(ប៉ារីស)៖ កីឡាករ Predrag Rajkovic អ្នកចាំទីក្លិប Reims បានស្នើសុំកីឡាករ Lionel Messi ខ្សែប្រយុទ្ធក្លិប PSG ក្នុងការថតរូបជាមួយកូនប្រុសរបស់ខ្លួន ក្រោយបញ្ចប់ការប្រកួតរវាងក្រុមទាំងពីរ សម្រាប់សប្តាហ៍ទី៤ ក្នុងក្របខណ្ឌពានកំពូលបារាំង Ligue 1 ។ នេះបើតាមការចេញផ្សាយដោយសារព័ត៌មាន Dailymail នៅថ្ងៃចន្ទ ទី៣០ ខែសីហា ឆ្នាំ២០២១។

ប្រធានក្រុមជម្រើសជាតិអាហ្សង់ទីន វ័យ ៣៤ឆ្នាំ បានយល់ព្រមក្នុងការថតរូប ដោយការពរកូនរបស់ Rajkovic ។ បើមើលទៅ កូនតូចរបស់អ្នកចាំទីរូបនេះ ហាក់មិនចាប់អារម្មណ៍អ្វីទេ ប៉ុន្តែ Messi ផ្តល់ស្នាមញញឹមយ៉ាងស្រស់សម្រាប់រូបថត ស្របពេលចូលទីលានប្រកួតលើកដំបូង។

សូមជម្រាបថា ខ្សែប្រយុទ្ធចំណូលថ្មី Lionel Messi បានចូលលេង ១ប្រកួតដំបូងរបស់ខ្លួន ក្នុងក្លិបថ្មី Paris Saint-Germain នៅពេលយកឈ្នះក្រុមម្ចាស់ផ្ទះ Reims ដោយលទ្ធផល ២-០ នៅរាត្រីឆ្លងចូលថ្ងៃចន្ទ ទី៣០ ខែសីហា ឆ្នាំ២០២១ (ម៉ោងនៅកម្ពុជា)។

នេះជាការរកបាន ៣ពិន្ទុជាលើកទី៤ នៃការចាប់ផ្តើម Ligue 1 រដូវកាលថ្មីឆ្នាំ២០២១-២០២២ ជាមួយនឹងវត្តមានប្រធានក្រុម FC Barcelona លក្ខណៈ free transfer នាដើមខែសីហានេះ ក្រោមកិច្ចសន្យា ២ឆ្នាំនៅកីឡដ្ឋាន Parc des Princes។

Messi ត្រូវបានអ្នកចាត់ការទូទៅ Mauricio Pochettino ដាក់ឲ្យចូលលេងជំនួស Neymar នៅនាទី៦៦ នៅពេលដែល PSG បានបើកការនាំមុខ ២គ្រាប់ទៅហើយនោះ ពីការធ្វើបានសម្រេចដោយកីឡាករ Kylian Mbappe។

Messi បានពាក់អាវលេខ៣០ ក្នុងការលេងឲ្យក្លិបទី២ ក្នុងអាជីពបាល់ទាត់របស់គេ បន្ទាប់ពីលេងឲ្យក្លិបអេស្ប៉ាញ FC Barcelona តាំងពីគេមានអាយុជាង ១០ឆ្នាំមកម្ល៉េះជាមួយនឹងការឈ្នះពានឯកត្តជន Ballon d’Or បាន ៦ដងច្រើនជាងគេ និងកំពុងកាន់កំណត់ត្រាស៊ុតបាន ៦៧២គ្រាប់ពីការចូលលេងបាន ៧៧៨ប្រកួតច្រើនជាងគេផងដែរ៕