(ភ្នំពេញ)៖ លោកឧកញ៉ាបណ្ឌិត គីម ហ៊ាង ប្រធានស្ថាបនិកពានរង្វាន់ KW Cambodia League និងក្លិបពាក់កណ្តាលអាជីព Khmer United បានប្រកាសគាំទ្រ ចំពោះចំណាត់ការរបស់លោក ហ៊ុន ម៉ានី តំណាងរាស្ដ្រ និងជាប្រធានសហភាពសហព័ន្ធយុវជនកម្ពុជា និងនាយឧត្តមសេនីយ៍ សៅ សុខា ប្រធានសហព័ន្ធកីឡាបាល់ទាត់កម្ពុជា(FFC) ចំពោះការមិនយកចិត្តទុកដាក់របស់ក្រុមម្ចាស់ផ្ទះឥណ្ឌា មកលើក្រុមកីឡាករបាល់ទាត់ជម្រើសជាតិកម្ពុជា ទាំងការស្នាក់នៅ ការទទួលទាន ជាពិសេសការរៀបចំទង់ជាតិ និងភ្លេងជាតិរបស់កម្ពុជានៅពេលការប្រកួត។

ក្នុងនាមប្រជាពលរដ្ឋខ្មែរម្នាក់ លោកបានសម្ដែងការមិនពេញចិត្តឡើយ ចំពោះការមិនខ្វល់ខ្វាយរបស់ម្ចាស់ផ្ទះឥណ្ឌា មកលើក្រុមបាល់ទាត់ជម្រើសជាតិកម្ពុជា ក្នុងការប្រកួតជើងឯកទ្វីបអាស៊ី ដែលមានមនុស្សរ៉ាប់លាននាក់ បានតាមដាន និងទស្សនា ។ តាមរយៈនេះ លោកបានគាំទ្រចំណាត់ការរបស់ថ្នាក់ដឹកនាំកម្ពុជា ពិសេសប្រមុខសហព័ន្ធកីឡាបាល់ទាត់កម្ពុជា ដើម្បីទាមទារការសុំទោស និងការបកស្រាយឲ្យបានច្បាស់លាស់ សម្រាប់ក្រុមជម្រើសជាតិកម្ពុជា និងប្រជាជនកម្ពុជាទាំងមូល ។

តាមរយៈបណ្ដាញសារព័ត៌មាន Fresh News លោកឧកញ៉ាបណ្ឌិត គីម ហ៊ាង បានបញ្ជាក់ថា «ក្នុងនាមប្រជាពលរដ្ឋខ្មែរ ខ្ញុំសូមគាំទ្រពេញទំហឹង ចំពោះការលើកឡើងរបស់ឯកឧត្តម ហ៊ុន ម៉ានី និងចំណាត់ការក្ដៅរបស់ឯកឧត្តមនាយឧត្តមសេនីយ៍ សៅ សុខា ដើម្បីលើកកម្ពស់គុណតម្លៃកីឡាពិតប្រាកដ នៅក្នុងវិស័យកីឡា ពិសេសសម្រាប់ក្រុមជម្រើសជាតិទាំងអស់ មិនថាតែកម្ពុជាឡើយ ។ ខ្ញុំសង្ឃឹមថា ករណីនេះ នឹងមិនកើតឡើងលើក្រុមជម្រើសជាតិកម្ពុជា និងប្រទេសផ្សេងៗទៀតឡើយ» ។

គួរដឹងថា តាមរយៈហ្វេសប៊ុកផ្លូវការរបស់លោក ហ៊ុន ម៉ានី នៅថ្ងៃទី៩ ខែមិថុនា ឆ្នាំ២០២២នេះ លោកបានថ្លែងយ៉ាងដូច្នេះ «នៅពេលការប្រកួតបាល់ទាត់រវាងក្រុមជម្រើសជាតិ ២ប្រទេស យើងឃើញថា៖

