(ភ្នំពេញ)៖ ក្រុមហ៊ុន គីម ម៉ិច ខនស្រ្តាក់សិន និងអ៊ិនវេសមេន ត្រូវបានរាជរដ្ឋាភិបាលកម្ពុជា ផ្តល់ទំនុកចិត្តក្នុងការសាងសង់អគារទីស្តីការថ្មី របស់ក្រសួងមហាផ្ទៃ ដែលមានទំហំ ១៥៣ម៉ែត្រ គុណ៨១ម៉ែត្រ និងមានកំពស់៩ជាន់ រួមទាំងជាន់ផ្ទាល់ដី និងចំណតរថយន្ត ក្នុងតម្លៃសាងសង់ប្រមាណ ៦០លានដុល្លារអាមេរិក។
លោកឧកញ៉ា ទូច គីម អគ្គនាយកក្រុមហ៊ុន គីម ម៉ិច ខនស្រ្តាក់សិន និងអ៊ិនវេសមេន បានប្តេជ្ញាសាងសង់គម្រោងអគារទីស្តីការក្រសួងមហាផ្ទៃថ្មីនេះឱ្យបានទាន់ពេលវេលា និងត្រឹមត្រូវតាមស្ទង់ដាបច្ចេកទេស ក្នុងរយៈពេល២២ខែ ដែលគ្រោងនឹងបញ្ចប់នៅខែសីហា ឆ្នាំ២០២៣ ខាងមុខនេះ។
សូមបញ្ជាក់ថា នាព្រឹកថ្ងៃទី១១ ខែវិច្ឆិកា ឆ្នាំ២០២១ សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ និងលោកស្រី ញ៉ែម សាខន ស ខេង បានអញ្ជើញជាអធិបតីដ៏ខ្ពង់ខ្ពស់ក្នុងពិធីបញ្ចុះបឋមសិលាសាងសង់អគារទីស្ដីការក្រសួងមហាផ្ទៃថ្មី នៅលើទីតាំងចាស់ ដែលមានផ្ទៃដីសរុបទំហំ ៥.៧ហិចតា ស្ថិតនៅលើវិថីព្រះនរោត្តម សង្កាត់ទន្លេបាសាក់ ខណ្ឌចំការមន រាជធានីភ្នំពេញ ដោយមានការចូលរួមពី ដ្ឋលេខាធិការប្រចាំការ, រដ្ឋលេខាធិការ, អនុរដ្ឋលេខាធិការ ក្រសួងមហាផ្ទៃ, ថ្នាក់ដឹកនាំ និងអង្គភាពពាក់ព័ន្ធនានាចំណុះក្រសួងមហាផ្ទៃ ព្រមទាំងមន្ត្រីជំនាញពាក់ព័ន្ធជាច្រើនរូបទៀតផងដែរ។
នាឱកាសដ៏សែនឱឡារិកអធិកអធមនេះសម្តេចក្រឡាហោម ស ខេង ព្រមទាំងថ្នាក់ដឹកនាំទាំងអស់ ក៏បានប្រារព្ធធ្វើពិធីសែនក្រុងពាលីតាមទំនៀមទម្លាប់ប្រពៃណីព្រះពុទ្ធសាសនាខ្មែរពីបុរាណ ដោយបានរៀបចំនូវគ្រឿងសក្ការបូជា មានទៀន ធូប ផ្កាភ្ញី ប្រដាប់ប្រដាផ្សេងៗ បូជាចំពោះគុណព្រះរតនត្រៃ គុណកែវទាំង៣ មានព្រះពុទ្ធ ព្រះធម៌ ព្រះសង្ឃ និងបួងសួងដល់វត្ថុស័ក្តិសិទ្ធិក្នុងលោក ទសបារមីដែលថែរក្សាទឹកដី ភូមិករ និងម្ចាស់ទឹក ម្ចាស់ដី ដើម្បីសុំនូវសេចក្តីសុខ សេចក្តីចម្រើនដល់ដំណើរការសាងសង់អគារទីស្តីការក្រសួងមហាផ្ទៃថ្មី ឱ្យប្រព្រឹត្តិទៅដោយរលូន និងប្រកបដោយសុវត្ថិភាព ព្រមទាំងគ្មានឧបសគ្គជានិច្ច ព្រមទាំងបាននិមន្តព្រះសង្ឃចម្រើនព្រះបរិត្តស្វាធ្យាយ ជយន្ដោ ប្រោះព្រំដល់គណៈអធិបតី និងភ្ញៀវកិត្តិយសជាជ័យមង្គលដ៏ឧត្តុង្គឧត្តមផងដែរ។
