(បរទេស)៖ កំពូលមហាសេដ្ឋី Elon Musk បានផ្តល់សំណើទិញយកបណ្តាញសង្គម Twitter ក្នុងតម្លៃ ៤១ពាន់លានដុល្លារអាមេរិក ជាសាច់ប្រាក់សុទ្ធ ដែលការផ្តល់ជូននេះត្រូវបានធ្វើឡើងតែប៉ុន្មានថ្ងៃប៉ុណ្ណោះ បន្ទាប់ពីបានទិញហ៊ុន Twitter ចំនួន ៩,២ភាគរយ និងបានក្លាយជាម្ចាស់ភាគហ៊ុនធំជាងគេបំផុត។

យោងតាមការចេញផ្សាយរបស់សារព័ត៌មាន Reuters នៅថ្ងៃទី១៤ ខែមេសា ឆ្នាំ២០២២ បានឲ្យដឹងថា មូលហេតុដែលកំពូលមហាសេដ្ឋីលំដាប់ទីមួយនៅលើពិភពលោករូបនេះ ចង់ទិញយក Twitter ក៏ព្រោះតែលោកចង់ប្រែក្លាយ Twitter ទៅជាក្រុមហ៊ុនឯកជនទើបមានការផ្លាស់ប្តូរប្រកបដោយប្រសិទ្ធភាព។

មហាសេដ្ឋីរូបនេះបានច្រានចោលការផ្តល់ជូនដើម្បីចូលរួមជាមួយក្រុមប្រឹក្សាភិបាលរបស់ Twitter កាលពីដើមសប្តាហ៍នេះ បន្ទាប់ពីបានបង្ហាញពីភាគហ៊ុនរបស់គាត់នៅក្នុងក្រុមហ៊ុន ដែលជាការផ្លាស់ប្តូរមួយដែលអ្នកវិភាគបាននិយាយថាជាសញ្ញាបង្ហាញពីចេតនារបស់គាត់ក្នុងការកាន់កាប់ក្រុមហ៊ុននេះ ខណៈដែលកៅអីក្រុមប្រឹក្សាភិបាលនឹងកំណត់ភាគហ៊ុនរបស់គាត់ត្រឹមតែក្រោម ១៥ភាគរយ ប៉ុណ្ណោះ។

លោក Musk ដែលហៅខ្លួនឯងថាជាអ្នកនិយាយដោយសេរី បានរិះគន់វេទិកាប្រព័ន្ធផ្សព្វផ្សាយសង្គម ហើយថ្មីៗនេះបានធ្វើការស្ទង់មតិនៅលើ Twitter ដោយសួរអ្នកប្រើប្រាស់ថា តើពួកគេជឿថាវេទិកានេះប្រកាន់ខ្ជាប់នូវគោលការណ៍នៃការបញ្ចេញមតិដោយសេរីដែរ ឬទេ?

ប្រភពមួយបានប្រាប់ Reuters ថា Twitter នឹងពិនិត្យមើលការផ្តល់ជូនរបស់ Musk ជាមួយនឹងណែនាំពីសំណាក់អ្នកជំនាញ Goldman Sachs & Co និង Wilson Sonsini Goodrich & Rosati ៕