(ប៉េកាំង)៖ ចិនជាទីផ្សាររថយន្តមួយដែលធំបន្ទាប់ពីទីផ្សារអឺរ៉ុប ជាពិសេសបច្ចុប្បន្ន បានក្លាយជាទីផ្សារធំលំដាប់ទី២នៃរថយន្តអគ្គិសនី ដោយ ថ្មីៗនេះត្រូវបានគេរាយការណ៍មកថា នៅក្នុងឆ្នាំ២០២១នេះ មានរថយន្តប្រមាណ ២៦.៣លានគ្រឿងនឹងត្រូវបានលក់នៅក្នុងប្រទេសចិន។ នេះបើយោងតាមការចេញផ្សាយរបស់សារព័ត៌មាន DigiTimes នៅថ្ងៃទី២៩ ខែមីនា ឆ្នាំ២០២១។

សារព័ត៌មាន DigiTimes បានចេញផ្សាយដោយដកស្រង់នូវរបាយការណ៍របស់សមាគមផលិតរថយន្តចិន (CAAM) ថា សម្រាប់ឆ្នាំ ២០២១ នេះ នឹងមានរថយន្តប្រមាណ ២៦.៣លានគ្រឿង នឹងត្រូវបានលក់នៅក្នុងប្រទេសចិន ដោយកើនឡើងប្រមាណ ៣.៨ភាគរយ បើធៀប នឹងឆ្នាំ២០២០។

នៅក្នុងរបាយការណ៍ក៏បានបង្ហាញឱ្យដឹងថា ជំងឺរាតត្បាតកូរ៉ូណា បានធ្វើឱ្យប៉ះពាល់ដល់ការលក់រថយន្តនៅក្នុងប្រទេសចិនខ្លាំងបំផុត នៅ ៣ត្រីមាសក្នុងឆ្នាំ២០២០ ដោយនៅត្រីមាសទី៤ បានល្អប្រសើរឡើងវិញបន្តិច ហើយនៅដើមឆ្នាំ២០២១នេះ ក៏នៅតែល្អប្រសើរផងដែរ បើធៀប នឹងទៅនឹងឆ្នាំ២០២០។

CAAM បានបញ្ជាក់ថា នៅក្នុងឆ្នាំ២០២០ ការលក់រថយន្តដឹកអ្នកដំណើរនៅក្នុងប្រទេសចិនបានធ្លាក់ចុះ ៦ភាគរយ ប៉ុន្តែសម្រាប់ ការលក់ រថយន្ត ក្រុង និងរថយន្តដឹកទំនិញបានកើនឡើង ១៨.៧ភាគរយ ដែលជំរុញឱ្យទីផ្សាររថយន្តរបស់ចិន នៅតែមានភាពល្អប្រសើរ បើទោះបី មិនខ្លាំងដូចឆ្នាំមុនៗក្ដី៕