(ភ្នំពេញ)៖ តើគ្រប់តារាចម្រៀងល្បីៗ ដែលទទួលបានជោគជ័យក្នុងប្រទេសកម្ពុជា សុទ្ធតែមិនដែលបានឆ្លងកាត់ការបាក់ទឹកចិត្ត ឬបរាជ័យម្តងណាមែនទេ? ចង់ដឹងទេថាលោក ឆាយ វីរៈយុទ្ធ តារាចម្រៀងសំឡេង «ផ្អែម» ធ្លាប់ឆ្លងកាត់ការបរាជ័យ និងបាក់ទឹកចិត្តរហូតដល់ចង់ឈប់ពីអាជីពចម្រៀងយ៉ាងណាខ្លះ ពេលប្រឡូកក្នុងវិស័យនេះ? ហើយមកដល់បច្ចប្បន្ននេះ លោកទទួលបានជោគជ័យអ្វីខ្លះ? ហើយមានទ្រព្យសម្បត្តិអ្វីខ្លះ? ព្រមទាំងមានទម្លាប់អ្វីជាប្រចាំថ្ងៃ?
* អំពីជីវិតគ្រួសារ៖
លោក ឆាយ វីរៈយុទ្ធ (ឈ្មោះកំណើត ឆាយ ចាន់ឆោម) កើតនៅថ្ងៃទី១២ ខែកញ្ញា ឆ្នាំ១៩៨២ មានស្រុកកំណើត ភូមិពោធ ឃុំព្រែកក្របៅ ស្រុកកងមាស ខេត្តកំពុងចាម។ ក្នុងគ្រួសារមានបងប្អូន៧នាក់ ស្រី២នាក់ និងប្រុស៥នាក់ លោកជាកូនទី៦។ ឪពុកលោកឈ្មោះ ឆយ គឹមឆាយ ជាអតីតមន្ត្រីយោធា និងម្តាយជាអតីតគ្រូបង្រៀនឈ្មោះ គង់ ឡាយស៊ី។ សព្វថ្ងៃលោកមានភរិយាឈ្មោះ សែ ចាន់ឌី មានកូនស្រីម្នាក់ឈ្មោះ វីរៈយុទ្ធ អភិជាតាទេវី, អាយុជាងមួយខួប (១៣ខែ)។
*អំពីការសិក្សា៖
គម្រប់អាយុ៨ឆ្នាំកុមារ ចាន់ឆោម (ឈ្មោះកំណើត ឆាយ ចាន់ឆោម) ក្នុងឆ្នាំ១៩៩០ត្រូវបានឪពុកម្តាយបញ្ជូនឲ្យទៅរៀន នៅសាលាបឋមសិក្សាពាម រៀននៅទីនោះបាន៣ឆ្នាំ ដល់ឆ្នាំ១៩៩៣ ក៏បានប្តូរមករៀននៅសាលាបឋមសិក្សា អង្គរបាជ័យវិញ។ រៀនបានតែ១ឆ្នាំ ក៏បានផ្លាស់ទៅរស់នៅជាមួយបងស្រីនៅកំពុងធំ ហើយក៏បានចូលរៀននៅសាលាព្រះសីហនុ (ខេត្តកំពង់ធំ) បាន១ឆ្នាំប៉ុណ្ណោះ ក៏ប្តូរមករៀននៅភ្នំពេញនៅវិទ្យាល័យឥន្ទ្រទេវី រហូតដល់ប្រឡងជាប់សញ្ញាប័ត្រ មធ្យមសិក្សាទុតិយភូមិនាឆ្នាំ២០០៥។ ក្រោយបញ្ចប់មធ្យមសិក្សាទុតិយភូមិ លោកក៏បានបន្តការសិក្សានៅមហាវិទ្យាល័យ ជាតិគ្រប់គ្រងផ្នែកពាណ្ជិសាស្ត្រ តែលោករៀនបាន២ឆ្នាំ ក៏ព្យួរការសិក្សាហូតមក។ លោក ឆាយ វីរៈយុទ្ធ បានបញ្ជាក់ថា កាលនៅរៀនលោករៀនមិនពូកែទេ ដោយសារលោកតែងឆ្លៀតយកពេលសិក្សា ទៅជួយកិច្ចការងារឪពុកម្តាយ ដើម្បីទ្រទ្រង់ជីវភាពគ្រួសារ។
