(ភ្នំពេញ)៖ បន្ទាប់ពីទទួលបានដំណឹងអកុសល ចំពោះហេតុការណ៍គ្រោះថ្នាក់ចរាចរណ៍បណ្តាលឲ្យ ឪពុកម្តាយរបស់តារាចម្រៀង សុវត្ថិឌី ធារិកា បានបាត់បង់ជីវិតទាំងពីរនាក់ ដ៏គួរឲ្យសោកស្តាយជាពន់ពេកហើយនោះ តារាចម្រៀង, តារាសម្តែង, អ្នកសិល្បៈដែលធ្លាប់ស្គាល់តារាចម្រៀង សុវត្ថិឌី ធារិកា និងមហាជនទូទៅ បានសម្តែងក្តីតក់ស្លុត រន្ធត់ចិត្ត និងបានចូលរួមរំលែកទុក្ខជាហូរហែ ចំពោះការបាត់បង់ដ៏ធំធេងមួយនេះ។

នៅក្នុងបណ្តាញសង្គមហ្វេសប៊ុក របស់សិល្បករ-សិល្បការិនី និងអ្នកសិល្បៈទូទៅ បានបង្ហោះសារចូលរួមរំលែកទុក្ខ និងសោកស្តាយបំផុតជាមួយនឹងតារាចម្រៀង សុវត្ថិឌី ធារិកា។ អ្នកខ្លះបានចូលរួមផ្តល់កម្លាំងចិត្ត ដើម្បីឲ្យតារាចម្រៀង សុវត្ថិឌី ធារិកា រឹងមាំឡើង។

គួរជម្រាបថា រថយន្ដរបស់តារាចម្រៀង សុវត្ថិឌី ធារិកា ជួបគ្រោះថ្នាក់ចរាចរណ៍ក្រឡាប់ដោយខ្លួនឯង បណ្ដាលឲ្យស្លាប់ឪពុក និងម្ដាយ នៅរសៀលថ្ងៃទី១៧ ខែឧសភា ឆ្នាំ២០២២នេះ ក្រោយត្រឡប់មកពីចូលរួមកម្មវិធីសម្ពោធ និងសំណង់សិល្បការផ្សេងៗ នៅស្រុកឆែប ខេត្តព្រះវិហារ ក្រោមអធិបតីភាពសម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ។ លោកឧត្តមសេនីយ៍ទោ សួស សុខដារ៉ា ស្នងការនគរបាលខេត្តព្រះវិហារ បានប្រាប់បណ្ដាញព័ត៌មាន Fresh News ឲ្យដឹងនៅមុននេះបន្ដិចថា ក្នុងហេតុការណ៍គ្រោះថ្នាក់ចរាចរណ៍នេះ បណ្ដាលឲ្យមនុស្ស២នាក់ស្លាប់ ហើយគេស្គាល់ថា ជាឪពុក និងម្ដាយបង្កើត របស់តារាចម្រៀង សុវត្ថិឌី ធារិកា ព្រមទាំងរបួស២នាក់ទៀតផងដែរ។

បើតាមលោកឧត្តមសេនីយ៍ស្នងការ ក្រោយកើតហេតុភ្លាមៗកម្លាំងនគរបាលមូលដ្ឋាន បានចុះទៅជួយអន្តរាគមន៍ផងដែរ ប៉ុន្តែជាអកុសលជួយមិនទាន់ដោយសារជនរងគ្រោះ ក្រឡាប់ចូលប្រឡាយទឹកនៅជាប់ផ្លូវបណ្តាល ឲ្យឈ្លក់ស្លាប់តែម្តង។ បន្ថែមពីនេះលោកវរសេនីយ៍ឯក ឈួរ ម៉ាឌី អធិការនគរបាលស្រុកឆែប បានបញ្ជាក់ថា ហេតុការណ៍នេះ គឺរថយន្ដក្រឡាប់ធ្លាក់ទឹកដោយខ្លួនឯង ហើយជនរងគ្រោះដែលស្លាប់ទំនងជាឈ្លក់ទឹក ដែលមិនអាចសង្គ្រោះបានទាន់ពេលវេលា។

ជាមួយគ្នានេះ ទាំងលោកឧត្តមសេនីយ៍ស្នងការ និងលោកអធិការស្រុក សូមចូលរួមរំលែកទុក្ខជាមួយក្រុមគ្រួសាររងគ្រោះផងដែរ សម្រាប់ជួបគ្រោះអកុសលនេះ។ ដោយឡែកតារាចម្រៀង អ៊ាម វណ្ណី ក៏បានថ្លែងប្រាប់ Fresh News Plus នៅមុននេះបន្តិចថា ឪពុកនិងម្តាយរបស់សុវត្ថិឌី ធារិកា បានបាត់បង់ជីវិតទាំងពីរអ្នកហើយ ក្នុងគ្រោះថ្នាក់ចរាចរ នៅស្រុកឆែប ខេត្តព្រះវិហារ ធារិកា ប្អូនប្រុស និងយាយផុតគ្រោះថ្នាក់ ហើយលោកពិតជាសោកស្តាយយ៉ាងខ្លាំង ចំពោះការបាត់បងនេះ។

សូមជម្រាបថា តាមរយៈ Facebook របស់តារាចម្រៀង សុវត្ថិឌី ធារិកា បានឲ្យដឹងថា កាលពីព្រឹកមិញនេះ រូបនាងបានទៅចូលរួមកម្មវិធីសម្ពោធ និងសំណង់សិល្បការផ្សេងៗ ស្ថិតក្នុងភូមិកំពង់ស្រឡៅ ឃុំកំពង់ស្រឡៅមួយ ស្រុកឆែប ខេត្តព្រះវិហារ លុះត្រឡប់មកវិញ ក៏បានជួបនូវហេតុការណ៍គ្រោះថ្នាក់ចរាចរណ៍នេះតែម្ដង៕