១៖ ឈ្នះ ឬចាញ់គឺជាផ្នែកមួយនៃការប្រកួត
២៖ កម្រិតនៃបដិសណ្ឋារកិច្ចអាស្រ័យលើប្រទេសម្ចាស់ផ្ទះ ឬទីកន្លែងប្រកួត។ ទោះជាយ៉ាងណាក៏ដោយយ៉ាងហោចណាស់ គឺត្រូវយកចិត្តទុកដាក់បំផុតនៅពេលគោរពទង់ជាតិ នៃប្រទេសជាភ្ញៀវ។ ខ្ញុំបានតាមដានយ៉ាងយកចិត្តទុកដាក់លើអ្វីដែលបានកើតឡើងកាលពីម្សិលមិញ ក្នុងការប្រកួតក្របខ័ណ្ឌ AFC Asian Cup ដែលក្រុមជម្រើសជាតិកម្ពុជា ប្រកួត ជាមួយក្រុមជម្រើសជាតិឥណ្ឌា ហើយអ្វីដែលបានកើតឡើងក្នុងអំឡុង ពេលគោរពទង់ជាតិនៃព្រះរាជាណាចក្រកម្ពុជា។

មិនថាវាជាកំហុស ឬបញ្ហាបច្ចេកទេសទេ ខ្ញុំសង្ឃឹមថា នឹងមានការពន្យល់គ្រប់គ្រាន់ទៅលើបញ្ហានេះ។ ក្នុងនាមខ្ញុំជាពលរដ្ឋកម្ពុជា ខ្ញុំគាំទ្រសហព័ន្ធកីឡាបាល់ទាត់កម្ពុជា (FFC) ដើម្បីស្វែងរកចម្លើយ និងការពន្យល់បន្ថែមពី AFC និងម្ចាស់ផ្ទះ។ ខ្ញុំសង្ឃឹមថា នឹងមានការប្រុងប្រយ័ត្នទុកខ្ពស់ជាងមុន សម្រាប់ព្រឹត្តិការណ៍ នាពេលអនាគតដើម្បីកុំឲ្យបញ្ហា/កំហុស នេះកើតឡើងជាថ្មីទៀត សម្រាប់គ្រប់ក្រុមជម្រើសជាតិ។

ជូនចំពោះបងប្អូនជនរួមជាតិ សូមអត់ធ្មត់ រង់ចាំការពន្យល់ និងផ្តោតសំខាន់ក្នុងការគាំទ្រក្រុមជម្រើសជាតិរបស់យើង ដែលគ្រោងនឹងមានការប្រកួតពីរទៀត។ ជាងនេះទៅទៀត ពួកគាត់ត្រូវការការគាំទ្រផ្នែកស្មារតី និងការអបអរសាទរពីពួកយើង។

សូម FFC ដែលមាន ឯកឧត្តមនាយឧត្តមសេនីយ៍ សៅ សុខា ជាប្រធាន បន្តចាត់វិធានការចាំបាច់ទាំងអស់ ដើម្បីការពារក្រុមជម្រើសជាតិយើងពេលដែលពួកគេចេញ ទៅប្រកួតក្រៅប្រទេស។ សម្រាប់ក្រុមជម្រើសជាតិរបស់យើង ទាំងគ្រូបង្វឹក និងកីឡាកររបស់យើង យើងមានមោទនភាពចំពោះអ្នកទាំងអស់គ្នា មិនថាក្នុងកាលៈទេសៈអ្វីក៏ដោយ ត្រូវរឹងមាំ និងធ្វើឱ្យអស់ពីសមត្ថភាព! ប្រជាជនទាំង១៦លាននាក់របស់យើងនឹងឈរនៅទីនេះគាំទ្រអ្នក នៅគ្រប់ការប្រកួតតំណាងជាតិ។ ជយោ! ព្រះរាជាណាចក្រកម្ពុជា!»។

សូមបញ្ជាក់ថា ក្រោយមានប្រតិកម្មខ្លាំងៗពីសំណាក់នាយឧត្តមសេនីយ៍ សៅ សុខា រួចមក សហព័ន្ធបាល់ទាត់ឥណ្ឌា (AIFF) បានចេញលិខិតមួយ ដោយធ្វើការសុំអភ័យទោសដល់សហព័ន្ធបាល់ទាត់កម្ពុជា និងក្រុមបាល់ទាត់កម្ពុជា ចំពោះបញ្ហាចាក់ភ្លេងជាតិកម្ពុជា និងបញ្ហារៀបចំការស្នាក់នៅសម្រាប់កីឡាករខ្មែរ ដែលឥណ្ឌាធ្វើជាម្ចាស់ផ្ទះ នៃការប្រកួត AFC Asian Cup 2022 នាពេលនេះ។

