(ភ្នំពេញ)៖ ក្រុមហ៊ុនហួវៃ បានប្រារព្ធពិធី Eco-Connect Europe ឆ្នាំ២០២១ តាមរយៈប្រព័ន្ធអនឡាញ ក៏ដូចជានៅតាមទីតាំងក្នុងប្រទេសចំនួន ៥ ផងដែរ។ លោក Guo Ping ប្រធានប្តូរវេនរបស់ក្រុមហ៊ុនហួវៃ បានធ្វើការបើកព្រឹត្តិការណ៍នេះជាមួយនឹងសុន្ទរកថាដែលមានចំណងជើងថា «ការចាប់ផ្តើមដំណើរថ្មីនៃប្រតិបត្តិការបៃតងនិងឌីជីថលជាមួយអឺរ៉ុប»។

ភ្ញៀវកិត្តិយសសំខាន់ៗជាច្រើនរូបត្រូវបានអញ្ជើញឱ្យថ្លែងសុន្ទរកថានៅក្នុងព្រឹត្តិការណ៍នេះ ដែលរួមមានសមាជិកនៃសភាអឺរ៉ុប Lars Berg, លោក Marcus Gloger នៃPwC Strategy& (Germany) ដៃគូ GmbH, លោក José Donoso, ប្រធានក្រុមប្រឹក្សា Global Solar Council (GSC) និងលោក Afke Schaart អនុប្រធានជាន់ខ្ពស់នៃកិច្ចការរដ្ឋាភិបាលសកលរបស់ក្រុមហ៊ុនហួវៃ។

កំណត់សម្គាល់សំខាន់ៗនៅក្នុងសុន្ទរកថារបស់លោក Guo Ping រួមមានការលើកឡើងអំពី ការសហការរវាងក្រុមហ៊ុន ហួវៃ នឹងអឺរ៉ុប ដើម្បីផ្លាស់ប្តូរទៅជាអនាគតបៃតង និងឌីជីថល។ លោកបានពន្យល់ពីគុណតម្លៃធំៗបីរបស់ក្រុមហ៊ុនរួមមាន៖ «ការបើកការផ្លាស់ប្តូរឌីជីថលរបស់អឺរ៉ុប ការប្រើប្រាស់បច្ចេកវិទ្យាឌីជីថលនាំមុខគេដើម្បីបើកការផ្លាស់ប្តូរបៃតង និងការបំពេញទំនួលខុសត្រូវសង្គមរបស់ក្រុមហ៊ុនយើងនៅក្នុងសម័យឌីជីថល»។

លោក Guo Ping បានបញ្ជាក់ថា «ក្រុមហ៊ុន ហួវៃ កំពុងជួយអឺរ៉ុបឱ្យដើរទៅកាន់ឌីជីថល តាមរយៈការកសាងហេដ្ឋារចនាសម្ព័ន្ធបច្ចេកវិទ្យាព័ត៌មានវិទ្យា (ICT) ដ៏រឹងមាំ និងរក្សាភាពជាអ្នកដឹកនាំជាសកលផ្នែកហេដ្ឋារចនាសម្ព័ន្ធ ICT ។ ក្នុងអំឡុង ពេលប្រឈមមុខនឹងជំងឺរាតត្បាត ក្រុមហ៊ុនបានជួយអឺរ៉ុប ក្នុងការសម្រេចបាននូវសកម្មភាពសំខាន់ៗមួយចំនួនដូចជា ការធ្វើប្រតិបត្តិការការងារ និងការសិក្សាពីចម្ងាយ។ ក្រុមហ៊ុន ក៏កំពុងធ្វើការសហការជាមួយឧស្សាហកម្មជាច្រើន ដើម្បីបម្លាស់ប្តូរឌីជីថល តាមរយៈការបង្កើតមជ្ឈមណ្ឌលនវានុវត្តភាពរួមគ្នាជាច្រើនដូចជា OpenLabs នៅទីក្រុងMunich និងទីក្រុងប៉ារីសផងដែរ»។

លោក Marcus Gloger ក៏បានសង្កត់ធ្ងន់ទៅលើសារៈសំខាន់នៃហេដ្ឋារចនាសម្ព័ន្ធឌីជីថលផងដែរ។ លោកបានថ្លែងថា «ហេដ្ឋារចនាសម្ព័ន្ធឌីជីថលគឺជាមូលដ្ឋានគ្រឹះសម្រាប់ការផ្លាស់ប្តូរ និងមានឥទ្ធិពលយូរអង្វែងទៅលើការសម្រេចនៃគុណតម្លៃសម្រាប់សហគ្រាសនិងសង្គមទាំងមូលផងដែរ»។

