(ក្រុងឡុងដ៍)៖ ព្រះអម្ចាស់ William របស់អង់គ្លេសបានសរសេរបង្ហោះនៅបណ្តាញសង្គមរបស់ព្រះអង្គ សុំឲ្យមានការបញ្ឈប់ករណីរើសអើងពូជសាសន៍ក្នុងកីឡាបាល់ទាត់ជាបន្ទាន់ ក្រោយពេលហេតុការណ៍នេះ ហាក់ដូចកក្រើកឡើងវិញម្តងទៀតនាពេលថ្មីៗនេះ។ នេះបើយោងតាមការចេញផ្សាយដោយព័ត៌មាន BBC នៅថ្ងៃចន្ទ ទី០១ ខែកុម្ភៈ ឆ្នាំ២០២១។

William ដែលក៏ជាប្រធាន FA ១រូបផងនោះបានថ្លែងថា «ការរើសអើងពូជសាសន៍មានទាំងក្នុងទីលាន នៅកៅអីអ្នកគាំទ្រ និងនៅតាមបណ្តាញសង្គមផងនោះ ជាសកម្មភាពដែលត្រូវបញ្ឈប់ជាបន្ទាន់។ ក្នុងន័យនេះយើងចង់បង្កើតបរិយាកាសសប្បាយរីករាយ ដោយគ្មានការគំរាមកំហែង និងបែងចែកអ្វីឡើយ»។

ការលើកឡើងបែបនេះ នៅពេលព្រះអង្គបានមើលឃើញថា កីឡាករខ្សែប្រយុទ្ធ Marcus Rashford របស់ក្លិបបិសាចក្រហម Manchester United បានក្លាយជាជនរងគ្រោះចុងក្រោយគេនៃការរើសអើងពូជសាសន៍ (Racist abuse) នៅក្នុងប្រកួតដែលបញ្ចប់ទៅដោយលទ្ធផលស្មើគ្នា ០-០ ទល់នឹងម្ចាស់ផ្ទះកាំភ្លើងធំ Arsenal ក្នុង Premier League កាលពីរាត្រីថ្ងៃសៅរ៍សប្តាហ៍មុន។

ខ្សែប្រយុទ្ធពាក់លេខ១០ សញ្ជាតិអង់គ្លេស Rashford ដែលទើបទទួលបានបណ្ណសរសើរពីសកម្មភាពមនុស្សធម៌ទៅលើក្មេងៗនាពេលថ្មីៗផងនោះ បានទទួលបានសារម៉ាក់ងាយជាច្រើននៅបណ្តាញ Instagram កាលពីរាត្រីថ្ងៃសៅរ៍ ក្រោយចប់ការប្រកួត។

ថ្មីៗនេះដែរ Facebook ដែលមានបុត្រសម្ព័ន្ធ Instagram ក៏បានចេញសេចក្តីថ្លែងការណ៍ពាក់ព័ន្ធទៅនឹងការរើសអើសពូជសាសន៍ទៅលើ Rashford ផងដែរ ហើយក្រុមហ៊ុនមួយនេះ ក៏បានលុបសកម្មភាព និង Comments និងបន្តស៊ើបអង្កេតចំពោះករណីដែលបានកើតនេះដែរ៕