(ភ្នំពេញ)៖ ខ្សែបម្រើក្លិបបាល់ទាត់ខេត្តព្រៃវែង អាត អូនទូច បានសម្ដែងការសប្បាយចិត្តជាខ្លាំង បន្ទាប់ពីបានបង្ហាញខ្លួនលើកដំបូងក្នុងក្របខណ្ឌលីគកំពូលកម្ពុជា និងរកបាន ២គ្រាប់ម្នាក់ឯងក្នុងជ័យជម្នះ ៦-០ លើក្រុមភ្ញៀវសូលទីឡូអង្គរនៅល្ងាចថ្ងៃទី១៦ ខែឧសភា ឆ្នាំ២០២១។
អតីតយុវជនសាលាបាល់ទាត់ជាតិបាទីរូបនេះបានបញ្ជាក់ថា «ខ្ញុំសប្បាយចិត្តដែលបានជួយក្រុមទទួលបាន ៣ពិន្ទុ និងសប្បាយចិត្ត ដែលបានលេងប្រកួតដំបូង ហើយរកបាន ២គ្រាប់ទៀត។ ជារួមខ្ញុំសប្បាយចិត្តខ្លាំង ព្រោះខ្ញុំមិនធ្លាប់បានលេងលីគកំពូលកម្ពុជាទេ ហើយពេលបានលេងដំបូង ខ្ញុំក៏រកបានគ្រាប់បាល់ថែមទៀត»។
យ៉ាងណាក្ដី អូនទូច បន្ដថា ខ្លួន និងមិត្តរួមក្រុម ត្រូវការខិតខំប្រឹងប្រែងបន្ថែមទៀត ដើម្បីជួយក្រុមក៏ដូចជាស្វែងរកលទ្ធផលល្អនាប្រកួតបន្ទាប់ ដ្បិតក្រុមខ្លួននៅក្មេងខ្ចី និងខ្វះខាតបទពិសោធសម្រាប់ការប្រកួតប្រជែងក្នុងក្របខណ្ឌលីគកំពូលកម្ពុជានៅឡើយ។
កីឡាករវ័យ ១៩ឆ្នាំ និង ៣ខែរូបនេះបានបន្ថែមថា «សម្រាប់ពួកយើង ការលេង គឺយើងហ្វឹកហាត់ជាមួយគ្នារាល់ថ្ងៃ គឺយល់ចិត្តគ្នា តែភាគច្រើនកីឡាករយើងខ្វះបទពិសោធលេងលីគកំពូល តែបើនិយាយពីកម្លាំង ឬបច្ចេកទេស គឺយើងអាចប្រកួតប្រជែងបានមិនមានបញ្ហាចោទទេ»។
គួរបញ្ជាក់ថា បច្ចុប្បន្នខេត្តព្រៃវែង កំពុងឈរលេខរៀងទី៧ បណ្ដោះអាសន្ន ដោយរកបាន ៤ពិន្ទុក្នុងដៃ បន្ទាប់ពីឆ្លងកាត់ ៣ប្រកួត ឈ្នះ១ ស្មើ១ និងចាញ់១ តែ ២ប្រកួតដំបូង អាត អូនតូច មិនបានលេងនោះទេ ពេលក្រុមចំណូលថ្មីនេះលេងស្មើអង្គរថាយហ្គឺរ ១-១ ក្នុងដី និងចាញ់ក្រុមម្ចាស់ផ្ទះគិរីវង់ ៣-០៕
