(ភ្នំពេញ)៖ បុរីភ្នំពេញថ្មី បានប្រារព្ធពិធីក្រុងពាលីបុកគ្រឹះសាងសង់ និងបើកលក់គម្រោងទី១៤ របស់ខ្លួន គឺគម្រោង «រ៉េឌានផាក ឬ Radiant Park» ជាផ្លូវការហើយ នៅព្រឹកថ្ងៃទី២៩ ខែសីហា ឆ្នាំ២០២១ នេះ ក្រោមវត្តមានលោកឧកញ៉ា ប៊ុន ហៃ អគ្គនាយកក្រុមហ៊ុនបុរីភ្នំពេញថ្មី និងលោកជំទាវ ។ គម្រោងថ្មីនេះ មានទីតាំងស្ថិតនៅលើផ្លូវក្រវាត់ក្រុងទី២ (ផ្លូវ៦០ម៉ែត្រ) ដែលជាតំបន់ដ៏មានសក្ដានុពល នៅភូមិប្រកា សង្កាត់ព្រៃស ខណ្ឌដង្កោ រាជធានីភ្នំពេញ ។
លោក ជា ស៊ីមុយ ប្រធានក្រុមផ្នែកលក់បុរីភ្នំពេញថ្មី បានបញ្ជាក់ថា គម្រោងថ្មីនេះ សាងសង់ឡើងនៅតំបន់ដ៏មានសក្ដានុពល ដោយមានគម្រោងធំៗជាច្រើន ពិសេសស្ថិតលើផ្លូវក្រវាត់ក្រុងទី២ ដែលកំពុងមានការអភិវឌ្ឍខ្លាំងលើគ្រប់វិស័យ ពិសេសវិស័យលំនៅឋាន ហើយទីតាំងគម្រោង «រ៉េឌានផាក» ផ្ទាល់ គឺងាយស្រួលក្នុងការធ្វើដំណើរចេញ-ចូលក្រុង និងអាចធ្វើដំណើរទៅផ្លូវជាតិលេខ២ លេខ៣ ឬផ្លូវជាតិលេខ៤ ជាមួយផ្លូវធំៗដ៏ច្រើនខ្វាត់ខ្វែងទៀតផង ។
លោករំពឹងថា គម្រោងថ្មីនេះ នឹងទទួលបានការគាំទ្រច្រើនពីអតិថិជន មិនចាញ់គម្រោងមុនៗឡើយ ទោះបីស្ថិតក្នុងបរិបទកូវីដ-១៩ ក៏ដោយ ព្រោះអតិថិជនរបស់ខ្លួន ភាគច្រើនគឺទិញសម្រាប់ស្នាក់នៅ និងជឿជាក់លើគុណភាពបុរី ជាក់ស្ដែងមុនដំណើរការបុកគ្រឹះសាងសង់ និងលក់ផ្លូវការថ្ងៃនេះ បុរីបានបើកលក់ក្រៅផ្លូវការប្រហែល ១សប្ដាហ៍ ហើយរហូតមកទល់ថ្ងៃទី២៩ ខែសីហានេះ មានអតិថិជនបានកក់ទិញជាង ២០% ឬប្រមាណ ៧០ផ្ទះហើយ នៃចំនួនផ្ទះសរុបជិត ៣០០ផ្ទះ ។
ក្នុងឱកាសបើកលក់ផ្លូវការគម្រោង «រ៉េឌានផាក» នេះដែរ បុរីភ្នំពេញថ្មី នឹងមានលក់បញ្ចុះតម្លៃពិសេសរហូតដល់ ៥,០០០ដុល្លារ បូកបន្ថែមការបញ្ចុះតម្លៃ ៣% ថែមទៀតផង ។ មិនតែប៉ុណ្ណោះ ដើម្បីសម្រួលអតិថិជន ក្នុងបរិបទកូវីដ-១៩ បុរីក៏បានសម្រួលនូវការលក់ជាមួយលក្ខខណ្ឌជាច្រើនផងដែរ ទាំងការបង់រំលោះ បង់ដំណាក់កាល និងបង់ផ្ដាច់ជាដើម ។ អ្វីដែលពិសេស គឺមានតម្លៃសមរម្យ ដែលអតិថិជននឹងទទួលបានឱកាសចំណេញច្រើន នៅពេលចង់លក់ចេញវិញនាថ្ងៃអនាគត ។
សូមបញ្ជាក់ថា គម្រោងទី១៤ របស់បុរីភ្នំពេញថ្មីខាងលើ នឹងសាងសង់លើផ្ទៃដីជាង ៧ហិចតា ដែលមានប្រភេទផ្ទះល្វែង និងវីឡាសរុប ២៩៧ផ្ទះ ហើយមានតម្លៃចាប់ពី ២១ម៉ឺនដុល្លារឡើងទៅ ។ គម្រោងលំនៅឋានស្ដង់ដារអឺរ៉ុបនេះ សាងសង់ឡើងប្រកបដោយគុណភាព សុវត្ថិភាព សោភ័ណភាព និងមានផាកសុខភាពខ្ពស់ ពិសេស «រ៉េឌានផាក» គឺជាគម្រោងដំបូង ដែលបុរីនឹងសាងសង់គ្រប់ផ្លូវក្នុងបុរី ដោយអ៊ុតកៅស៊ូទៀតផង ៕
