(ភ្នំពេញ)៖ ក្រុមជម្រើសជាតិកីឡាសីដក់កម្ពុជា បាននឹងកំពុងពង្រឹងការហ្វឹកហាត់លើគ្រប់វិញ្ញាសា ទាំងបុរស និងនារី ដើម្បីត្រៀមចូលរួមការប្រកួតកីឡាស៊ីហ្គេម លើកទី៣១ នៅប្រទេសវៀតណាមនាចុងឆ្នាំ២០២១។ នេះបើតាមការបញ្ជាក់របស់កញ្ញា សួង ចាន់តូរ៉ាទី អគ្គលេខាធិការស្តីទីសហព័ន្ធកីឡាសីដក់ និងឈិនឡូនកម្ពុជា។

កញ្ញា សួង ចាន់តូរ៉ាទី បានបញ្ជាក់ថា វៀតណាមបានកំណត់វិញ្ញាសាចំនួន៨ លើប្រភេទកីឡាសីដក់ ក្នុងព្រឹត្តិការណ៍ស៊ីហ្គេមឆ្នាំនេះ រួមមានវិញ្ញាសាបុរស៤ និងនារី៤ ហើយសហព័ន្ធបានត្រៀមកីឡាករ-កីឡាការិនី និងជំរុញការហ្វឹកហាត់គ្រប់វិញ្ញាសា ប៉ុន្ដែត្រង់ក្រុមសីដក់កម្ពុជាអាចចូលរួមប៉ុន្មានវិញ្ញាសា នៅមិនទាន់ដឹងនោះទេ ដោយរង់ចាំការកំណត់របស់ម្ចាស់ផ្ទះ និងការសម្រេចរបស់ក្រសួងអប់រំជាមុនសិន។

យ៉ាងណាមិញ អំឡុងពេលរីករាលដាលខ្លាំងនៃជំងឺកូវីដ-១៩ ក៏ដូចជាការអនុវត្តវិធានការបិទខ្ទប់របស់រាជរដ្ឋាភិបាលកម្ពុជាបច្ចុប្បន្ន សហព័ន្ធបានយកចិត្តទុកដាក់ និងជំរុញឲ្យកីឡាករ-កីឡាការិនីជម្រើសជាតិទាំងអស់ធ្វើការហ្វឹកហាត់តាម Online នៅតាមផ្ទះរៀងៗខ្លួន ដើម្បីពង្រឹងសមត្ថភាពគ្រប់វិញ្ញាសា ត្រៀមឆ្ពោះទៅប្រកួតប្រជែង និងដណ្ដើមមេដាយជូនជាតិក្នុងព្រឹត្តិការណ៍កីឡាប្រចាំតំបន់អាស៊ាន ២ឆ្នាំម្ដងនេះ។

គួរដឹងថា សីដក់ គឺជាប្រភេទកីឡាដ៏មានសក្តានុពលមួយរបស់កម្ពុជា ក្នុងចំណោមកីឡាសក្តានុពលផ្សេងទៀតដែលធ្លាប់ដណ្តើមបានមេដាយមាស ប្រាក់ និងសំរឹទ្ធ ក្នុងព្រឹត្តិការណ៍ស៊ីហ្គេមជាបន្តបន្ទាប់។ ជាក់ស្ដែងក្នុងការប្រកួតកីឡាស៊ីហ្គេមលើកចុងក្រោយ នៅប្រទេសហ្វីលីពីនកាលពីឆ្នាំ២០១៩ កន្លងទៅ ក្រុមសីដក់ជម្រើសជាតិកម្ពុជា ក៏ដណ្ដើមបានមេដាយប្រាក់ ១គ្រឿងលើវិញ្ញាសាក្រុមផងដែរ៕