(កំពត)៖ រោងចក្រស៊ីម៉ងត៍ ជីប ម៉ុង អ៊ិនស៊ី ស៊ីមេន បានរៀបចំ និងគាំទ្រព្រឹត្តិការណ៍ ទិវាសម្អាតបរិស្ថានក្រោមពាក្យស្លោក៖ «តោះ យើងនាំគ្នាសម្អាត!» ព្រោះនេះជាបញ្ហាទៅថ្ងៃក្រោយ ដោយផ្តោតសំខាន់លើការប្រមូលសំរាមប្លាស្ទិកតាមកន្លែងសាធារណៈនៅក្បែរផ្សារទូកមាស ស្រុកបន្ទាយមាស ខេត្ដកំពត។
កម្មវិធីសម្អាតអនាម័យបរិស្ថានប្រព្រឹត្ដទៅក្រោមការដឹកនាំរបស់ លោក មួង នឿន អភិបាលនៃគណៈអភិបាលស្រុកបន្ទាយមាស និងមានការចូលរួមពីមន្រ្តីរាជការស្រុកជាច្រើនរូបពីគ្រប់ជាន់ថ្នាក់ និងបុគ្គលិកក្រុមហ៊ុន ជីប ម៉ុង អ៊ិនស៊ី ស៊ីមេន និងយុវជនជាច្រើនរូបទៀត ដោយចាប់ផ្ដើមពីម៉ោង ៨ព្រឹក និងបញ្ចប់ទៅវិញនៅម៉ោង ១១ព្រឹក នៅថ្ងៃទី២៨ ខែមករា ឆ្នាំ២០២១។
គោលបំណងចម្បងនៃព្រឹត្តិការណ៍នេះ គឺចង់បំផុសស្មារតីស្រឡាញ់ ថែរក្សា និង ការពារបរិស្ថានស្អាត មិនត្រឹមតែសម្រាប់អ្នកចូលរួមដែលភាគច្រើនជាយុវជនកំពុងបម្រើការងារក្នុងអង្គភាពរដ្ឋ និង ក្រុមហ៊ុនប៉ុណ្ណោះនោះទេ ប៉ុន្តែក៏ជាសារសម្រាប់សាធារណៈជនទូទៅដែលបានឃើញព្រឹត្តិការណ៍នេះដោយផ្ទាល់ ឬតាមបណ្តាញប្រព័ន្ធផ្សព្វផ្សាយនានា ឲ្យចេះស្រឡាញ់ ថែរក្សា និង ការពារបរិស្ថាន ជាពិសេសបំផុតនោះ គឺការវេចខ្ចប់ និង ការទុកដាក់កាកសំណល់ឲ្យបានត្រឹមត្រូវ។
សំណល់ប្លាស្ទិកនៅក្នុងបរិស្ថាន បានក្លាយជាក្តីកង្វល់មិនត្រឹមតែនៅប្រទេសកម្ពុជាប៉ុណ្ណោះទេ ប៉ុន្តែវាក៏ជាក្តីកង្វល់សម្រាប់ពិភពលោកទាំងមូល ហើយអ្វីដែលអាចធ្វើឲ្យប្រសើរឡើង គឺផ្តើមចេញពីខ្លួនយើងម្នាក់ៗចេះស្រឡាញ់បរិស្ថាន សម្អាត ចេះវេចខ្ចប់ ទុកដាក់ និងអ្វីសំខាន់បំផុតនោះគឺការប្រើប្រាស់ប្លាស្ទិកឲ្យកាន់តែតិចតាមដែលអាចធ្វើទៅបាន ទើបបរិស្ថានបានប្រសើរឡើង។
ក្រុមហ៊ុន ជីប ម៉ុង អ៊ិនស៊ី ស៊ីមេន តែងតែគិតគួរដល់ការកាត់បន្ថយសំណល់រឹង ឬសំណល់រោងចក្រ ដែលជាផ្នែកមួយនាំឲ្យប៉ះពាល់ដល់បរិស្ថាន តាមរយៈការវិនិយោគរោងចក្រដុតកម្ទេចសំណល់ឧស្សាហកម្មតម្លៃ៤លានដុល្លារ និង មានសមត្ថភាពដុតកម្ទេចសំណល់ប្រមាណ ៧០០០ តោនក្នុង១ខែ និងបានសម្ពោធដាក់ឲ្យប្រើប្រាស់កាលពីថ្ងៃទី ៥ ខែធ្នូ ឆ្នាំ២០១៩កន្លងទៅនេះ ក្រោមវត្តមាន ឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន។
តាមការស្រាវជ្រាវលើកទី១ របស់អង្គការ Fauna & Flora International (FFI) នាឆ្នាំ២០១៩ បានរកឃើញថា ជាមធ្យមក្នុង ១ថ្ងៃ ប្រជាជនកម្ពុជានៅតាមតំបន់ឆ្នេរ ប្រើប្រាស់ថង់ប្លាស្ទិកជាមធ្យមចំនួន ១២ ក្នុង ១គ្រួសារ។ នៅពេលដែលអ្នកប្រើប្រាស់ប្លាស្ទិកកាន់តែច្រើន អ្នកនឹងកាន់តែទទួលផលប៉ះពាល់ដល់អ្នកប្រើប្រាស់វិញកាន់តែអាក្រក់ដែរ។
ដោយឡែកប្រជាជននៅទីក្រុងភ្នំពេញ ប្រើប្រាស់ថង់ប្លាស្ទិកប្រមាណ១០លានថង់ក្នុងមួយថ្ងៃដែលស្មើនឹង ២/៣ នៃចំនួនប្រជាជនកម្ពុជាសរុប។ ការប្រើប្រាស់យ៉ាងច្រើន និង កង្វះនៃការទុកដាក់ឲ្យបានត្រឹមត្រូវ ជាក្តីកង្វល់កាន់តែខ្លាំងឡើងៗដល់បរិស្ថាន។
ថង់ប្លាស្ទិកអាចត្រូវការពេលពី១០ទៅ២០ឆ្នាំ ដើម្បីពុកផុយ ចំណែកឯប្រអប់ស្នោរខ្ចប់អាហារវិញ អាចត្រូវការច្រើនឆ្នាំជាងនេះរាប់សិបដងដើម្បីរលាយ ហើយមួយចំនួនទៀតមិនរលាយនោះទេ។ ប្លាស្ទិកទាំងនេះជាប្រភពចំបងនៃការបំពុល ទឹក ដី និង ខ្យល់។
មានសំណួរជាច្រើនតែងតែចោទសួរថា តើមូលហេតុអ្វីបានជាយើងត្រូវខ្វាយខ្វល់ពីប្លាស្ទិក?
*ប្លាស្ទិកបំពុលបរិស្ថានយ៉ាងខ្លាំងរួមមាន ទឹក ដី និង ខ្យល់, សំរាមប្លាស្ទិកអាចសម្លាប់ជីវិតសត្វលើគោក និងក្នុងទឹក ជាពិសេសសត្វសមុទ្រ ប្លាស្ទិកបង្កផលប៉ះពាល់យ៉ាងខ្លាំងដល់សុខភាពមនុស្ស ការចំណាយថវិកាច្រើនក្នុងការសម្អាតប្លាស្ទិក ប្លាស្ទិកមួយចំនួនមិនងាយរលួយ និង មិនអាចកែច្នៃឡើងវិញបាននោះទេ ប៉ះពាល់ដល់សេដ្ឋកិច្ចជាតិជាខ្លាំងនៅពេលដែល ទឹក ដី និង ខ្យល់ ត្រូវបានបំពុលដោយប្លាស្ទិក៕
