(អាមេរិក)៖ ក្រុមហ៊ុនផ្តល់សេវាកម្មផ្នែកខ្សែភាពយន្តគឺ Netflix បានប្រកាសឲ្យដឹងថា ខ្លួននឹងព្យាយាមធ្វើឲ្យទស្សនិកជនសប្បាយរីករាយក្នុងការទស្សនាខ្សែភាពយន្តក្នុងឆ្នាំ២០២១នេះ ដោយគ្រោងនឹងបញ្ចេញរឿងថ្មីៗ ជារៀងរាល់សប្តាហ៍ សម្រាប់រយៈពេល១២ខែ នៃឆ្នាំ២០២១។ នេះបើតាមការចេញផ្សាយរបស់សារព័ត៌មាន CNN នៅថ្ងៃទី១៣ ខែមករា ឆ្នាំ២០២១។

ខ្សែភាពយន្តខ្លះ កំពុងស្ថិតនៅក្នុងតារាងចាក់ផ្សាយដូចជារឿង «The Hearder They Fall» ដែលចូលរួមសម្តែងដោយតារាល្បីៗដូចជា Regina King, Idris Elba និង Jonathan Majors។ ទន្ទឹមគ្នានេះ តារាប្រុស Lin-Manuel Miranda និង Halle Berry នឹងចាប់ផ្តើមសម្តែងជាផ្លូវការជាមួយនឹង «Tick,Tick…Boom» និង «Bruised»។

ក្រៅពីនេះនៅមានសិល្បករកំពូលៗជាច្រើនទៀតដូចជា Jennifer Lawrence, Leonardo DiCaprio, Meryl Streep, Gal Gadot, Dwayne Johnson និង Ryen Reynolds។ ចំណែកឯតារាស្រី Ariana Grande នឹងចូលរួមសម្តែងជាមួយនឹង Lawrence, DiCaprio, Streep និង Timothee Chalamet ក្នុងរឿង «Don’t Look Up»។

គួរជម្រាបថា ការសម្រេចបញ្ចេញគម្រោងចាក់ខ្សែភាពយន្តពីសំណាក់ Netflix តាមរយៈការផ្សាយតាមអនឡាញនៅពេលនេះ គឺដោយសារតែគ្រប់បណ្តារោងភាពយន្តទាំងអស់មិនអាចចាក់បញ្ចាំងដោយផ្ទាល់បាន ដោយសារជំងឺរាតត្បាតកូវីត១៩ ដែលបានបង្ខំឲ្យរោងកុននានាត្រូវបានបិទទ្វារ៕