(មេនឆេស្ទើ)៖ ទីបំផុត ក្លិបបិសាចក្រហម Manchester United បានប្រកាសជាផ្លូវការក្នុងការចុះហត្ថលេខាទិញយកខ្សែប្រយុទ្ធ Cristiano Ronaldo ពីក្លិបសេះបង្កង់ Juventus។ នេះបើតាមការចុះផ្សាយដោយសារព័ត៌មាន Sky នៅថ្ងៃអង្គារ ទី៣១ ខែសីហា ឆ្នាំ២០២១។

បើតាមវេបសាយរបស់ក្លិបបិសាចក្រហម បានបញ្ជាក់យ៉ាងដូច្នេះ៖ «Manchester United មានក្តីសោមនស្សរីករាយ ក្នុងការបញ្ជាក់ជាផ្លូវការ ជុំវិញការចុះហត្ថលេខាយក Ronaldo មកវិញជាមួយកិច្ចសន្យា ២ឆ្នាំ និងអាចបន្ត ១ឆ្នាំទៀតបាន»។

Man Utd នៅថ្ងៃសុក្រ ទី២៧ ខែសីហាសប្តាហ៍មុនបានប្រកាសថា ពួកគេបានឈានដល់កិច្ចព្រមព្រៀងជាមួយក្លិបសេះបង្កង់ Juventus ដើម្បីចុះហត្ថលេខានាំយកខ្សែប្រយុទ្ធឆ្នើម Cristiano Ronaldo មកកាន់ក្លិបចាស់នៅក្របខណ្ឌ Premier League វិញ។

Man Utd មិនបានបញ្ជាក់ពីតម្លៃនៃការទិញ Ronaldo ទេ ប៉ុន្តែបើតាមសារព័ត៌មាន Sky បញ្ជាក់ថា ក្លិបដែលមានមូលដ្ឋាននៅអង់គ្លេស នឹងចំណាយប្រាក់ប្រមាណ ១៥លានអឺរ៉ូ (១២.៨៧លានផោន) បូកថែមថ្លៃផ្តាច់កិច្ចសន្យា ៨លានអឺរ៉ូ (៦.៨៦លានផោន) សម្រាប់កីឡាករសញ្ជាតិព័រទុយហ្កាល់ ដែលត្រូវពិនិត្យសុខភាពនៅទីក្រុង Lisbon ប្រមាណ ១សប្តាហ៍។

សូមជម្រាបថា ក្រោយចាកចេញរយៈពេល ១២ឆ្នាំ Manchester United បានចុះកិច្ចសន្យាទិញម្ចាស់បាល់មាស Ballon d'Or ចំនួន ៥លើកពីក្លិបសេះបង្កង់ Juventus ក្នុងតម្លៃ ២៣លានអឺរ៉ូ។ កិច្ចព្រមព្រៀងនេះមានរយៈពេល ២ឆ្នាំ ហើយក្លិបផ្តល់ឲ្យគាត់ជាង ៥៥ម៉ឺនអឺរ៉ូក្នុង ១សប្តាហ៍ (៤៨០,០០០ផោន)។

Juventus បានទិញ Ronaldo ក្នុងតម្លៃជាង ១២២លានអឺរ៉ូជាមួយកិច្ចសន្យា ៤ឆ្នាំពីក្លិបយក្សអេស្ប៉ាញ Real Madrid ក្រោយចេញពី Manchester United កាលពីខែកក្កដា ឆ្នាំ២០០៩ បន្ទាប់ពីរកគ្រាប់បាល់បាន ១១៨គ្រាប់ក្នុងការចូលលេងបាន ២៩២លើក។ តាមពិតទៅប្រធានក្រុមជម្រើសជាតិព័រទុយហ្គាល់ វ័យ ៣៦ឆ្នាំនៅសល់ពេលមិនដល់ ១០ខែទៀតទេសម្រាប់ការលេងនៅ Juventus មុនវិលមកទ្រនំចាស់វិញ៕