(ភ្នំពេញ)៖ ព្រឹត្តិការណ៍ប្រណាំងកង់ភ្នំ WURKZ Mountain Bike Series ជុំទី២ បានចាប់ផ្តើមការប្រកួតហើយ នៅព្រឹកថ្ងៃទី១៩ ខែធ្នូ ឆ្នាំ២០២១ នៅឯទីលានប្រណាំងកង់ព្រែកលៀប សិ្ថតក្នុងខណ្ឌជ្រោយចង្វារ រាជធានីភ្នំពេញ ដោយមានអ្នកជិះកង់អាជីព និងអ្នកមានបទពិសោធន៍តិចតួចចូលរួមចុះឈ្មោះប្រកួតប្រមាណជាង ៥៣០ នាក់។ ពួកគេ មកពីរាជធានីភ្នំពេញ និងតាមបណ្តាខេត្តនានា នេះបើតាមការឲ្យដឹងពីលោក Pierre Yves Catry ប្រធានបច្ចេកទេសរៀបចំការប្រកួត និងស្ថាបនិកព្រឹត្តិការណ៍ប្រណាំងកង់ភ្នំ។

លោក Pierre Yves Catry បានថ្លែងថា៖ «ការប្រកួតជុំទី២ ទទួលបានអ្នកចុះឈ្មោះចូលរួមច្រើនជាងជុំទី១ ដែលបង្ហាញការគាំទ្រកាន់តែខ្លាំងលើព្រឹត្តិការណ៍ប្រណាំងកង់ភ្នំនេះ។ ហើយអ្វីដែលគួរឲ្យកត់សម្គាល់គឺអ្នកចូលរួមភាគច្រើនមានវ័យក្រោម ៤០ ឆ្នាំ ព្រោះផ្លូវប្រណាំងលើកនេះមានលក្ខណៈពិបាកជាងមុន»។

លោកបានឲ្យដឹងទៀតថា ការប្រកួតជុំទី២នេះ បែងចែកជា ១៤ វិញ្ញាសាផ្សេងគ្នា ដែលអ្នកជិះកង់ជំនាញ និងអ្នកដែលមានបទពិសោធន៍តិចតួចអាចប្រណាំងជាមួយគូប្រជែងក្នុងកម្រិតដូចគ្នា។

ទន្ទឹមនឹងនេះ លោក បែន តំណាងក្រុមហ៊ុន ខ្មែរ ប៊ែវើរីជីស ដែលជាម្ចាស់ឧបត្ថម្ភផ្តាច់មុខព្រឹត្តិការណ៍នេះ បានសម្តែងការរំភើប ពេលឃើញមានអ្នកចូលរួមកាន់តែច្រើនកុះករឡើងបែបនេះ។

លោកបន្តថា៖ «កម្មវិធីនេះពិតជាល្អ និងសំខាន់សម្រាប់កីឡាករអាជីព ក៏ដូចជាអ្នកចូលចិត្តជិះកង់ទូទៅ ព្រោះវាមិនត្រឹមតែជាការប្រណាំងដើម្បីឈ្នះពាន់រង្វាន់ប៉ុណ្ណោះទេ តែវាក៏ជាការជំរុញ និងបណ្តុះស្មារតីតស៊ូ និងតាំងចិត្តដល់កីឡាករ ដើម្បីធ្វើយ៉ាងណាខិតខំឆ្ពោះទៅមុខជានិច្ច រហូតទៅដល់ទីលានផ្ដាច់ព្រ័ត្រ»។

តំណាងរបស់ក្រុមហ៊ុនផលិតស្រាបៀរ និងភេសជ្ជៈដ៏ល្បីរូបនេះ ក៏បានរំលឹកដល់កីឡាករឲ្យមានការប្រុងប្រយ័ត្នខ្ពស់អំឡុងពេលប្រកួត ចំណែកអ្នកចូលរួមទស្សនាវិញត្រូវចូលរួមពាក់ម៉ាស និងអនុវត្តវិធានការណ៍ការពារឲ្យបានគ្រប់ៗគ្នា។

គួរបញ្ជាក់ថា ក្រោមការឧបត្ថម្ភផ្តាច់មុខពីភេសជ្ជៈប៉ូវកម្លាំង វើក កម្មវិធីនេះធ្វើឡើង ដើម្បីផ្តល់ការកម្សាន្តបែបសុខភាពជូនដល់អ្នកចូលចិត្តជិះកង់គ្រប់រូប និងអ្នកទស្សនា ក៏ដូចជាជំរុញវិស័យកីឡាជិះកង់នៅកម្ពុជា តាមរយៈការបង្កើតឱកាសឲ្យកីឡាករអាចហ្វឹកហាត់ពង្រឹងសមត្ថភាពរបស់ខ្លួនត្រៀមប្រកួតក្នុងឆាកអន្តរជាតិ។

សម្រាប់ឆ្នាំ២០២១ ការប្រកួតធ្វើឡើងចំនួន៣ ជុំផ្សេងគ្នា។ ជុំទី ១ ធ្វើឡើងនៅឯភ្នំជាលខេត្តកំពង់ស្ពឺ ជុំទី២ នៅព្រែកលៀបរាជធានីភ្នំពេញ ចំណែកឯជុំទី៣ នឹងធ្វើឡើងនៅចុងខែមករា ឆ្នាំ២០២១ នៅគិរីរម្យខេត្តកំពង់ស្ពឺ៕