(អាមេរិក)៖ ក្រុមហ៊ុនផលិតរថយន្តអគ្គីសនី Tesla បានប្រកាសបង្ហាញរបាយការណ៍ប្រាក់ចំណូល និងចំណេញត្រីមាសទី៣ ឆ្នាំ២០២១ ដោយ ទទួលបានច្រើនជាងការរំពឹងទុក ជាពិសេសគឺបញ្ហាកង្វះខាតបន្ទះឈីបជាសកលមិនបានរារាំង និងប៉ះពាល់ដល់ការលក់រថយន្តរបស់ Tesla។ នេះបើយោងតាមការចេញផ្សាយរបស់សារព័ត៌មាន Nikkei Asia នៅថ្ងៃទី២១ ខែតុលា ឆ្នាំ២០២១។

banner

នៅក្នុងរយៈពេល៣ខែគិតត្រឹមចុងខែកញ្ញា ក្រុមហ៊ុន Tesla បានរាយការណ៍មកថា ខ្លួនទទួលបានប្រាក់ចំណេញរហូតដល់ ១,៦២ពាន់លានដុល្លារ អាមេរិក ដែលជាចំនួនខ្ពស់បំផុត និងច្រើនជាងទ្វេដងបើធៀបទៅនឹងត្រីមាសទី៣ ឆ្នាំមុនមានត្រឹមតែ ៣៣១លានដុល្លារ អាមេរិកប៉ុណ្នោះ។

ក្នុងត្រីមាសទី៣នេះ ក្រុមហ៊ុនផលិតរថយន្តអគ្គីសនីដែលឈានមុខគេមួយនេះរកប្រាក់ចំណូលសរុបបានចំនួន ១៣,៧៦ពាន់លានដុល្លារអាមេរិក ហើយបើធៀបទៅនឹងឆ្នាំមុនគឺកើនឡើងប្រមាណជា ៥៧ភាគរយ ដែលវាជាកំណត់ត្រាមមួយខ្ពស់សម្រាប់ក្រុមហ៊ុនផលិតរថយន្តអគ្គិសនី អាមេរិកផងដែរ។

បើទោះបីជាត្រីមាសទី៣នេះ ក្រុមហ៊ុន Tesla ទទួលបានប្រាក់ចំណេញខ្ពស់ក្ដី ប៉ុន្តែក៏ជួបនូវបញ្ហាមួយចំនួនដូចជា កង្វះឧបករណ៍អេឡិចត្រូនិក ការកកស្ទះនៅកំពង់ផែ និងការដាច់ចរន្តអគ្គិសនី ដែលបញ្ហាទាំងនេះបានជះឥទ្ធិពលដល់សមត្ថភាពក្នុងការផលិត ក៏ព្រោះតែរោងចក្រមិនអាចដំណើរការបានក្នុងល្បឿនពេញ។

ក្រុមហ៊ុន Tesla ក៏បានរំលេចផងដែរថា ការទទួលបានប្រាក់ចំណេញខ្ពស់នេះក៏ដោយសារតែសង្វាក់ផលិតកម្មនៅក្នុងប្រទេសចិនបាន ដំណើរការ ដោយរលូន និងជាពិសេសគឺតម្រូវការរថយន្តរបស់ Tesla នៅក្នុងទីផ្សារប្រទេសមួយនេះច្រើនជាងបណ្ដាទីផ្សារផ្សេងៗនៅលើពិភពលោក។

ក្រុមហ៊ុនផលិតរថយន្តអគ្គិសនីអាមេរិកមួយនេះមិនបានបង្ហាញពីតួលេខនៃការនាំចេញរថយន្តសរុបនៅក្នុងត្រីមាសទី៣ឡើយ ប៉ុន្តែសមាគមរថយន្តដឹកអ្នកដំណើរចិន (CPCA) បានបញ្ជាក់ថា Tesla លក់រថយន្តបាន ៥២១៥៣គ្រឿងក្នុងប្រទេសចិននៅត្រីមាសទី៣ ខណៈដែល សរុបនៅទូទាំងពិភពលោកមានចំនួនសរុប ២៤១៣០០គ្រឿង ដោយបានកើនឡើង ៧៣ភាគរយបើធៀបនឹងឆ្នាំមុន៕