* អំពីប្រវិត្តិក្នុងវិស័យសិល្បៈនិងស្នាដៃ៖
ថ្វីបើកុមារ ឆាយ ចាន់ឆោម រៀនមិនសូវពូកែ និងបានពន្ទុមិនល្អតែកុមារ ឆាយ ចាន់ឆោម តែងតែត្រូវបានលោកគ្រូនិងមិត្តរួមថ្នាក់ សំណូមពរឲ្យច្រៀងក្នុងថ្នាក់ ដោយ ឆោម ច្រៀងបានពីរោះ និងក៏បានការសរសើរពីមិត្តរូមថ្នាក់ និងរួមសាលា។ ចំណូលចិត្តនិងទេពកោសល្យពីកុមារនេះហើយ ដែលញ៉ាំងឲ្យកុមារឆោម មិនលះបង់ទេពកោសល្យនេះ រួមនឹងការលើកទឹកចិត្តពីឪពុកម្តាយផងនោះ និងក្រោយពេញរូបរាងជាយុវវ័យ និងបានមករស់នៅ និងបន្តការសិក្សានៅភ្នំពេញផង យុវជន ឆោម ក៏ឆ្លៀតពេលល្ងាចៗពិការសិក្សា សុំគេច្រៀងតាមបៀហ្គាឌេន ដែលពេលនោះ ទទួលបានប្រាក់តាមការឲ្យ និងការយោគយល់ពីម្ចាស់ហាង។ តែមិនបានច្រើននោះទេ គឺប្រហែល ៣០ដុល្លារបុណ្ណោះក្នុងមួយខែ តែបានការអាណិត និងចូលចិត្តពីភ្ញៀវអ្នកទៅកំសាន្ត និងស្តាប់តែងឲ្យប្រាប់ឧបត្ថម្ភ (លុយធីប)ខ្លះៗ។ នៅឆ្នាំ២០០៣ ក្រោយពីការតស៊ូ និងស្របពេលមានការណែនាំខ្លួនលោកឲ្យស្គាល់ អ្នកគ្រប់គ្រងផលិតកម្ម «រស្មីស្ទឹងសែន» លោកក៏មានឱកាសថត CD ពេលនោះ។
វ៉ុលដំបូងរបស់លោក ដែលយើងនៅចាំបាននោះមានបទ «ត្រឹម១នាទី»។ តែតាមការឲ្យដឹងពីលោក ឆាយ វីរៈយុទ្ធ ថា «វ៉ុលដំបូងននេះគួរតែសប្បាយចិត្ត តែបែរជាធ្វើឲ្យលោកបាក់ទឹកចិត្តទៅវិញ ព្រោះថាវ៉ុលដំបូងនេះ មិនសូវទាន់មានអ្នកគាំទ្រឡើយ»។ អនុស្សាវរីយនេះលោកក៏ធ្លាប់ សរសេរលើទំព័រហ្វេសប៊ុកផ្ទាល់ខ្លួនម្តង ពីប្រវត្តិវិវឌ្ឍខ្លួនចូលសិល្បៈដំបូងថា «ដំបូងខ្ញុំបាក់ទឹកចិត្ត និងគ្មានកម្លាំងចិត្តបន្តការច្រៀងទៀតទេ នៅពេលបទចម្រៀងចេញហើយ មិនសូវមានអ្នកគាំទ្រ។ ខ្ញុំចង់ឈប់ពីអាជីពជាអ្នកចម្រៀងនេះ»។ ប៉ុន្តែក្រោយពីលោកឪពុកនិងអ្នកម្ដាយចេះតែជំរុញលើកទឹកចិត្ត និងឲ្យព្យាយាមថែមទៀត លោកក៏បន្តការតស៊ូទៀត។