លោក Guo Ping បានបន្តថា «ក្រុមហ៊ុន ហួវៃ ក៏កំពុងប្រើប្រាស់បច្ចេកវិទ្យាឌីជីថល ដើម្បីជួយកសាងអឺរ៉ុបបៃតងផងដែរ។ តាមរយៈការប្រើប្រាស់ប៊ីត(bits) ដើម្បីគ្រប់គ្រងវ៉ាត់(watts) ក្រុមហ៊ុនផ្តល់នូវដំណោះស្រាយថាមពលកាបូនទាបដល់អតិថិជនឧស្សាហកម្មរបស់យើង ដើម្បីជួយពួកគេឱ្យសម្រេចនូវគោលដៅអព្យាក្រឹតភាពកាបូន ដែលទាំងនេះរួមមានដំណោះស្រាយ Smart PV ថាមពល site power ថាមពលមជ្ឈមណ្ឌលទិន្នន័យ data center អគ្គិសនីចរាចរណ៍ traffic electrification និងដំណោះ ស្រាយថាមពលឆ្លាតវៃដែលបានរួមបញ្ចូលគ្នា integrated smart power solutions »។

លោក José Donoso បានបន្ថែមលើយោបល់របស់លោក Guo ថា «សមាជិកសហការីរបស់យើង តួយ៉ាងក្រុមហ៊ុន ហួវៃ ផ្តោតសំខាន់លើនវានុវត្តភាពផ្នែកបច្ចេកវិទ្យា ហើយផលិតផលបច្ចេកវិទ្យាទាំងនេះត្រូវបានប្រើប្រាស់នៅជុំវិញពិភពលោកផងដែរ»។

លើសពីនេះ លោក Guo Ping បាននិយាយថា «យើងកំពុងប្រើប្រាស់បច្ចេកវិទ្យាឌីជីថល ដើម្បីរួមចំណែកយ៉ាងសកម្មដល់សុខុមាលភាពរបស់សហគមន៍អឺរ៉ុបផងដែរ»។ លោក Afke Schaart បានបន្ថែមទៀតថាហួវៃ កំពុងប្រើប្រាស់គំនិតផ្តួចផ្តើម TECH4ALL របស់ខ្លួនដើម្បីដើរតួជាពលរដ្ឋសាជីវកម្មដែលប្រកបដោយទំនួលខុសត្រូវ។

លោកបន្តលើកឡើងថា «ជំងឺរាតត្បាតនេះបានពន្លឿននូវការប្រើប្រាស់បច្ចេកវិទ្យាឌីជីថល នឹងធ្វើឱ្យវាក្លាយជាកត្តាមួយកាន់តែសំខាន់សម្រាប់ជួយដល់មនុស្សទាំងអស់គ្នាដែលមិនមាននរណាម្នាក់ត្រូវបានទុកចោលនោះទេ។ TECH4ALL របស់យើងផ្តោតសំខាន់ទៅលើ ការអប់រំ ការការពារបរិស្ថាន ការថែទាំសុខភាព និងការអភិវឌ្ឍដែលប្រកបដោយតុល្យភាព»។

កិច្ចសហការគឺជាអ្វីដែលមិនអាចខ្វះបានក្នុងដំណើរការបៃតងនិងឌីជីថល។ លោក Lars Berg បាននិយាយថា «ខ្ញុំប្រាកដណាស់ថាយើងទាំងអស់មានគំនិតស្របគ្នាថា កិច្ចសហប្រតិបត្តិការនិងការសហការគ្នានេះគឺចាំបាច់ ដើម្បីភាពរីកចម្រើននិងជោគជ័យ»។

នៅចុងបញ្ចប់នៃសុន្ទរកថា លោក Guo Ping បានបញ្ជាក់ឡើងវិញពីការប្តេជ្ញាចិត្តរបស់ក្រុមហ៊ុន ហួវៃ នៅអឺរ៉ុបថា «មានអ្នកធ្លាប់សួរខ្ញុំថាតើក្រុមហ៊ុន ហួវៃ នឹងចាកចេញពីអឺរ៉ុបដែរឬទេ? ខ្ញុំចង់ធានាថា រឿងនេះនឹងមិនកើតឡើងទេ។ ផ្ទុយទៅវិញ យើង នឹងពង្រីកកិច្ចសហការរបស់យើងបន្ថែមទៀត ឱ្យកាន់តែស៊ីជម្រៅនៅអឺរ៉ុប និងរួមចំណែកបង្កើតគុណតម្លៃបន្ថែមទៀតទៅលើកិច្ចខិតខំប្រឹងប្រែងទ្វេ បៃតងនិងឌីជីថល (green and digital) របស់ខ្លួន»៕