(ម៉ាឌ្រីដ)៖ លោក Zinedine Zidane គ្រូបង្វឹកក្លិប Real Madrid បានបញ្ជាក់ថា រូបលោកមិនមានភាពប្រាកដប្រជាឡើយ ចំពោះអនាគតរបស់កីឡាករខ្សែការពារ Sergio Ramos ក្នុងការបន្តកិច្ចសន្យាលេងឲ្យក្លិបអធិរាជសទៀតនោះទេ។

កិច្ចសន្យាចាស់របស់ប្រធានក្រុមរូបនេះ នឹងផុតកំណត់នៅទឹកដី Santiago Bernabeu នៅក្រោយបញ្ចប់រដូវកាលឆ្នាំ២០២០-២០២១ មួយនេះ។

លោកថា «ខ្ញុំសូមប្រាប់តាមត្រង់ចុះ ខ្ញុំមិនប្រាកដថា នឹងមានអ្វីឡើងចំពោះ Ramos នោះទេ។ សម្រាប់ខ្ញុំ ខ្ញុំពិតជាចង់ឲ្យរូបគេបន្តលេងនៅទីនេះណាស់ ខណៈ Ramos ជាកីឡាករល្អមួយរូបនៅពេលខ្ញុំឈានជើងមកកាន់ក្លិបនេះតាំងពីដំបូង»។

ជាការពិត ខ្សែការពារកណ្តាលវ័យ ៣៤ឆ្នាំ Sergio Ramos បានឈ្នះពាន UEFA Champions League ៤ដងជាមួយ Real Madrid បន្ថែមលើពាន FIFA Club World Cup ៤ដងដូចគ្នា និងពាន La Liga ៥ដងថែមទៀតក្នុងរយៈពេល ១៦ឆ្នាំមក ក្រោយផ្ទេរចេញពីក្លិបគូប្រជែង Sevilla នាឆ្នាំ២០០៥ មក៕