(ភ្នំពេញ)៖ លោក រិទ្ធ ឌីកា នាយកបច្ចេកទេសក្លិបព្រះខ័នរាជស្វាយរៀង បានប្រកាសឧបត្ថម្ភ និងកៀរគថវិកាគាំទ្រដល់អ្នកលេងគុនចម្រុះកម្ពុជា ចាន់ រតនា ប្រសិនបើជើងខ្លាំងក្បាច់គុនបុរាណខ្មែររូបនេះ យកឈ្នះអ្នកប្រយុទ្ធវ័យក្មេងចិន Xie Wei ក្នុងព្រឹត្តិការណ៍ ONE: COLLISION COURSE នៅសិង្ហបុរី រាត្រីថ្ងៃសុក្រស្អែកនេះ។
អតីតអ្នកចាត់ការទូទៅក្រុមជម្រើសជាតិ U19 កម្ពុជាខាងលើបានបង្ហោះលើបណ្ដាញសង្គមថា «ស្អែកបើកីឡាករ ចាន់ រតនា ឈ្នះខ្ញុំបាទសូមជូនរង្វាន់លើកទឹកចិត្ត ១លានរៀល។ ខ្ញុំនឹងបបួលមិត្តភក្រ័្តបន្ថែមទៀត...»។ បន្ទាប់ពីឃើញសារនេះ ក៏មានអ្នកគាំទ្រវិស័យកីឡាមួយចំនួន បានប្រកាសនឹងចូលរួមឧបត្ថម្ភជាមួយលោក រិទ្ធ ឌីកា ផងដែរ។
តាមគម្រោងការប្រកួតលើសង្វៀនលំដាប់ពិភពលោកខាងលើ នឹងចាប់ផ្ដើមនាវេលាម៉ោង ៧៖៣០នាទីយប់(ម៉ោងនៅកម្ពុជា) ហើយ ចាន់ រតនា និងកីឡាករ Xie Wei នឹងជួបគ្នាមុនគេ ក្នុងចំណោម ៦ប្រកួតដែលធ្វើឡើងនៅកីឡដ្ឋាន Singapore Indoor Stadium។ ទន្ទឹមជាមួយគ្នា រតនា ក៏បានបង្ហាញពីការត្រៀមខ្លួនរួចរាល់ ដើម្បីដណ្ដើមជ័យជម្នះក្នុងការប្រកួតដ៏សំខាន់នេះ ដែរ។
គួរដឹងថា ចាន់ រតនា បានឡើងស្វៀន ONE ១០លើកមកហើយ ដោយឈ្នះ៧ និងចាញ់ ៣។ ប៉ុន្ដែ ៣ប្រកួតចុងក្រោយ កីឡាករវ័យ ៣៤ឆ្នាំរូបនេះ ធ្វើបានយ៉ាងល្អ ដោយឈ្នះជាប់ៗគ្នា រួមមានឈ្នះកីឡាករឥណ្ឌូនេស៊ី ABRO FERNANDES, Rudy Agustian និងកីឡាករគុយបា Gustavo Balart។
ចំណែកឯគូប្រជែង Xie Wei វិញទើបឡើងសង្វៀនលំដាប់ពិភពលោកនេះបាន ៦ប្រកួតប៉ុណ្ណោះ ហើយ ៥ប្រកួតដំបូង សុទ្ធតែផ្ដួលដៃគូឲ្យសន្លប់ មុនប្រកួតចុងក្រោយចាញ់ពិន្ទុបេក្ខភាពដណ្ដើមខ្សែក្រវាត់ Danny Kingad ដោយពិន្ទុកាលពីដើមឆ្នាំ២០២០ កន្លងទៅ។
កាលពីខែសីហា ២០២០ កន្លងទៅនេះ ក្រុមហ៊ុនសែលកាត បានប្រកាសភាពជាដៃគូរយុទ្ធសាស្រ្តជាមួយ ONE Championship™ (ONE) ដែលជាស្ថាប័នសារព័ត៌មានកីឡាអន្តរជាតិធំជាងគេបំផុតនៅក្នុងទ្វីបអាស៊ី។ ជាមួយគ្នានេះដែរ លោក ចាន់ រតនា ដែលជាកីឡាករឆ្នើមរបស់កម្ពុជាក៏បានប្រកាសជាទូតសុឆន្ទៈរបស់ក្រុមហ៊ុនសែលកាត។
កិច្ចព្រមព្រៀងនេះ គឺជាកិច្ចសហការដំបូងគេបង្អស់របស់ ONE នៅក្នុងប្រទេសកម្ពុជា ដោយភាគីទាំងពីរនឹងធ្វើការរួមគ្នា ដើម្បីចែករំលែកនូវសិល្បៈក្បាច់គុនចម្រុះ និងព័ត៌មានកីឡាដ៏សម្បូរបែបជាច្រើនទៀតរបស់ ONE Championship ជូនដល់អ្នកគាំទ្រនៅទូទាំងប្រទេសកម្ពុជា។
អ្នកគាំទ្រសិល្បៈក្បាច់គុនចំរុះរបស់ ONE នឹងត្រូវបានកំសាន្តជាមួយនឹងមាតិកាព័ត៌មានក្នុងស្រុក ព័ត៌មានវីដេអូខ្លីៗ ព័ត៌មានទូទៅ និងព្រឹត្តិការណ៍កីឡាសំខាន់ៗ ក៏ដូចជាបទអត្ថាធិប្បាយជុំវិញព្រឹត្តិការណ៍កីឡាផ្សេងៗជាច្រើនទៀតផងដែរ ដោយចូលទៅកាន់ Cellcard App តាយរយះតំណរ http://onelink.to/cellcardkh ។
