(ប៉ារីស)៖ ក្រោយសំណើលើកទី១ ចំនួន ១៦០លានអឺរ៉ូ (ឬ១៨៨លានដុល្លារអាមេរិក) របស់ក្លិបយក្សអេស្ប៉ាញ Real Madrid ក្នុងការទិញខ្សែប្រយុទ្ធសញ្ជាតិ Kylian Mbappe ពីក្លិបអ្នកមានបារាំង Paris Saint-Germain ត្រូវទាត់ចោល Real Madrid បានដាក់សំណើជាថ្មី កើនដល់ ១៨០លានអឺរ៉ូ (ឬ២១១លានដុល្លារអាមេរិក)។

តាមការផ្សាយដោយសារព័ត៌មាន The Athletic នៅថ្ងៃសុក្រ ទី២៧ ខែសីហា ឆ្នាំ២០២១ បានបញ្ជាក់យ៉ាងដូច្នេះថា៖ «ក្លិប Real Madrid បានដាក់សំណើលើកទី២ ដែលមានតម្លៃ ១៨០លានអឺរ៉ូ សម្រាប់ទិញ Mbappe ពីក្លិប PSG ហើយឥឡូវនេះ ក្លិបទាំងពីរបានភ្ជាប់ទំនាក់ទំនង ក្នុងការបើកកិច្ចចរចា ជុំវិញការផ្ទេរចេញ។ យ៉ាងនេះក្តី ពួកគេមិនទាន់ឈានដល់កិច្ចព្រមព្រៀងជាផ្លូវការនោះឡើយ»។

លោក Leonardo នាយកផ្នែកកីឡា កាលពីថ្ងៃពុធ បាននិយាយថា Mbappe ចង់ចាកចេញពីក្លិប។ អនាគតកីឡាករវ័យ ២២ឆ្នាំ កំពុងស្ថិតក្នុងការដាក់ដេញថ្លៃ ដែលមានពេលតិចជាង ១សប្តាហ៍ រហូតដល់ថ្ងៃបិទបញ្ចប់ទីផ្សារដោះដូរកីឡាករ។

PSG បានបដិសេធសំណើចំនួន ១៦០លានអឺរ៉ូ របស់ក្លិបអេស្ប៉ាញម្តងហើយ។ ទោះបីជាយ៉ាងណាក៏ដោយ សំណើតម្លៃ ១៨០លានអឺរ៉ូ អាចនឹងទាក់ទាញឲ្យក្លិបបារាំង ចូលមកលើតុចរចា ខណៈដែលពួកគេកំពុងចង់បានតម្លៃខ្ពស់ជាងសំណើថ្មីនេះក្តី។

ប៉ុន្តែ PSG ធ្លាប់បានប្រកាសថា នឹងព្រមលក់ខ្សែប្រយុទ្ធ Kilian Mbappe ឲ្យទៅ Real Madrid លុះត្រាតែតម្លៃ ២២០លានអឺរ៉ូ (ឬ២៥៨លានដុល្លារអាមេរិក)។ លោក Leonardo បានបង្ហាញរឿងជាច្រើន រួមទាំងបង្ហើបថា ខ្សែប្រយុទ្ធសញ្ជាតិបារាំង អាចនឹងត្រូវលក់ចេញ បើសិនជាមានលក្ខខណ្ឌដ៏ល្អ។ នេះមានន័យថា តម្លៃដែលសមរម្យ ត្រូវតែលើសពី ១៦០លានអឺរ៉ូ ដែលដាក់សំណើដោយ Real Madrid។

នាយកផ្នែកកីឡា របស់ PSG បានសង្កត់ធ្ងន់ថា កីឡាករដែលបានជួយឲ្យបារាំងឈ្នះពាន World Cup វ័យ ២២ឆ្នាំ បានចុះកិច្ចសន្យាលេងឲ្យ PSG កាលពីឆ្នាំ២០១៧ ជាមួយតម្លៃផ្ទេរជាង ១៩៣លានអឺរ៉ូ ពីក្លិប Monaco។ ដើម្បីស្រង់ដើម និងមានប្រាក់ចំណេញផងនោះ PSG ចង់បាន ២២០លានអឺរ៉ូ ក្នុងការលក់គេ នៅរដូវក្តៅនេះ។

បើតាមការផ្សាយដោយ Le Parisien ជាមួយតម្លៃខាងលើ មានន័យថា ជាតម្លៃកំណត់ត្រាក្នុងនាមជាកីឡាករ ដែលមានថ្លៃផ្ទេរខ្ពស់ជាងគេលំដាប់ទី២ តាមពីក្រោយខ្សែបម្រើសញ្ជាតិប្រេស៉ីល Neymar ដែលត្រូវបាន PSG ទិញពី Barcelona រហូតដល់ទៅ ២២២លានអឺរ៉ូ កាលពីឆ្នាំ២០១៧។

សម្រាប់ Mbappe គឺបដិសេធក្នុងការបន្តកិច្ចសន្យាជាមួយ PSG គ្រាដែលកិច្ចសន្យាចាស់របស់គាត់ នឹងផុតកំណត់នៅខែមិថុនា ឆ្នាំ២០២២។ PSG ចង់បានគាត់ឲ្យស្នាក់នៅបន្តទៀត ប៉ុន្តែក្តីស្រមៃរបស់ខ្សែប្រយុទ្ធវ័យក្មេងចង់លេងឲ្យ Real Madrid។

Mbappe បានរកគ្រាប់បាល់ ១៣៣គ្រាប់ក្នុងការចូលលេងបាន ១៧៤ដងសម្រាប់ក្លិប PSG ហើយក៏បានឈ្នះពាន Ligue 1 ចំនួន ៣ដង ខណៈពាន French Cups ក៏ឈ្នះបាន ៣ដងដូចគ្នា៕