(ភ្នំពេញ)៖ ក្រុមហ៊ុន ហ្គ្រេន រ៉ូយ៉ាល់ ហោ្គល & រីសត បានរៀបចំកម្មវីធីជួបជុំសមាជិកក្លឹបអ្នកកីឡាវាយកូនហ្គោល ហ្គ្រេនភ្នំពេញឆ្នាំ២០២១។
កម្មវិធីនេះ ក្រោមអធិបតីភាពរបស់សម្តេចពិជ័យសេនា ទៀ បាញ់ ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ និងជាប្រធានសហព័ន្ធកីឡាវាយកូនហ្គោលកម្ពុជា ព្រមទាំងភ្ញៀវកិត្តិយសដែលជាសមាជិកក្លឹបវាយកូនហ្គោលហ្គ្រេន ភ្នំពេញជាច្រើនទៀត កាលពីចុងសប្តាហ៍នេះ។
លោក អាឡាំង ម៉ាទីន នាយកចាត់ការទូទៅនៃហ្គ្រេន រ៉ូយ៉ាល់ ហ្គោល & រីសត មានប្រសាសន៍ថា ក្រុមហ៊ុន ហ្គ្រេន រ៉ូយ៉ាល់ ហ្គោល & រីសត កំពុងកែលម្អមុខមាត់នៃទីលានវាយកូនហ្គោល ហ្គ្រេន ភ្នំពេញ ឲ្យក្លាយជាក្លឹបវាយកូនហ្គោលលេខ១នៅតំបន់អាស៊ីអាគ្នេយ៍ ដើម្បីផ្តល់ជូនបទពិសោធន៍លេងហ្គោលដ៏ល្អឥតខ្ចោះ។
លោក អាឡាំង ម៉ាទីន បានបន្ថែមថា៖ «ហ្គ្រេន រ៉ូយ៉ាល់ ហ្គោល & រីសត កំពុងកែលម្អក្លឹបវាយកូនហ្គោល ហ្គ្រេន ភ្នំពេញ ដូចជាការទិញឡានអគ្គិសនីថ្មីៗបន្ថែមចំនួន៩០គ្រឿង ទិញម៉ាស៊ីន និងឧបករណ៍ថែរក្សាទីលានទំនើបៗ កែលម្អក្លឹបហៅស៍ឲ្យទំនើប និងវិនិយោគយ៉ាងច្រើនលើបច្ចេកវិទ្យា ដើម្បីផ្តល់ជូនបទពិសោធន៍ដ៏សម្បូរបែប»។
ក្នុងកម្មវីធីជួបជុំសមាជិកក្លឹបអ្នកកីឡាវាយកូនហ្គោល ហ្គ្រេនភ្នំពេញឆ្នាំ២០២១ ក៏មានការប្រកួតវាយកូនហ្គោល រវាងសមាជិកក្លិប និងសមាជិកក្លិបជាលក្ខណៈមិត្តភាពផងដែរ។
ហ្គ្រេន រ៉ូយ៉ាល់ ហោ្គល & រីសត ដែលជាពាណិជ្ជកម្មមួយរបស់ ជីប ម៉ុង នឹងបម្រើអតិថិជន ទាំងសេវាកម្ម និងគុណភាពឲ្យល្អឥតខ្ចោះ ដែលជាគុណតម្លៃរបស់ ជីប ម៉ុង ក្នុងនាមជាក្រុមហ៊ុនឈានមុខគេក្នុងទីផ្សារកម្ពុជា៤ទសវត្សរ៍មកហើយ៕