(អឺរ៉ុប)៖ កីឡាករដែលរកបានគ្រាប់ស៊ុតនាំមុខគេនៅពានអឺរ៉ុប Euro 2020 បណ្តោះអាសន្ននេះមានកីឡាករ ខ្សែប្រយុទ្ធជួរមុខ Patrick Schick របស់ក្រុមសាធារណរដ្ឋឆេក និង Cristiano Ronaldo របស់ក្រុមព័រទុយហ្គាល់សុទ្ធតែហាលអាវអស់ហើយ ខណៈអ្នកដែលកំពុងតែមានឱកាសឈ្នះស្បែកជើងមាស ដូចជា Harry Kane ជាមួយមិត្តរួមក្រុម Raheem Sterling នៃក្រុមជម្រើសជាតិអង់គ្លេសសុទ្ធតែរកបាន ៣គ្រាប់ដូចគ្នា។

បច្ចុប្បន្នកីឡាករដែលបាននាំក្រុមជម្រើសជាតិដាណឺម៉ាក ឡើងវគ្គ ៤ក្រុម Euro 2020 នេះ គឺខ្សែប្រយុទ្ធ Kasper Dolberg ក៏កំពុងនាំមុខគេផងដែរដោយរកបាន ៣គ្រាប់ ខណៈដែលក្រុមបានឡើងមកវគ្គ ១/៤ ជាមួយអ៉ីតាលី, អង់គ្លេស និងអេស្ប៉ាញ។

ស្របពេលកីឡាករអ៉ីតាលី មាន ៤រូបដូចជា Lorenzo Insigne, Pessina, Immobile និង Locatelli ជាមួយកីឡារកអេស្ប៉ាញ ៣រូបមាន Morata, Sarabia, Feran Torres កំពុងរកបាន ២គ្រាប់ផងដែរដោយក្រុមទាំងពីត្រូវជួបគ្នានៅវគ្គ ៤ក្រុម Euro 2020 ខណៈអង់គ្លេស ជូបដាណឺម៉ាក ដែលជាជំនួបធ្វើឲ្យកីឡាករព្យាយាមស្វែងរកគ្រាប់ស៊ុត ដើម្បីប្រជែងពានស្បែកជើងមាស Euro 2020 លើកទី១៦ នេះ។

គួររំលឹកផងថា កាលពី Euro 2016 កីឡាករសញ្ជាតិបារាំង Antoine Griezmann រកបាន ៦គ្រាប់ច្រើនជាងគេ ឈ្នះពានស្បែកជើងមាស ខណៈកីឡាករដែលស៊ុតបានច្រើនជាងគេនៅពានអឺរ៉ុបនេះ គឺខ្សែប្រយុទ្ធ Cristiano Ronaldo មានដល់ទៅ ១៤គ្រាប់ក្នុងប្រវត្តិសាស្ត្រពាននេះ៕