ក្រោយមក លោក ឆាយ វីរៈយុទ្ធ ក៏បានផ្លាស់ប្ដូរមកផលិតកម្ម Blue Diamond ក្រោយផលិតកម្ម «រស្មីស្ទឹងសែន» បិទទ្វារ ព្រោះមិនអាចប្រឈមនឹងការលួចកូពីជាខ្លាំងនាពេលនោះ។ ក្នុងផលិតកម្ម Blue Diamond វ៉ុលដំបូងរបស់លោក មានចំណងជើងថា «កិច្ចសន្យាស្នេហ៍» វ៉ុលដំបូងនេះ ទទួលបានការពេញនិយម ពីស្រទាប់យុវវ័យ និងអ្នកស្តាប់ក៏ដូចអ្នកនិយម karaoke។ កេរ្តិ៍ឈ្មោះរបស់លោក ក៏ត្រូវគេស្គាល់បន្តបន្ទាប់មក។ ជ្រកក្រោមផលិតកម្ម Blue Diamond បាន១ឆ្នាំ ក៏បានប្តូរមកផលិតកម្ម M វិញ។ ដោយធ្វើជាតារាចម្រៀងក្នុងផលិតកម្មទាំង២នេះ មិនមានកិច្ចសន្យារយៈពេលវែងទេ ជាហេតុនាំឲ្យ លោក ឆាយ វីរៈយុទ្ធ ប្តូរមកផលិតកម្ម សាន់ដេ វិញក្រោយបង្ហាញវត្តមានក្នុងផលិតកម្ម M បាន២ឆ្នាំ។ កំឡុងឆ្នាំ២០១២ រហូតមកដល់បច្ចុប្បន្ន នៅក្នុងផលិតកម្ម សាន់ដេ លោក ឆាយ វីរៈយុទ្ធ បានបន្សល់ស្នាដៃចម្រៀងរាប់រយបទ ដែលក្នុងនោះមានដូចជា «ទឹកលុយសម្លាប់ទឹកចិត្តខ្ញុំ» «បងពីមុនឆ្កួតបាត់ហើយ» «សង្សាលួចលាក់» «លុយបងមិនដល់គេ» បទទាំងនេះជាបទពេញនិយម នៃយុវវ័យក៏ដូចអ្នកនិយម karaoke។ ស្ថិតក្រោមផលិតកម្ម សាន់ដេ ជិតដប់ឆ្នាំឆ្លងកាត់ការសម្តែង MV រាប់រយបទ លោកក៏បានសម្តែងភាពយន្ត២រឿងផងដែរ គឺរឿង «វិញ្ញាណបិសាចជញ្ជក់ឈាម» និងរឿង «ព្រាយក្បាលប្រាំបី»។
មកដល់ឆ្នាំ២០២០នេះ គឺរយៈពេល១៨ឆ្នាំហើយ ក្រៅពីស្នាដៃខាងលើ លោក ឆាយ វីរៈយុទ្ធ ក៏ទទួលបានការទាក់ទាញ ពីប្រជាជនខ្មែរនៅក្រៅស្រុកផងដែរ ដោយលោកត្រូវបានការអញ្ជើញ ចេញទៅសម្តែងជារឿយៗ នៅក្រៅប្រទេសដូចជា ប្រទេសបារាំង អាមេរិក កាណាដា ជាដើម និងទទួបានការគាំទ្រយ៉ាងខ្លាំងផងដែរ។
* អំពីជីវិតស្នេហា៖
ក្នុងភាពជាតារាចម្រៀងលំដាប់ប្រទេសមួយរូបដែរ តែពុំដែលលេចឮស្នេហាគួរជាការចាប់អារម្មណ៍អ្វីឡើយ ពេលលេចឮគឺលោកត្រៀមចូលរោងការតែម្តង គឺនាឆ្នាំ២០១៧។ លោកបានចូលរោងការជាមួយ កូនក្រមុំរបស់លោកមានឈ្មោះ សែ ចាន់ឌី ជាកូនស្រីឈ្មួញស្រូវអង្ករដ៏ល្បីមួយក្នុងខេត្តកំពង់ចាម។ ពិធីមង្គលការនោះមានភ្ញៀវអ្នកជំនួញ និងអ្នកសិល្បៈគ្រប់ផលិតកម្មចូលរួមយ៉ាងកុះករ។ បច្ចុប្បន្នលោកមានកូនស្រីម្នាក់ មានអាយុជាង១ឆ្នាំ ជាទីស្រឡាញ់របស់គ្រួសារលោក និងលោកតាលោកយាយទាំងសងខាង។
