(អាមេរិក)៖ របាយការណ៍ថ្មីមួយបានលើកឡើងថា កិច្ចព្រមព្រៀងក្នុងការទិញ-លក់អាជីវកម្មរបស់ TikTok នៅសហរដ្ឋអាមេរិក ឱ្យទៅ ក្រុមហ៊ុន Oracle និង Walmart ប្រហែលជាត្រូវបានពន្យារពេល ឬលុបចោលតែម្ដង ខណៈដែលនៅពេលនេះលោក Joe Biden ប្រធានាធិបតី សហរដ្ឋអាមេរិកថ្មី កំពុងតែត្រួតពិនិត្យទៅលើ គោលនយោបាយចិនរបស់លោកដូណាល់ ត្រាំ។

យោងតាមការចេញផ្សាយរបស់ BBC នៅថ្ងៃទី១១ ខែកុម្ភៈ ឆ្នាំ២០២១ បានឱ្យដឹងថា បទបញ្ជារបស់អតីតប្រធានាធិបតីសហរដ្ឋអាមេរិក លោក ដូណាល់ ត្រាំ បានកំណត់ឱ្យក្រុមហ៊ុន ByteDance ដែលជាមេធំរបស់ TikTok លក់អាជីវកម្ម TikTok នៅសហរដ្ឋអាមេរិក ឱ្យទៅ ក្រុមហ៊ុនអាមេរិក និងបានកំណត់ពេលត្រឹមថ្ងៃទី១២ ខែវិច្ឆិកា ឆ្នាំ២០២០ ប៉ុន្តែមកដល់ពេលនេះ វាបានហួសពេលកំណត់ ព្រមទាំងពុំមាន ដំណឹងអ្វីទាក់ទងនឹងបទបញ្ជានេះទៀតផង។

ក្រុមហ៊ុន Oracle និង Walmart បានពិភាក្សាជាមួយនឹងក្រុមហ៊ុន ByteDance តាំងពីខែកញ្ញា ដើម្បីឈានដល់កិច្ចព្រមព្រៀងទិញ-លក់ ដើម្បីគេចផុសពីការហាមឃាត់នៅអាមេរិក និងដើម្បីពង្រីកវិសាលភាពឱ្យកាន់តែខ្លាំង ប៉ុន្តែក្រោយមកកិច្ចព្រមព្រៀងមួយនេះហាក់ត្រូវបាន កប់ បាត់ក្នុងដី ក្រោយពេលដែលលោក ដូណាល់ ត្រាំ ចាញ់ឆ្នោត។

កាសែត Wall Street Journal និង Reuters បានរាយការណ៍ជាថ្មីថា កិច្ចព្រមព្រៀងទិញ-លក់នេះ អាចនឹងត្រូវលុបចោលទាំងស្រុង ហើយ ក៏គ្មានក្រុមហ៊ុនណាមួយមកពាក់ព័ន្ធដែរ ប៉ុន្តែការលុបចោលនេះត្រូវបានគេមើលឃើញថាអាចបណ្ដាលមកពីប្រទេសចិន និង អាមេរិក មានទំនាក់ទំនងនឹងគ្នាឡើងវិញ បន្ទាប់ពីលោក Joe Biden ឡើងកាន់តំណែង។

គួរបញ្ជាក់ផងដែរថា បច្ចុប្បន្នអ្នកប្រើប្រាស់ TikTok នៅទូទាំងពិភពលោកមានចំនួន ៨០០លាននាក់ ដោយក្នុងនោះ នៅសហរដ្ឋអាមេរិក មានចំនួនរហូតដល់ ១០០លាននាក់៕