(អង់គ្លេស)៖ ក្រៅពីជក់ចិត្តក្នុងការទស្សនាគូពិសេស នៃការប្រកួតពានអឺរ៉ុប Euro ២០២០ រវាងក្រុមតោកំណាចអង់គ្លេស ប៉ះជាមួយឥន្ទ្រីដែកអាល្លីម៉ង់ កាលពីរាត្រីយប់មិញហើយនោះ មហាជនហាក់មានការចាប់អារម្មណ៍យ៉ាងខ្លាំង ពេលឃើញសិល្បករល្បីៗឈ្មោះពីររូបអង្គុយជិត និងជជែកគ្នា អំឡុងពេលទស្សនាការប្រកួតរវាងគូខាងលើ គឺតារាចម្រៀង Ed Sheeran និងកីឡាករចូលនិវត្តន៍ និងជាតារាសម្តែង David Beckham។

ត្បិតកែវភ្នែករបស់មនុស្សរាប់លាននាក់ផ្តោតសំខាន់ លើសកម្មភាពប្រកួតរបស់កីឡាករទាំងពីរក្រុមខាងលើក្តី តែនៅពេលកាមេរ៉ាចាប់ចំបុគ្គលល្បីពីររូប គឺ Ed Sheeran និង David Beckham ដែលកំពុងអង្គុយទស្សនាជិតគ្នានោះ ក៏បង្កជាការចាប់អារម្មណ៍ និងភ្ញាក់ផ្អើលមិនស្ទើរនោះដែរ សម្រាប់មហាជនជាមួយវត្តមានរបស់អ្នកទាំងពីរ ត្បិតពួកគេមើលទៅហាក់កំពុងជជែកគ្នា និងជក់ចិត្តក្នុងការទស្សនា មិនខុសពីមហាជនរាប់ម៉ឺននាក់ឡើយ។

នេះជាការចាប់អារម្មណ៍របស់មហាជន ក្រោយការប្រកួតបានបញ្ចប់ ដោយនៅទីបំផុតតោកំណាចអង់គ្លេស អាចកែប្រែប្រវត្តិសាស្រ្តបានវិញហើយ នៅពេលយកឈ្នះអាល្លឺម៉ង់ក្នុងលទ្ធផលផ្លូវការ ២-០ ពីក្នុងការប្រកួតនៃកម្មវិធីធំៗ ក្រោយពេលរង់ចាំអស់រយៈពេល ៥៥ឆ្នាំមកនេះ។ អង់គ្លេស តែងតែចុកឈាមពេលប៉ះឥន្រ្ទីដែកអាល្លឺម៉ង់ ក្នុងពានអឺរ៉ុប Euro នេះ និង FIFA World Cup ជាដើម គិតចាប់តាំងពីក្រោយពេលពួកគេឈ្នះជើងឯកពានរង្វាន់បាល់ទាត់ពិភពលោក កាលឆ្នាំ១៩៦៦ មក និងឆ្លងមិនផុតវគ្គ ៨ក្រុមចុងក្រោយឡើយ នៅពេលប៉ះអាល្លឺម៉ង់ម្ដងៗ៕