(មីឡាន)៖ កីឡាករ Angel Di Maria បានបញ្ចប់ទាំងស្រុង នូវការផ្លាស់ទ្រនំរបស់លោកទៅលេងឲ្យក្លិបសេះបង្កង់ Juventus បន្ទាប់ពីចាកចេញពីក្លិប Paris Saint-Germain កាលពីពេលចប់រដូវកាលមុន។ នេះបើយោងតាមក្លិបលេងនៅលីគ Serie A បានប្រកាសហើយត្រូវបានចុះផ្សាយដោយសារព័ត៌មាន CNA នាថ្ងៃទី១០ ខែកក្កដា ឆ្នាំ២០២២។

"Angel Di Maria គឺជាកីឡាករបស់ក្លិប Juventus"។ នេះបើតាមក្លិប បានលើកឡើងក្នុងសេចក្តីថ្លែងការណ៍មួយ ដែលចេញផ្សាយលើបណ្តាញសង្គម។ សេចក្តីថ្លែងការណ៍បន្ថែមថា លោកបានចុះកិច្ចសន្យាលេងរហូតដល់ថ្ងៃទី៣០ ខែមិថុនា ឆ្នាំ២០២៣"។

ខ្សែបម្រើស្លាបសញ្ជាតិអាហ្សង់ទីនរូបនេះ នឹងទទួលបានប្រាក់ ៧លានអឺរ៉ូ (៧.១៤លានដុល្លារ) នៅអំឡុងរដូវកាលរបស់លោកលេងនៅក្លិបដែលមានមូលដ្ឋាននៅទីក្រុង Turin នេះ។

កីឡាករវ័យ ៣៤ឆ្នាំរូបនេះបានចាកចេញពីក្លិប PSG បន្ទាប់ពីក្លិបបារាំងនេះ បានសម្រេចមិនបន្តកិច្ចសន្យាថ្មីឲ្យលោក។ ទម្រង់លេងរបស់លោកនៅក្លិបបានធ្លាក់ចុះ ដោយសារការមកដល់នៃមិត្តរួមក្រុមអាហ្សង់ទីន Lionel Messi កាលពីរដូវក្តៅមុន។

Di Maria បានលេង ២៩៥លើក នៅក្នុងការប្រកួតទាំងអស់សម្រាប់ក្លិប PSG ដោយស៊ុតបញ្ចូលទីបាន ៩២គ្រាប់ និងបញ្ជូនបាល់បាន ១១២គ្រាប់ ក្នុងរយៈពេល៧ឆ្នាំ នៅក្លិបដែលមានមូលដ្ឋាននារដ្ឋធានីរបស់បារាំងនេះ៕