ជាមួយគ្នានេះ បន្ទាប់ពីប្រារព្ធពិធីក្រុងពាលី និងសែនព្រេនដល់ម្ចាស់ទឹកម្ចាស់ដី សុំសេចក្តីសុខ សេចក្តីចម្រើនរួចមក សម្តេចក្រឡាហោម ស ខេង ព្រមទាំងថ្នាក់ដឹកនាំទាំងអស់ ក៏បានអញ្ជើញធ្វើពិធីបញ្ចុះដុំសីមាចូលក្នុងរណ្តៅគ្រឹះ ដោយក្នុងនោះ ក៏បានបន្តរៀបចំនិមន្តព្រះសង្ឃសូត្រធម៌ប្រោះព្រំដុំសីមា ព្រមទាំងធ្វើពិធីដង្ហែដុំសីមា និងកាត់ឫសសីមាដាក់ចូលក្នុងរណ្ដៅគ្រឹះជានិមិត្តរូបសម្រាប់ការងារចាប់ផ្តើមដំណើរការសាងសងតែម្តង បន្ទាប់ពីពិធីបញ្ចុះដុំសីមាចូលក្នុងរណ្តៅគ្រឹះរួចមក សម្តេចក្រឡាហោម ស ខេង ព្រមទាំងថ្នាក់ដឹកនាំទាំងអស់ ក៏បានចុចប៊ូតុងបញ្ជាគ្រឿងចក្រ ចាប់ផ្ដើមសម្ពោធការដ្ឋានសាងសង់អគារទីស្ដីការក្រសួងមហាផ្ទៃថ្មី ជាផ្លូវការផងដែរ។
សូមបញ្ជាក់ថា អាគារទីស្ដីការក្រសួងមហាផ្ទៃថ្មី ផ្នែកខាងមុខនៃអាគារនេះ បែទៅទិសខាងកើតស្របតាមផ្លូវព្រះនរោត្តម និងបែមុខចំទន្លេរធំៗទាំងបួន ដែលគេហៅថាទន្លេចតុមុខ ។ អគារនេះ មានទំហំ ១៥៣ម៉ែត្រ គុណ៨៣ម៉ែត្រ មានកម្ពស់៩ជាន់ មិនរាប់បញ្ចូលជាន់ផ្ទាល់ដី និងជាន់សម្រាប់ចំណតរថយន្ត ដែលអាចចតរថយន្តក្នុងអាគារបានសរុបចំនួន៣៣០គ្រឿង និងដំបូលអគារកម្ពស់៦៣ម៉ែត្រ គិតត្រឹមដំបូលក្បឿង ៩២ម៉ែត្រគិតដល់ចុងបុស្បបុកតូច និង១១៨ ម៉ែត្រគិតដល់ចុងបុស្បបុកធំ។
លើសពីនេះទៀត ប្លង់ស្ថាបត្យកម្ម នៃអគារទីស្តីការថ្មីរបស់ក្រសួងមហាផ្ទៃនេះ ជាប្រភេទស្ថាបត្យកម្ម ក្លាសិក រចនាបទខ្មែរដំបូលប្រក់ក្បឿងស្រកាលិញ មានបុស្បបុកចំនួនប្រាំ លំនាំតាមប្រាសាទអង្គវត្តកំពូលប្រាំ ដោយអនុលោមតាមគោលការណ៍សមមាត្រនៃរូបរាងអគារ នឹងបានគិតគូរយ៉ាងហ្មត់ចត់អំពីពន្លឺ ខ្យល់ធម្មជាតិ ចេញចូលគ្រប់គ្រាន់ ប្រកបដោយផាសុខភាព ស័ក្តិសមជាទីកន្លែងធ្វើការបែបសម័យទំនើបថ្មី។
សូមបញ្ជាក់ជូនផងដែរថា ការសាងសង់អគារទីស្ដីការក្រសួងមហាផ្ទៃថ្មី នៅលើទីតាំងចាស់នេះ ដោយមានការយល់ព្រមពីប្រមុខរាជរដ្ឋាភិបាលកម្ពុជា និងបានកំណត់ជាផែនការសាងសង់ជាក់លាក់ ដោយគិតចាប់ផ្ដើមដំណើរការសាងសង់ពី ខែវិច្ឆិកា ឆ្នាំ២០២១ ហើយបញ្ចប់ការសាងសង់នៅ ខែសីហា ឆ្នាំ២០២៣ ខាងមុខ៕