* អំពីជំនួញក្រៅពីសិល្បៈ៖
ចំពោះជំនួញក្រៅពីសិល្បៈវិញ ក្នុងដៃលោកកំពុងគ្រប់គ្រង ក្រុមហ៊ុនអាជីវកម្មស្រូវអង្ករមានឈ្មោះថា «ស្តេចអង្ករ» មានដេប៉ូចែកចាយចំនួន៨សាខា ក្នុងប្រទេសកម្ពុជា។ ក្រៅពីផ្គត់ផ្គង់តំរូវការសម្រាប់ប្រជាជនក្នុងប្រទេស ក្រុមហ៊ុន «ស្តេចអង្ករ» ក៏បាននាំចេញទៅក្រៅប្រទេស តែនៅមានលក្ខណៈទ្រង់ទ្រាយតូចនៅឡើយ ដោយលោកបាននិងកំពុងរៀបចំបន្ថែមម៉ាស៊ីនកិនស្រូវ និងម៉ាស៊ីនសម្ងួតស្រូវ។ ក្រៅពីជំនួញស្រូវអង្ករខាងលើនេះ លោកនៅមានអាជីវកម្ម អចលនទ្រព្យ (ជាដីឡូតិ៍ ផ្ទះល្បែង ផ្ទះវីឡា) ជាច្រើនកន្លែងផ្សេងទៀតដូចជា នៅភ្នំបាសិទ្ធ, ព្រះសីហនុ, កំពង់ឆ្នាំង, មណ្ឌលគិរី, ភ្នំពេញ។ តាមការស្វែងរក និងការឲ្យដឹងពីលោក ឆាយ វីរៈយុទ្ធ ថាគម្រោងអាជីវកម្មអចលនទ្រព្យជា (ដីឡូតិ៍, ផ្ទះល្វែង, ផ្ទះវីឡា) ដំណើរការបណ្តើរៗ។
* អំពីទម្លាប់ និងចំណង់ចំណូលចិត្ត៖
ថ្វីបើជារាល់ថ្ងៃ លោករវល់នឹងមុខជំនួញក៏ពិតមែន តែលោកថា លោកមិនចោលសិល្បៈចម្រៀងឡើយ លោកនៅតែរក្សាពេលវេលាមួយផ្នែកធំ សម្រាប់សិល្បៈចម្រៀង ទម្លាប់លោកត្រូវហាត់ច្រៀងហាត់រាំជាប្រចាំ ក្រៅពីនោះលោកហាត់ប្រាណនៅផ្ទះ និងទម្លាប់មួយទៀតគឺអានសៀវភៅ។ ការអានសឿវភៅបានផ្តល់ដល់លោក នូវចំណេះដឹងច្រើនក្នុងវិស័យជំនួញ និងចំណេះដឹងទូទៅ។ ចំពោះចំណីអាហារវិញ លោកញ៉ាំបានគ្រប់មុខ ទាំងម្ហូបខ្មែរ ចិន យួន និងអឺរ៉ុប តែចំពោះគ្រឿងស្រវឹងតិចតួចបំផុត និងញ៉ាំទឹកសុទ្ធច្រើន។ លោកទម្លាប់ទៅដល់មុន៥នាទី គ្រប់ការងារណាត់ជួបភ្ញៀវ និងការងារសិល្បៈ។ លោកមានការរួសរាយ ជាមួយបុគ្គលិកការងារ និងអ្នកគាំទ្រលោក។ សព្វថ្ងៃលោកជិះរថយន្តទំនើបប្រភេទ SUV ឆ្នាំ២០១៩ ដែលមានតម្លៃជិត១០ម៉ឺនដុល្លារ និងផ្ទះរស់នៅសព្វថ្ងៃផ្ទះ២ល្វែង នៅក្នុងតំបន់កាំកូស៊ីធី ដែលជាតំបន់ដ៏មានសក្តានុពល៕
