(មេនឆេស្ទើ)៖ ក្រុមបាល់ទាត់បិសាចក្រហម Manchester United បានលត់គូប្រជែង Southampton រហូតដល់ទៅ ៩ទល់នឹងសូន្យ នៃការប្រកួតលីគកំពូលអង់គ្លេស Premier League នៅរាត្រីថ្ងៃអង្គារ ទី០២ ខែកុម្ភៈ ឆ្នាំ២០២១។

គ្រាន់តែរយៈពេល ៤៥នាទីដំបូងនៃវគ្គទី១ នៅកីឡដ្ឋាន Old Trafford ដែលស្ថិតក្នុងទីក្រុង Manchester ក្រុមរបស់លោក Ole Gunnar Solskjaer អាចបំប៉ោងសំណាញ់ទីគូប្រកួតដល់ទៅ ៤គ្រាប់ពីការធ្វើបានសម្រេចដោយកីឡាករ ៤រូបផ្សេងគ្នាផងដែររួមមានខ្សែការពារ Wan-Bissaka ខ្សែប្រយុទ្ធ Rashford និង Cavani និង own goal របស់ខ្សែការពារ Bednarek របស់ Southampton។

តែយ៉ាងណាក្រុមដែលលេងស្មើ ០-០ ទល់នឹង Arsenal និងចាញ់ Sheffield United ក្នុងដី ២-១ សម្រាប់ ២ប្រកួតចុងក្រោយលីគរបស់ពួកគេមិនបង្អង់សម្រុកឡើយទៅលើក្រុមរបស់លោក Ralph Hasenhuttl ពោលគឺបន្តរកបានដល់ទៅ ៥គ្រាប់ទៀតពីសំណាក់កីឡាករ Martial ២គ្រាប់ និង Mctominay, Bruno និង James ម្នាក់ ១គ្រាប់ផងដែរ ដែលជាជ័យជម្នះឈ្នះច្រើនគ្រាប់លើកដំបូង គិតចាប់តាំងពីបានបំបាក់ក្រុម Ipswich ក្នុងលទ្ធផល ៩-០ ដូចគ្នាកាលឆ្នាំ១៩៩៥។

Saint ត្រូវបានបិសាចក្រហមសម្រុកដូចទឹកបាក់ទំនប់ នៅក្រោយពេលកីឡាករខ្សែការពារ Alexandre Jankewitz របស់ខ្លួនត្រូវបានពិន័យកាតក្រហមតាំងពីដើមតង់ ហើយនេះក៏ជាលទ្ធផលចាញ់ស្ពឹកមុខលើកទី២ ផងដែរនៅ Premier League គិតចាប់តាំងពីបានចាញ់ Leicester City ក្នុងលទ្ធផលនេះដែរកាលឆ្នាំ២០១៩ កន្លងទៅ។

៣ពិន្ទុបន្ថែមនេះដែរ ធ្វើឲ្យ Manchester United មាន ៤៤ពិន្ទុឈរនៅលេខ២ បណ្តោះអាសន្នស្មើក្រុមកំពូលតារាង Manchester City ផងដែរនៅពេលដែលបិសាចក្រហមលេងបាន ២២ប្រកួត គ្រាដែលក្រុមមេឃខៀវនៅសល់ ២ប្រកួតក្នុងដៃដែលទើបលេងបាន ២០ប្រកួត៕