សហព័ន្ធបាល់ទាត់ឥណ្ឌា បានបញ្ជាក់ថា ពួកគេសូមធានាថា នឹងប្រឹងប្រែងឱ្យអស់លទ្ធភាពដើម្បីបំពេញតាមតម្រូវការរបស់សហព័ន្ធ និងជម្រើសជាតិកម្ពុជា ហើយមិនឱ្យករណីបែបនេះកើតឡើងជាថ្មីឡើយ។ បន្ថែមពីលើនេះ ពួកគេបានសូមអភ័យទោសដល់សហព័ន្ធ និងក្រុមជម្រើសជាតិកម្ពុជាទាំងមូល ចំពោះបញ្ហាពាក់ព័ន្ធនឹងសណ្ឋាគារ រួមទាំងបញ្ហាដែលបាន កើតឡើងកំលុងពេលចាក់បទភ្លេងជាតិនៃព្រះរាជាណាចក្រកម្ពុជា។ បញ្ហាពាក់ព័ន្ធនឹងការចាក់បទភ្លេងជាតិ នៃព្រះរាជាណាចក្រកម្ពុជានេះ ត្រូវបានលើកយកមកពិភាក្សាជាមួយក្រុមបច្ចេកទេស ហើយបញ្ហាគឺបង្កឡើងដោយកំហុសបច្ចេកទេសនៅលើស្រ្គីន។

ក្រុមការងាររបស់ខ្លួនទាំងមូល នឹងប្រឹងប្រែងធានាមិនឱ្យបញ្ហាបែបនេះកើតឡើងជាថ្មីទៀតទេ កំលុងការប្រកួតដែលនៅសេសសល់ និងនៅសណ្ឋាគារ។

សូមរំឮកថា នៅល្ងាចថ្ងៃទី០៨ ខែមិថុនា ពោលគឺមុនការប្រកួតបើកឆាកពូល D រវាងកម្ពុជា និងម្ចាស់ផ្ទះឥណ្ឌា នាយឧត្តមសេនីយ៍ សៅ សុខា តាមរយៈបណ្តាញព័ត៌មានផ្លូវការ Fresh News បានព្រមានទុករយៈពេល ៣ម៉ោង ឲ្យសហព័ន្ធកីឡាបាល់ទាត់អាស៊ី (AFC) និងសហព័ន្ធបាល់ទាត់ឥណ្ឌា រួមទាំងអ្នករៀបចំការប្រកួត ចេញលិខិតសុំទោសកម្ពុជាទេ បើមិនដូច្នេះទេយន្តហោះនឹងដឹកកីឡាករបាត់ទាត់ជម្រើសជាតិកម្ពុជា ត្រឡប់មកមាតុភូមិ ដោយមិនធ្វើការប្រកួតនោះទេ។ ប៉ុន្តែភ្លាមៗក្រោយប្រតិកម្ម ទីបំផុតសហព័ន្ធបាល់ទាត់អាស៊ី (AFC) បានចេញលិខិតសុំទោសកម្ពុជា។

សហព័ន្ធកីឡាបាល់ទាត់អាស៊ី (AFC) និងសហព័ន្ធបាល់ទាត់ឥណ្ឌា រួមទាំងអ្នករៀបចំការប្រកួត ត្រូវបានរិះគន់ថា មិនបានខ្វល់អ្វីទាល់តែសោះ ចំពោះការទទួលក្រុមបាល់ទាត់កម្ពុជា ទាំងអាហារ ការស្នាក់នៅ រួមទាំងទង់ជាតិរបស់កម្ពុជាផងដែរ។ ជាពិសេស អ្នករៀបចំនេះពុំមានភ្លេងជាតិកម្ពុជា ដើម្បីចាក់នៅម៉ោង១០យប់ ថ្ងៃទី៨ ខែមិថុនា ឆ្នាំ២០២២នេះ ជាពេលដែលក្រុមជម្រើសជាតិកម្ពុជា ត្រូវប្រកួតជាមួយជម្រើជាតិឥណ្ឌាដែលជាម្ចាស់ផ្ទះ ក្នុងជំនួបបើកឆាកពូល D នៃវគ្គជម្រុះជុំចុងក្រោយពានរង្វាន់ AFC Asian Cup 2022 នៅកីឡដ្ឋាន Salt Lake នាទីក្រុងកុលកាតា៕