(ក្រុងឡុងដ៍)៖ ក្លិបបាល់ទាត់ស្ថិតក្នុងលីគ Premier League របស់អង់គ្លេស Crystal Palace បានតែងតាំងលោក Patrick Vieira ជាគ្រូបង្វឹកថ្មីជា ដែលលោកបានព្រមព្រៀងដឹកនាំរយៈពេល ៣ឆ្នាំ ដោយចូលជំនួសកន្លែងរបស់លោក Hodgson ដែលបានលាឈប់កាលពីថ្ងៃទី១៨ ខែឧសភា ឆ្នាំ២០២១។

បរុសវ័យ ៤៥ឆ្នាំជាអតីតប្រធានក្រុមកាំភ្លើងធំ Arsenal លើកពាន Premier League Gold (មាស) លោក Patrick Vieira បានសម្រេចចិត្តធ្វើការជាមួយក្រុម Crystal Palace រយៈពេល ៣ឆ្នាំដែលក្លិបនេះបានបញ្ចប់ត្រឹមលេខរៀងទី១៤ កាលពីរដូវកាលមុនស្ថិតក្រោមការដឹកនាំរបស់លោក Roy Hodgson ខណៈលោក Patrick Vieira បានលើកឡើងថា «ខ្ញុំពិតជាមានរំភើបណាស់ដែលបានវិលត្រឡប់មកកាន់លីគអង់គ្លេសវិញ»។

គួររំលឹកផងថា លោក Patrick Vieira សញ្ជាតិបារាំង ដើមកំណើតសេណេហ្គាល់ ជាអតីតកីឡាករឆ្នើមដែលបានចូលរួមជាមួយក្រុមធំៗមាន Arsenal និង Manchester City រួមជាមួយក្រុមនៅអ៉ីតាលី Juventus, Inter Milan និង AC Milan ខណៈអាជីពជាគ្រូបង្វឹក លោកធ្លាប់ដឹកនាំក្រុម New York City FC របស់អាមេរិក និងក្រុម Nice របស់លីគបារាំង និងជាអតីតកីឡាករដែលធ្លាប់ឈ្នះពាន ៣ដងជាមួយ Man City និង Arsenal ដែលធ្លាប់លើកបាន FIFA World Cup និងពាន European Championship ជាមួយមាន់កគបារាំងថែមទៀតផង៕