រុមហ៊ុនបានបាត់បង់មូលដ្ឋានពីមុន ហើយគិតតែពីផលចំណេញ និងតម្លៃភាគហ៊ុនប៉ុណ្ណោះ។ ក្នុងនោះអ្នកគាំទ្របានស្នើសុំ ឲ្យបញ្ឈប់ការថតរឿង «Youth» របស់ BTS ជាអចិន្ត្រៃយ៍ ខណៈអ្នកគាំទ្របង្ហាញថា ផលិតកម្ម Big Hit បានប្រើប្រាស់ប្រជាប្រិយភាពរបស់ក្រុមនេះ និងការប្រគំតន្រ្តីនានា ដើម្បីទាញផលចំណេញ។

គួរជម្រាបថា BTS ជាក្រុមចម្រៀង K-POP បុរសល្បីឈ្មោះ និងមានប្រជាប្រិយភាពមួយ មានការគាំទ្រជុំវិញពិភពលោក ខណៈចម្រៀងរបស់ពួកគេ ក្រោមចំណងជើងថា «Dynamite» បានហក់ដល់កំពូល នៃតារាងចម្រៀង Billboard របស់អាមេរិក។ ដោយសារប្រជាប្រិយភាពនេះ បានធ្វើឲ្យផលិតកម្មដែលពួកគេកំពុងជ្រកកោន ទទួលបានប្រាក់ចំណេញជាច្រើន តាមរយៈសកម្មភាពសិល្បៈនានាផ្សេងៗទៀត៕